Read KIMERU BIBLE PROTESTANT EDITION Ezek 34 Bible Online

Ezek 34 - KIMERU BIBLE PROTESTANT EDITION bible

Ezek 34

¹MWATHANI nî aambarîîrie ni Ezekieli arambîîra atîrî,

²“Mûtaana wa muntû, roria ûkîreganaga na arîîthi ba Israeli. Barorerie ûbeere atîrî, MWATHANI Mûrungu ariuga ûjû: Ûûi kîrî buî arîîthi ba Israeli, buî bwireraga bwingwa antû a bûrera ng'ondu.

³Bûnyunyaga îria rîaacio, bûgaikunîkîra na nguû ithithîtue na guee yaacio, na bûkathînja irîa noru, îndî bûtîcireraga.

⁴Buî bûtîmenyagîîra irîa itî na inya, na irîa ciajîtue bûtîcieejaga mîtheega, na irîa ciunîkangi magûrû bûtîciogaga. Ningî batîcwaga irîa ciûrîte, kana bûcokanîîria irîa ciaatîtie njîra. Îndî buî bwirîîthagia na nchûgûma bûng'eenti.

⁵ Nacio ng'ondu inyaganîte nîûntû bwa kwaga mûrîîthi, nacio nî cieete biakûrîa bia nyamû cia kîthaka.

⁶Ng'ondu ciaakwa cianyaganîte irîmeene bionthe na ngîrîîne cionthe. Ng'ondu ciaakwa cianyaganîtue nthîgûrûûne kunthe, itî na muntû wa gûcicwaa.

⁷“Tontû bûû, buî arîîthi thikîîreeni bwigue ûrîa ûûni MWATHANI nkuuga:

⁸Ga ngûciîtia ni MWATHANI Mûrungu ûrîa ûtwîre mwoyo, nkauga atî ng'ondu ciaakwa nî cieete biakûrîa bia nyamû cia kîthaka, nîûntû bwa kwaga mûrîîthi, na nîûntû inyaganîte itîkwona wa gûcicwaa. Arîîthi batîrîîthagia ng'ondu ciaakwa îndî baimathagîra bongwa.

⁹Tontû bûû, buî arîîthi, MWATHANI ariuga ûjû:

¹⁰Ndîkwaa mûnthû weenu. Nkaarita ng'ondu ûrîîthine bweenu, nîkenda bûtiirîîthia kaîrî. Ntîrekeeria bwirîîthagia bwingwa kaîrî. Ngaatunyûkia ng'ondu ciaakwa kuuma kîrî arîîthi itige kwaa biakûrîa biaao.”

¹¹MWATHANI Mûrungu ariuga ûjû, “Ni ningwa nî ni ngaacwaa ng'ondu ciaakwa mwanka ncione. Naani nkaimenyeera.

¹²Ngaacwaa ng'ondu ciaakwa o ta ûrîa mûrîîthi acwaga ng'ondu imwe ciaawe irîa inyaganîtue. Ningî ngaitunyûkia ciume gûntû kunthe kûrîa inyaganîtue. Ntukû îrîa nkaathithia ûu îkeethîrwa îrî na matu na muundu jûmûnene.

¹³Nkarita ng'ondu iu kuuma nthîgûrû cia antû bangî, nciûthûranie kuuma mîgongoone îngî, nciikie nthîgûrûûne yaacio ya Israeli. Ningî nkaairîîthia irîmeene bia Israeli, nteere cia tûthima, na kûrîa kunthe gûtîtûûri nî antû.

¹⁴Nkaairîîthagie gûntû kûrîa kûrî nyaki înjega, ndiirîîthagie irîmeene bia Israeli na mîgwanthîîne kûrîa kûrî gûntû gûkwega gwa kûrîîthia na kûrîa ikaanogokaga.

¹⁵Ûûni ningwa nî ni nkethagîrwa ndî mûrîîthi wa ng'ondu ciaakwa. Ngaacionia kûrîa ikaanogokaga. Ûu nîu ûûni MWATHANI Mûrungu nkuuga.

