Read KIMERU BIBLE PROTESTANT EDITION Ezek 32 Bible Online

Ezek 32 - KIMERU BIBLE PROTESTANT EDITION bible

Ezek 32

¹Kûrî ntukû ya mbere ya mweri jwa îkûmi na îîrî mwakeene jwa îkûmi na îîrî tûrî kîthamîrioone, MWATHANI nî aambarîîrie ni Ezekieli, arambîîra atîrî,

²“Mûtaana wa muntû rîra kîrîro gîkînene nîûntû bwa Farao mûnene wa Misri, ûmwîre ûjû: Ûthûgaanagia gwe ûrî ngatûnyi kîrî mîgongo, îndî gwe ûkari ta nkûnga îrieene. Rîrîa ûkûthaambîra mîuroone yaaku nîka ûkunagia rûûjî ûkarûthûûkia buru.”

³MWATHANI Mûrungu ariuga ûjû, “Ngaakûgwatia na neeti amwe na kîrîndî kîngî gîkiingî mbûrite rûûjîîne.

⁴Ngaakûrita nkûgere nthîgûrû înjûmo ntûme nyoni cionthe ikara kîrî gwe na nyamû cia kîthaka cionthe ikûrîe.

⁵Nkaanyagia nyama ciaaku irîmeene mbûjûrie mîguuru na nyama cia kiimba gîaaku.

⁶Ngaatûûra tharike yaaku nthî mbûjûrie mîguuru na tharike yaaku.

⁷ Rîrîa ngaakûrita o nkaathika îgûrû. Ngaatûma muundu jûkunîke njota na îtu rîkunîke riûa, nabu weeru bwa mweri bûtîonekana kaîrî.

⁸Ngaatûma weerû bwa îgûrû bunthe bûtige kûthaara, nthîgûrû yeenu yonthe îkunîkwe nî muundu. Ûu nîu ûûni MWATHANI Mûrungu nkuuga.

⁹“Ningî ngeekîra nkoro cia antû babaingî kîmako rîrîa nkeerana nteto cia kûthirua gwaaku kîrî nthîgûrû irîa itaaigua nteto iu.

¹⁰Antû ba mîgongo îmiingî bakaarigara mono nî mantû jarîa ngaakûthithîria, na kinya anene baacio bagaateetema nî ûguaa rîrîa ngaakûûra rûchiû nîûntû bwaaku mbere yaao. Nabo bagaakara bakiinainaga îgiita rîonthe ntukû îîu ûkaathirua, o muntû akiimakagîra.”

¹¹Ningî MWATHANI Mûrungu arîîra mûnene wa Misri atîrî, “Mûnene wa Babiloni agaakwithûkîra ndweene.

¹²Nkaarekeeria antû baaku babaingî booragîrwe ndweene nî asikarî batî kîaao buru ba mîgongo. Nabo antû ba Misri bakooragwa babaingî mono, na rwikumio rwaayo rûthirue.

¹³Nkooragîra nyomoo cia Misri cionthe kûrîa inyunyagîra rûûjî. Kuuma rîu gûtî muntû kana nyomoo îgaakunia rûûjî.

¹⁴Rîu ngatûma ndûûjî ciaao ikembûke, na mîuro înyûûrûrûke ta maguta, Ûu nîu ûûni MWATHANI Mûrungu nkuuga.

¹⁵Rîrîa nkaathûûkangia nthîgûrû ya Misri, na nthirie bionthe birîa bitûûraga ku, ningî mbûrage barîa bonthe batûûraga ku, nîrîo bakaamenya atî ûûni nî ni MWATHANI.

¹⁶Kîrîro kîu gîkainagwa nî aka ba mîgongo, bakîrîrîra Misri na antû baayo bonthe. Ûu nîu ûûni MWATHANI Mûrungu nkuuga.”

¹⁷Kûrî ntukû ya îkûmi na ithaano ya mweri jwa mbere mwakeene jwa îkûmi na îîrî tûrî kîthamîrioone, MWATHANI nî aambarîîrie, arambîîra atîrî,

¹⁸“Mûtaana wa muntû, rîra nîûntû bwa antû ba Misri nîkwîthîrwa îgiita rîaao rîa gwîta kûrîa akuû barî na kûrîa antû ba mîgongo barîa baakwîre barî rîgûkinya.

