Read KIMERU BIBLE PROTESTANT EDITION Ezek 36 Bible Online

Ezek 36 - KIMERU BIBLE PROTESTANT EDITION bible

Ezek 36

¹“Mûtaana wa muntû, roreria irîma bia Israeli ûbiîre bithikîîre ûrîa ni MWATHANI nkûbiîra.

²Ûûni MWATHANI Mûrungu ndîbiîra atîrî: anthû ba Israeli nî baabithekeere bakiugaga atîrî, ‘Irîma biu bia ntwîre nî bieetû.’

³Tontû bûû, birorerie ûbiîre ûûni MWATHANI Mûrungu ndiuga uju: nîûntû anthû bainyîrîîrie Israeli kuuma nteere cionthe baramîeethia îgaanjo mwanka îratawa nî mîgongo îngî na îratua kûmenagîîrua nî antû.

⁴Tontû bûû, igueeni ûrîa ni MWATHANI Mûrungu nkuuga: buî irîma bia Israeli, na ngîrî, na mîguuru, na ntûûra irîa bwerûkîîre ciaatigwa maganjo, na irîa itaîtwe nî mîgongo îngî na kûthûûmbua.

⁵Nîkîo gîtûmi ûûni MWATHANI Mûrungu nkuuga ndîaria na mûthûûro nîûntû bwa mîgongo îîu îngî, na nîûntû bwa nthîgûrû ya Edomu, bonthe barîa baacieere nthîgûrû yaakwa bagwîrîtue îraa kiigai kîaao, na barataa into.

⁶“Tontû bûû, roreria nthîgûrû ya Israeli wîre Irîma biaayo na tûrîma twaayo na mîguuru yaayo, ûûni MWATHANI Mûrungu ndiuga ûjû, ûûni gankwaria nthûûri na ndî na rûriitho nîûntû bwa ûrîa bûmeneeretue nî mîgongo.

⁷Naani ni MWATHANI Mûrungu gangûciîtia nkauga no mwanka mîgongo îrîa îbûthiûrûkîrîte îkanûkue.

⁸Îndî irîmeene bia Israeli mîtî îkaariiba îciare matuunda ja kûrîîwa nî antû baakwa Israeli nîûntû bagaacoka nthîgûrû yaao îgiita rîtî kûraaja.

⁹Atîrî, ûûni ndî rûteereene rweenu. No mwanka mbone miuunda yeenu îkûrîmwa na yaandwa.

¹⁰Ningî nkaingîyia antû Israeli kunthe, ntûûra cieenu ciûjûre antû na maganjo jaakwe kaîrî.

¹¹Naani nkaaingîyia antû beenu amwe na nyomoo, ciingîe na ithegee. Ngaatûma gûntû gûkû gûtûûrwa o ta ûrîa gwatûûri mbereene. Ngaatûma bûthinyaare nkûrûki ya ûrîa bwakari mbereene. Rîu nîrîo bûkaamenya atî ni nî ni MWATHANI.

¹²Îî, ngaacokia antû baakwa Israeli, nthîgûrûûne yaao, bamîjûkie yee yaao. Naagwe nthîgûrû ûkáarekeeria antû ba Israeli bakua kaîrî nî kwaga irio.

¹³“MWATHANI Mûrungu ariuga atîrî, Antû baugaga nthîgûrû nîka îthiragia antû na îkathirîria mûgongo aana.

¹⁴Tontû bûû, rî, gwe nthîgûrû ûtîthiria antû kaîrî kana ûthirîria mûgongo aana kaîrî. Ûu nîu ûûni MWATHANI Mûrungu nkuuga.

¹⁵Nthîgûrû îtiigua kaîrî antû ba mîgongo bakîmîkurunga kana kûmîmeneeria. Ningî îtîthirîria mûgongo jwa Israeli aana kaîrî. Ûu nîu ûûni MWATHANI Mûrungu nkuuga.”

¹⁶MWATHANI nî aambarîîrie arambîîra atîrî,

¹⁷“Mûtaana wa muntû, rîrîa Aisraeli baatûûraga nthîgûrûûne yaao, nî beekagîra nthîgûrû mûgiro, na mathithio jaao, na mîîtîre yaao. Mîîtîre yaao yaakaraga ta mûka ûkwona mweri.

¹⁸Tontû bûû, nî ndaabatûrîkîîrie mûthûûro nîûntû bwa ûrîa booraganîte, na nîûntû bwa ûrîa baathaathagia mîrungu ya mîng'uanano beekîra nthîgûrû mûgiro.

¹⁹Naani ndîrabagiitîra îgamba, kûringana na mîîtîre yaao na mathithio jaao, ndîrabanyagania kîrî mîgongo îngî.