¹⁶“Ngaacwaa ng'ondu irîa ciûrîte na ncokanîîrie irîa inyaganîte, na mpoge irîa ciunîkangi, na mbîkîre irîa cionji inya. Ningî nkaamenyeera irîa noru na irî na inya, nîûntû nkairîîthia na îota.

¹⁷“Naabuî ng'ondu ciaakwa rî, ûûni MWATHANI Mûrungu ndîbwîra ûjû, nkaabûgambîra, mbathûrane ng'ondu irîa njega kuuma kîrî irîa nthûûku, na mbathûrane ntûrûme na nthenge.

¹⁸Ka bûtîkûng'anîrwa kûrîa nyaki înjega ûntû bûgwîta bûkîmîkinyangaga? Ka-bûtîkûng'anîrwa nî kûnyua rûûjî rûkembûku ûntû bûgûkunia rûûjî runthe?

¹⁹Nîka ng'ondu ciaakwa ingî igaatua kurîîjaga nyaki îrîa îkinyangi na magûrû jeenu na kûnyunyaga rûûjî rûrîa bûkunîtie na magûrû?

²⁰“Tontû bûû, ûûni MWATHANI Mûrungu ndîîra ng'ondu ûjû: Atîrî, nî ni ningwa nkaagambîra ng'ondu mbathûrane irîa noru na irîa nceng'u.

²¹Nîkwîthîrwa ng'ondu imwe itûngaga irîa itî na inya igaciîngîîria kîthakeene.

²²Ûûni ngaatunyûkia ng'ondu ciaakwa itige kûrîîwa nî nyamû cia kîthaka. Nkagambîra ng'ondu na mbathûrane irîa njega kuuma kîrî irîa nthûûku.

²³Ningî ikeethîrwa irî na mûrîîthi ûmwe akî, ta nthûûmba yaakwa Daudi, ûrîa ûkaimathagîra. Nîwe ûkethagîrwa arî mûrîîthi waacio.

²⁴Naani ni MWATHANI Mûrungu nî ni nkaa Mûrungu waacio na mûnene ûkari ta nthûûmba yaakwa Daudi nîwe ûkaa mûnene waacio. Ûu nîu ûûni MWATHANI nkuuga.

²⁵Ngeekanîîra nabo kîrîkanîro kîa thîîrî, na ndigîîrie nyamû imbîî itîgeete nthîgûrûûne yaacio, nîkenda itûûraga kiindajî, kûu bieeniine na ithakeene gûtî na ûgwati.

²⁶“Naani ngaacitharima na ntharime gûntû kûrîa kûthiûrûkîrîte kîrîma gîaakwa kîrîa kîtheru. Naani nkaurithia ngai rîrîa rîagîrîte.

²⁷Nayo mîtî îgaatua gûciaraga matuunda, na nthîgûrû îkauma imera. Nabo antû bagaakara kindaajî nthîgûrûûne yaao. Nabo bakaamenya atî ni nî ni MWATHANI, rîrîa nkaabarita gîchooki kîa barîa babaeethetie nkombo.

²⁸Nabo batîkorotawa kaîrî nî mîgongo îngî, kana nyamû cia kîthaka ibarîa. Nabo bagaatûûra kiindajî, na gûtî we ûkaabeekîra ûguaa.

²⁹Ningî ngatûma miuunda yaao înora na bathirîrwa nî mpara. Antû ba mîgongo îngî batîbameneeria kaîrî.

³⁰Nabo bakaamenya atî ni nî ni MWATHANI Mûrungu waao, na atî nî ni mbakaragia, nîûntû nî antû baakwa. Ûu nîu ni nkuuga.

³¹“Bûî bûrî ng'ondu ciaakwa, bûrî ng'ondu cia ndîîthia yaakwa. Ni nî ni Mûrungu weenu. Ûu nîu ndauga ûûni MWATHANI Mûrungu.”