Read KIMERU BIBLE PROTESTANT EDITION Ezek 31 Bible Online

Ezek 31 - KIMERU BIBLE PROTESTANT EDITION bible

Ezek 31

¹Kûrî ntukû ya mbere ya mweri jwa îthatû, mwakeene jwa îkûmi na jûmwe tûrî kîthamîrioone, MWATHANI nî aambarîîrie ni Ezekieli, arambîîra atîrî,

²“Mûtaana wa muntû, ûûria Farao mûnene wa Misri na antû baawe ûjû: Nûû ûngî ûrî inya taabuî?

³Atîrî, ka mbûng'uanithanie na mûtarakwa jwa Lebanoni taju Asîria. Ju jûrî mpang'i inthongi na nî jûmûraaja mwitûûne nkûrûki ya mîtî îngî.

⁴Rûûjî nî rûtûmaga jûkariiba. Ndûûjî irîa ciîtagîîra rungu rwa nthî igatûma jûgakûra na jûkareea. Jûgatûma ndûûjî ikauma arîa jwaandi igakundia mîtî îngî yonthe.

⁵“Tontû bûû, mûtarakwa jûu, jûranenea na jûrareera mîtî îngî. Nacio mpang'i ciaaju irareea mono nîûntû bwa rûûjî rwa kûng'ana.

⁶Nyoni cionthe iraaka itara mpang'iine, nacio nyamû cionthe cia kîthaka iraciarîra bianaana mûng'unyeene jwaaju. Ningî mîgongo yonthe ya nthîgûrû îrîa îrî îgweta îkanogoka mûng'unyeene jûu.

⁷Naju nî jwaathongi mono, na nî jwaanenei mono na mpang'i ciaaju ciaarî indaaja. Nayo mîri yaaju nî yeenamîte mwanka kûrîa kûrî rûûjî.

⁸ Kinya mîtarakwa îrîa îrî muundeene jwa MWATHANI îtaang'aneene naju, kana kinya mîthithinda îng'anana na mpang'i ciaaju. Mîbaaû maguta yaarî gîntû gûtîkîo yang'ananua na mpang'i ciaaju. Gûtî mûtî noo jûmwe muundeene jwa MWATHANI jwaarî na ûthongi ta bwaaju.

⁹“Nî ni ndaajûthithîrie jûrathongoma mono nîûntû bwa mpang'i ciaaju. Mîtî yonthe ya Edeni taju muunda jwa Mûrungu nîka yaairîragîîria gûkara taju.

¹⁰“Tontû bûû, MWATHANI Mûrungu arambîîra atîrî, nîkwîthîrwa mûtî jûu nî jûmûraaja nkûrûki ya mîtî îngî, mwanka kathûmbî kaaju gaakinya matuune, nî jwambîrîrie gwikumia.

¹¹Ûûni nkûjûrega na nkaajûnenkanîra kîrî mûnene kuuma kûngî nîkenda ajûkanûkia kûringana na ûthûûku bwaaju.

¹²Antû barîa bathûûku buru ba kuuma nthîgûrû ingî bakajûrîîka na bajûtige nau. Nacio mpang'i ciaaju îkagwa irîmeene na mîguuruune yonthe, na ciunîkangîre mîuroone yonthe. Nabo antû ba nthîgûrû yonthe bakauma mûng'unyeene jwaaju baciîtîre.

¹³Nacio nyoni cionthe na nyamû cia kîthaka cionthe igaakara kîrî ju jûthûûkaangîtue o ûu.

¹⁴Mantû jau jagaakarîka nîkenda gûtîîthîrwa kûrî na mûtî jûngî kinya jwëethîrwa jûrî rûûjîîne rûng'ana jûbuîrîte kûreea jûkinya matuune. Kwîthîrwe gûtî mûtî jûngî jûnyunyaga rûûjî jûûmba kûnenea mûthemba ta jûu. Nîkwîthîrwa mîtî yonthe no mwanka yuume îrî gûkû nthîgûrû kûrîa antû barîa bakuujaga batûûraga.”

¹⁵Ningî MWATHANI Mûrungu ariuga ûjû, “Rîrîa mûtî jûu jûgeeta kûrîa akuû batûûraga, jûkarigîîria ndûûjî irîa ciumaga nthîgûrû itige kwînama. Ningî ngatûma Lebanoni iithikîîre nîûntû bwaaju. Nayo mîtî yonthe ikaanyaara.

¹⁶Ngaatûma mîgongo iinaine nîûntû bwa kûgwa kûrîa jûkaagwa, rîrîa nkaajûgwîthia gwa akuû. Mîtî yonthe ya Edeni na mîtî îrîa mîthongi yonthe ya Lebanoni îrîa yonthe yaagîte rûûjî nîûntû bwaaju îkaagwîrua yoona jwagwa.

¹⁷Bageetania naju gwa akuû bairiinganîîre na barîa booragîîrwe ndweene. Gûtî nkaanja kinya barîa ba kuuma mîgongo îngî baatûûraga mûgunyeene jwaaju bakaathira.”

¹⁸MWATHANI Mûrungu arauga atîrî, “Mûtî jûu nî Farao mûnene wa Misri amwe na antû baawe bonthe. Kinya mîtî ya Edeni îtaarî îmîraaja na îmîthongi tawe. Îndî nandî mûtî jûu jûgeeta gwa akuû amwe na mîtî îngî ya Edeni, jwîkwe amwe na barîa batiijî Mûrungu na barîa booragîîrwe ndweene.”