²⁰Îndî kunthe kûrîa beethagîrwa barî, nî beekîrithagia riîtwa rîaakwa rîrîtheru nthao. Antû ba gûntû kûu baugaga, ‘Baba no antû ba MWATHANI îndî bo nî beengîrwe nthîgûrûûne yaawe.’

²¹Ûntû bûu bûratûma nthûgaanîria mono riîtwa rîaakwa rîrîa rîtheru, rîrîa Aisraeli beekîrithîtie nthao gûntû kûrîa baarî.

²²“Tontû bûû, îîra antû ba Israeli, ûûni MWATHANI Mûrungu ndiuga ûjû: Ûntû bûrîa mbîtîte kûthithia, ntîthithia nîûntû bweenu. Îndî ndîbûthithia nîûntû bwa riîtwa rîaakwa rîrîtheru rîrîa bweekîrithîrie nthao kîrî mîgongo îrîa bûtwîre.

²³Naani nkoonania atî riîtwa rîaakwa nî rîrîtheru, rîrîa buî bûtûmîte rîamenwa kîrî mîgongo. Nayo mîgongo îîu îkaamenya atî ni nî ni MWATHANI. Nkaabûtumîra kwonia antû ba mîgongo îngî atî ûûni ndî ûmûtheru. Ûu nîu ûûni MWATHANI nkuuga.

²⁴Nkaabûrita nthîgûrûûne irîa bûrî, mbûcokanîîrie nthîgûrûûne yeenu yongwa.

²⁵Nkaabûminyîria rûûjî rûrwega naabuî bûkaathera na mûgiro jwa kûthaathayia mîrungu ya mîng'uanano jûthire.

²⁶ Nkaabwîkîra nkoro înjerû na Roho ûmwerû ndeene yeenu. Ncoke mbûrite nkoro irîa njûmo ta maiga, mbwîkîre nkoro imboro ta nyama.

²⁷Nkaabwîkîra Roho waakwa ndeene yeenu, ntûme bûthingata mataaro jaakwa na bwathîkîra Waatho bwaakwa.

²⁸Naabuî bûgaatûûra nthîgûrûûne îrîa ndaaere biûjûjû bieenu. Bûkaa antû baakwa, naani mpee Mûrungu weenu.

²⁹Naani nkaabwonokia kuuma kîrî bionthe birîa bibwîkagîra mûgiro. Ningî ngatûma maketha jaingîe nîkenda bûtîgîa mpara.

³⁰Nkaingîyia matuunda ja mîtî yeenu na maketha ja miuunda yeenu, mwanka kwîthîrwe gûtî na mpara ya kûbwîkîrithia nthao kîrî mîgongo îngî.

³¹Rîu nîrîo bûkaaririkana mîîtîre yeenu îmîthûûku na mathithio jeenu jamaaî jarîa bwaathithîrie. Naabuî bûkaimena nîûntû bwa meeyia na mantû jau bwaathithîrie.

³²Ntîthithia ûntû bûu nîûntû bweenu. Nî kaaba bûmenye ûu nîkenda bwigua nthao cia mathithio jeenu buî antû ba Israeli.”

³³MWATHANI Mûrungu arîbwîra atîrî, “Ntukû îrîa nkaabûtheria meeyia jeenu jonthe nîrîo ngatûma ntûûra cieenu itûûrwa nî antû na maganjoone gwaakwe kaîrî.

³⁴Nayo nthîgûrû îrîa îraarî kîthaka îkaarîmwa, antû a gûkara îrî kîthaka ûrîa îroonagwa nî barîa barakûrûkagîîra akuî.

³⁵Nabo boona ûrîa îgaakara, bakaugaga ûjû, ‘Nthîgûrû îîjî îraarî kîthaka îndî nandî îkari ta muunda jwa Edeni. Gûntû kwaayo kûrîa kwaarî maganjo nandî gûtûûri na kwairigîrwa.’

³⁶Nîrîo mîgongo îrîa îtigeere îbûthiûrûkîrîte îkaamenya atî ni MWATHANI nî ni mbakithîtie maganjoone na ndaarîmithia miuunda. Ûu nîu ni MWATHANI ndauga nkaathithia.”

³⁷MWATHANI Mûrungu ariuga atîrî, “Ngaatûma antû ba Israeli bambûûrie ûteethio, naani ngatûma baingîe na bathegee ta ng'ondu.

³⁸Ntûûra irîa cieete maganjo ikoojûra antû ta ûrîa ng'ondu cia igongwana ciûjûraga Jerusalemu îgiita rîa biatho. Rîu nîrîo bakaamenya ni nî ni MWATHANI.”