Read KIMERU BIBLE PROTESTANT EDITION Ezek 33 Bible Online

Ezek 33 - KIMERU BIBLE PROTESTANT EDITION bible

Ezek 33

¹MWATHANI nî aambarîîrie ni Ezekieli arambîîra atîrî,

²“Mûtaana wa muntû, arîria antû beenu. Nabo ûbeere atî ûjû nîu gûgaakara ndareeta ndwaa nthîgûrûûne. Antû ba gûntû kûu bakaathuura ûmwe waao bamweethie mûkaria waao.

³Rîrîa akoona anthû beejîte kwithûkîra nthîgûrû, akaaringa tarumbeta ya kwîra antû baao kûrî na ûgwati.

⁴Muntû noo ûrîkû akëeja kwigua tarumbeta îu na akarega gûtindanîra na mantû jau, nabo anthû bakeeja bakamûûraga, muntû ûu nîwe ûkaarîua tharike yaawe wengwa.

⁵Nîkwîthîrwa we nî aigîrue tarumbeta na ataatindanîra na mantû jau, nîwe ûkaarîua tharike yaawe wengwa. Tontû arîngîthikîîra na akaithara arîngî teetha.

⁶Îndî mûkaria aköona anthû beejîte kwithûka, nawe akarega kûringa tarumbeta ya kwonia antû kûrî na ûgwati nabo anthû bakëeja bakooraga muntû kinya ûmwe, muntû ûu akooragwa arî meeyiene. Nî mûkaria ûkaarîua tharike ya muntû ûu.

⁷“Tontû bûû, rî, mûtaana wa muntû, ngûkwethia mûkaria wa antû ba Israeli. Rîrîa ngaakwaragîria no mwanka ûbamenyithie kûrî na ûgwaati.

⁸Nkëeja kwîra muntû ûmûûî agaakua, naagwe ûkärega kûmwîra airira ûthûûku bwaawe, muntû ûu mûûî agaakua arî na meeyia jaawe. Îndî nîgwe nkaarîyia tharike yaawe.

⁹Îndî ûkëeja kûmwîra atigane na ûthûûku bwaawe, akärega gûtiga, agaakua arî meeyiene. Îndî ûkeethîrwa ûgûcionokia.”

¹⁰MWATHANI nî aambarîîrie ni Ezekieli arambîîra atîrî, “Mûtaana wa muntû, cokeera nteto irîa antû ba Israeli bakwaria bakiuga atîrî, ‘Tuî tûrî na meeyia na maatia na nîka jagûtûthiria. Nîatîa tûkaathithia nîkenda tûtûûra mwoyo?’

¹¹Beere atîrî, ûntû ngaatûûra mwoyo ûûni MWATHANI Mûrungu, ntîgwîrîrua mwîyia agîkua. Îndî kîrîa kîngwîragia nî kwona mwîyia akiirira, na agatigana na meeyia jaawe na agatûûra. Tontû bûû, rî, kîrîa kîgaatûma bûkua antû ba Israeli nîkî?

¹²“Ningî rî, mûtaana wa muntû, îîra antû beenu atî waagîru bwa muntû ûmwagîru bûtîûmba kûmûteethia akëeja kwîyia. Muntû ûrîa ûthithagia mantû jamathûûku akëeja gûtiga kûjathithia na akairira, meeyia jarîa arathithîtie au mbereene jatîririkanwa. Muntû ûrîa mwagîru akëeja kwîyia, atîûmba gûteethua nî waagîru bûrîa aarî nabu mbere ya athithia meeyia.

¹³Kinya nkëera muntû ûmwagîru atî nî mma agaatûûra mwoyo, îndî akoona waagîru bûu bwaawe bûng'ani na akathithia meeyia, gûtî mantû jaameega jarîa aathithîrie jakaririkanwa. Îndî agaakua nîûntû bwa meeyia jau athithia.

¹⁴Îndî kinya nkëeja kwîra mwîyia atî no mwanka akue, nawe akairira meeyia jaawe, akaambîrîîria kûthithia mantû jarîa jaagîrîte na ja mma;

¹⁵na agacokia into birîa eekîte wîrane akaarita na agacokia birîa aiyîte na muntû ûu akeeja kwambîrîîria kûthingata mataaro jarîa jaeejanaga mwoyo, na akarega gûcoka kûthithia meeyia, nî mma muntû ûu atîkua agatûûra mwoyo.

¹⁶Gûtî meeyia ja jarîa athithîtie jakaririkanwa rîrîa akaathithia mantû jarîa jaagîrîte na ja mma. Nî mma agatûûra mwoyo.

¹⁷Amwe na bûu, antû beenu baugaga atî, ‘Mantû jarîa MWATHANI athithagia tî ja îota,’ îndî batîkûmenya atî mantû jarîa bathithagia nîjo jatî ja mma.

