Read KIMERU BIBLE PROTESTANT EDITION Ezek 30 Bible Online

Ezek 30 - KIMERU BIBLE PROTESTANT EDITION bible

Ezek 30

¹MWATHANI nî aambarîîrie ni Ezekieli arambîîra atîrî,

²“Mûtaana wa muntû, roria ûbeere ûrîa ûûni MWATHANI Mûrungu nkuuga. Kaya na kajû gakanene uuge, Îî tîîu ntukû îrî akuî!

³Ntukû nî îîjîte ntukû ya MWATHANI îrî akuî. Nayo nî ya matu jamaingî kîrî mîgongo nî ntukû îrîa mîgongo îkaathirua.

⁴Gûkeethîrwa kûrî na ndwaa Misri na rwakaî rûrûnene Ethiopia rîrîa mbûragano îkeethîrwa îrî Misri na ûtonga bwaayo bûtawe Nayo nthîgûrû îtigwe îrî îgaanjo.

⁵“Ningî ndwaa îîu îkaathiria antû ba Ethiopia, na ba Puti na ba Ludi na ba Arabia, na ba Lîbia na kinya antû baakwa ba kîrîkanîro bakooraganîrua amwe na Misri.”

⁶MWATHANI aracoka arauga atîrî, “Barîa bonthe bagwataga Misri mbaru bakaathirua, kuuma Migidoli bwa ûrîo mwanka Sîene bwa ûmotho. Njûûrî ya Misri îrîa îkumagua îkaathirîrua o kûu. Nîu ûûni MWATHANI Mûrungu nkuuga.

⁷Nayo nthîgûrû îkathûûkangua, ntûûra ciaayo ithûûkangue nkûrûki ya ûrîa ntûûra cia mîgongo îngî îkeethîrwa iithûûkangîtue. Ningî kinya ntûûra ciaayo igaatigwa irî maganjo.

⁸Rîrîa nkaaîîthia nthîgûrû ya Misri na barîa bamîteethagia bonthe bakue nkoro, rîu nîrîo bakaamenya atî ni nî ni MWATHANI.

⁹“Ntukû îîu yakinya, ngatûma atûmwa beete na meri bakamakie Ethiopia îtiithuranîrîte. Bakaagwatwa nî rwakaî rîrîa nkaathiria Misri. Nîkwîthîrwa ntukû îîu nî îîjîte.”

¹⁰Ningî MWATHANI Mûrungu ariuga atîrî, “Ngaatûmîra Nebukadineza mûnene wa Babiloni kûthiria ûtonga bwa Misri.

¹¹Mûnene ûu na njûûrî yaawe îrîa ng'eentu buru nthîgûrûûne yonthe bageeta bathirie nthîgûrû buru. Nabo bakaithûkîra Misri na boorage antû baayo, mwanka biimba biûjûre nthîgûrû îîu.

¹²Ningî ngatûma rûûjî rwa Naili rûwe na rûnyaare mpendie nthîgûrû kîrî antû babaaî. Ngaatûma nthîgûrû na bionthe birîa birî ku bithûkangue nî antû ba kuuma kûngî. Ûu nîu ûûni MWATHANI ndauga.”

¹³MWATHANI Mûrungu ariuga ûjû, “Nkaathiria mîrungu ya mîng'uanano ya ntûûra ya Memufisi. Gûtîthîrwa kûrî na mûnene wa kwaathana Misri kaîrî. Tontû bûû, antû baayo bakaagwatwa nî ûguaa.

¹⁴Nkaathûûkangia Pathirosi, rûteere rwa bwa ûmotho rwa Misri, na mpîîthie ntûûra ya Zoani. Ngaacoka nkanûkie ntûûra ya Thebesi.

¹⁵Ncoke ntûrîkîrie giitiiro kîa Pelusiumu, kîrîa kîrî Misri mûthûûro jwaakwa. Nkaathiria ûtonga bwa ntûûra ya Thebesi.

¹⁶Ndaaîthia Misri ntûûra ya Pelusiumu îkeethîrwa îrî na rwakaî rûrûnene. Nacio nthingo cia Thebesi ikaamomorwa nî îkoondoria.

¹⁷Antû babeethî ba ntûûra ya Oni na ya Pibesethi bakooragwa na aka baikue kîthamîrioone.

¹⁸Tahafehenesi îkeethîrwa îrî muundu mûtheri, rîrîa nkaathiria nthîgûrû ya Misri, nthirie inya îrîa baikumagîria. Nayo Misri îgaakunîkwa na îtu, na antû ba ntûûra ciaayo baikue kîthamîrioone.

¹⁹Tontû bûû, ngaakanûkia Misri, nabo antû baayo bakaamenya ni nî ni MWATHANI.”

²⁰Kûrî ntukû ya mûgwanja, ya mweri jwa mbere, mwakeene jwa îkûmi na jûmwe tûrî kîthamîrioone, MWATHANI nî aambarîîrie. Arambîîra atîrî,

²¹“Mûtaana wa muntû, nî mbunîte njara ya Farao mûnene wa Misri. Nayo îtîoogi ûrîa yûmbîkia kwora nîûntû îoogi na mûtaame, ûrîa îtîûmba kûgwata rûchiû kaîrî.

²²Tontû bûû, ngaakanûkia Farao mûnene wa Misri. Nkaamuuna njara cio-ijîîrî, îrîa yûûmbaga kûrita ngûgî bwega na îrîa îtîûmbaga kûrita ngûgî bwega. Naru rûchiû rûgwe kuuma njareene yaawe.

²³Nkaanyagania Amisri kîrî mîgongo, mbaikie nthîgûrûûne cionthe.

²⁴Ncoke mbîkîre njara cia mûnene wa Babiloni inya, na mûnenkere rûchiû rwaakwa. Îndî Farao nkaamuuna njara aikaîre mbere ya mûnene ûu ta muntû ûringi îringa rîa gîkuû.

²⁵Ngeekîra njara cia mûnene wa Babiloni inya, îndî cia Farao ikagogoa. Ndaanenkera mûnene wa Babiloni rûchiû na arwerekeria bwa nthîgûrû ya Misri nîrîo bakaamenya ni nî ni MWATHANI.

²⁶Nkaanyagania Amisri kîrî mîgongo, mbaikie nthîgûrûûne cionthe. Rîu nîrîo bakaamenya atî ni nî ni MWATHANI.”