¹⁹Boorie atîrî, ‘Nîka bûkûthûgaania bûrî babathongi nkûrûki ya antû bangî? Bamenyithie atî beetîte kûrîa akuû barî na kûrîa barîa batiijî Mûrungu barî.

²⁰Bakooragwa beete kûrîa antû barîa booragîîrwe ndweene barî. Kinya antû baayo bakooragwa bonthe.’

²¹Nchamba cia ndwaa amwe na barîa babateethagia gûkamata mathaga bakaaria mantû barî gwa akuû bauge ûjû, ‘Bûkwînama bweeja gûkara amwe na barîa batîîtîkîtie Mûrungu, na barîa booragîîrwe ndweene.’

²²“Asîria îrî gûkû amwe na njûûrî yaayo yonthe. Ningî nî îthiûrûkîri nî mbîrîra cia antû baayo barîa booragîrwe, bonthe booragîîrwe ndweene.

²³Mbîrîra ciaao irî ndeene mono nthîgûrûûne gwa akuû. Njûûrî ciaayo cionthe cioragîîrwe ndweene, na nandî mbîrîra ciaacio nî imîthiûrûkîrîte. Îndî bo kûrî îgiita beekîrîte nthîgûrû ûguaa mono.

²⁴“Kinya Elamu îrî gûntû kûu o amwe na antû baayo bonthe. Nayo îthiûrûkîri nî mbîrîra cia barîa bonthe booragîîrwe ndweene. Nabo baakuîre batîîtîkîtie Mûrungu, bareeta kûrîa akuû batwîre, kinya këethîra kûrî îgiita beekîrîte nthîgûrû ûguaa mono. Îndî nandî beekîrithîtue nthao bakara o ûmwe na barîa barî gwa akuû.

²⁵Nayo îrî amwe na barîa booragîîrwe ndweene. Nacio mbîrîra cia njûûrî ciaayo nîka imîthiûrûkîrîte. Bonthe nî booragîrwe na batîîtîkîtie Mûrungu. Kinya këethîra kûrî îgiita beekîrîte nthîgûrû ûguaa, îndî nandî beekîrithîtue nthao bagakara o ûmwe na barîa barî gwa akuû.

²⁶“Mesheki na Tubali irî gwa akuû, amwe na antû baacio bonthe. Nacio mbîrîra cia njûûrî ciaacio nîka icithiûrûkîrîte. Bonthe booragîîrwe ndweene batîîtîkîtie Mûrungu Nabo kûrî îgiita beekîrîte nthîgûrû ûguaa.

²⁷Nabo bataathikîrwe na njîra ya gîtîîo, ta ûrîa nchamba cia karaaja ciaathikagwa nchiû ciaao irî rungu rwa mîtwe yaao na rong'o ciaao ibakunîkîrîte. Kûrî îgiita nchamba iu cieekîrîte nthîgûrû ûguaa.

²⁸“Ûu nîu Misri îkaathirua îkarage amwe na barîa batîîtîkîtie Mûrungu barîa booragîîrwe ndweene.

²⁹“Edomu na anene baayo na atongeeria baayo bonthe barî gwa akuû. Kinya këethîra baarî nchamba inene cia ndwaa nî booragîîrwe ndweene na nandî barî amwe na barîa booragîîrwe ndweene batîîtîkîtie Mûrungu.

³⁰“Nabo atongeeria bonthe ba bwa ûrîo barî o kûu gwa akuû. Kinya Asidoni bonthe barî ku. Nabo kûrî îgiita beekîrîte nthîgûrû ûguaa mono. Îndî nandî boojûri nî nthao barî gwa akuû amwe na barîa booragîrwe batîîtîkîtie Mûrungu. Nabo bariigua nthao amwe na barîa barî gwa akuû.

³¹“Farao aboona akaborera nîûntû bwa antû baawe babaingî na njûûrî yaawe yonthe îrîa yooragîîrwe ndweene. Ûu nîu ûûni MWATHANI Mûrungu nkuuga.

³²Kinya këethîra nî ndeetîkîîrîtie Farao eekîra nthîgûrû ûguaa, we amwe na njûûrî yaawe yonthe bakooragwa, beete bagakare gwa akuû amwe na barîa booragîrwe batîîtîkîtie Mûrungu. Ûu nîu ni MWATHANI Mûrungu ndauga.”