¹⁸Rîrîa muntû ûmwagîru akaagarûka atigane na waagîru bwaawe ambîrîîrie kûthithia meeyia, muntû ûu agaakua nîûntû bwa meeyia jau.

¹⁹Ningî rîrîa muntû ûmûûî agaatigana na wûûî bwaawe ambîrîîrie kûthithia mantû jarîa jaagîrîte na ja mma, muntû ûu agatûûra mwoyo, nîûntû bwa mantû jau.

²⁰Îndî buî antû ba Israeli buugaga atî, ‘Mantû jarîa MWATHANI athithagia tî ja îota.’ Nkaabûgiitîra îgamba o muntû kûringana na mîîtîre yaawe.”

²¹ Kûrî ntukû ya ithaano ya mweri jwa îkûmi, mwakeene jwa îkûmi na îîrî kuuma tûgwikua kîthamîrioone, muntû ûmwe nî aamatûkîre kuuma Jerusalemu areeja kîrî ni arambîîra atî ntûûra ya Jerusalemu nî îthirîtie gûtawa.

²²MWATHANI nî aarî amwe naani ûgoroone bwa ntukû îîu muntû ûu waamatûkîre kuuma Jerusalemu eejîre kîrî ni. MWATHANI nî aarî agûtûma ndaambîrîrîa kwaria kinya mbere ya muntû ûu akînya kîrî ni rûkîîrî. Tontû bûû, nî ndoombaga kwaria na ntaarî maamu kaîrî.

²³MWATHANI nî aambarîîrie arambîîra atîrî,

²⁴“Mûtaana wa muntû, antû barîa batwîre ntûûreene cia Israeli irîa cieetheetue maganjo bakaraga bakiugaga ûjû: ‘Abrahamu aarî muntû ûmwe wenka, îndî nî aaerwe nthîgûrû yonthe îraa yaawe. Tuî tûrî antû babaingî. Tontû bûû, no mwanka twîthîrwe tweei nthîgûrû yaa yeetû.’

²⁵Tontû bûû, beere atîrî, Ûûni MWATHANI Mûrungu ndiuga ûjû: buî bûrîîjaga nyama irî na tharike, bûkathaathayia mîrungu ya mîng'uanano, na bûkooragana. Nîka îndî bûkûthûgaania nthîgûrû îkaa yeenu?

²⁶Buî no nchiû cieenu bûtumagîra kûûragana. Ningî bwinthe nî bûthûngagîîra na aka ba antû bangî. Nîkî îndî ûntû bûkûthûgaania nthîgûrû îkaa yeenu?

²⁷“Beere ûûni MWATHANI Mûrungu ndiuga ûjû: O ta ûrîa ntwîre mwoyo, gankuuga na mma atî antû barîa batwîre maganjoone ja ntûûra, bakooragîrwa nao. Nabo barîa batwîre bûûrîîne nkaabanenkanîra kîrî nyamû cia kîthaka barîîwe. Nabo barîa barî biitiiroone birîa birikîîtue na barîa barî ikurunguune bakooragîrwa ku nî mîrimo.

²⁸Naani ngatûma nthîgûrû yaa maganjo gûntû gûtîtûûri. Nayo inya îrîa baikumagîria îkaathira. Irîma bia Israeli bikaa maganjo mwanka kwage antû ba gwîtagîîra ku.

²⁹Rîu nîrîo bakaamenya atî ni nî ni MWATHANI, rîrîa nkaathûkangia nthîgûrû yee îgaanjo nîûntû bwa mantû jamathûûku jarîa antû bathithîtie.”

³⁰“Mûtaana wa muntû, antû beenu nî bagûtirimana nthingoone na mîariine ya nyomba ciaao bakîaragia mantû jakwegiî. Nabo bariuga atîrî, ‘Njûûni bwigue rûteto rûrîa ruumîte kîrî MWATHANI.’

³¹Nabo beejaga kîrî gwe o ta ûrîa antû babuîrîte kwîja, na bagakara nthî mbere yaaku o ûrîa antû baakwa bathithagia, bakathikîîra ûrîa ûkuuga. Îndî batîthithagia ûu ûbeeraga. Nabo boonanagia wendo rwarieene rwaao akî, îndî nkoro ciaao ikîthûgaanagia ûrîa bakagunîka.

³²Kîrî bo gwe ûkari tu ta mwini ûkwina ndwîmbo cia wendo na kajû gakathongi na ûkwina bwega na wandîîndî. Bo bakûthikagîîra akî, îndî batîthithagia ûrîa ûkuuga.

³³Rîrîa mantû jau jagaakarîka, na no mwanka jakarîke, nîrîo bakaamenya kûrî kîroria gîtûûraga gatîgatîîne kaao.”