Read KIMERU BIBLE PROTESTANT EDITION Ezek 37 Bible Online

Ezek 37 - KIMERU BIBLE PROTESTANT EDITION bible

Ezek 37

¹MWATHANI nî aanjûkîrie ndeene ya Roho waawe, arambikia gatîgatî ga kîguuru. Nakîo nî kîojûri marûitû.

²Aratûma ndiûnga kîguuruune kîonthe. Nakîo kîguuru nî kîaarî na marûitû jamaingî mono. Atîrî, marûitû jau jaarî jamoomo mono.

³Arambûûria atîrî, “Mûtaana wa muntû, marûitû jaja joomba kûgîa mwoyo kaîrî?” Naani ndîramûcokeria, “MWATHANI Mûrungu nîgwe wenka akî ûûmba kûmenya ûntû bûu.”

⁴Ningî MWATHANI nî aambîrîre atîrî, “Roreria mîrûitû îîjî ûmîîre atîrî, buî marûitû jamoomo, thikîîreeni rûteto rwa MWATHANI.

⁵Jeere atîrî, ûûni MWATHANI Mûrungu nî nkûjeera ûjû: Nkaabwîkîra mîrukî ntûme bûgîe mwoyo kaîrî.

⁶Ningî nkaabwîkîra mîkiia na nyama na mbûkunîkîre na gîkonde. Nkaabwîkîra mîrukî, naabuî bûkaagîta mwoyo. Rîu bûkaamenya atî ni nî ni MWATHANI.”

⁷Tontû bûû, nî ndaarorerie o ûrîa ndeerîrwe. Naani nkîroragia o ûu, nî ndaaigîrue gîtuma. Atîrî, marûitû nîka jaringanaga jagîkandîkanaga kaîrî o kîrûitû kîrî kîrûitû.

⁸O ntegeete o ûu, marûitû jau jaragîa mîkiia na nyama, na gîkonde kîramîkunîka. Îndî îtaarî na mwoyo.

⁹MWATHANI arambîîra atîrî, “Mûtaana wa muntû roreria mîrukî ûmîîre ûjû: ‘MWATHANI Mûrungu nî agûkwîra gwe mîrukî uume nteere cio inya cia ruuo. Itû gwe mîrukî gîa kîrî baba booragi nîkenda bagîa mwoyo.’”

¹⁰ Tontû bûû, ndîraroria o ûrîa ndeeri. Nayo mîrukî îratonya kîrî mîîrî îîu, îragîa mwoyo na antû bararûngama na magûrû. Nayo îraa njûûrî înene mono.

¹¹Rîu MWATHANI arambîîra atîrî, “Mûtaana wa muntû, marûitû jaja jakari ta antû ba Israeli. Bo baugaga nî boomagarîre, na batî na wîrîgîîro bwa nyumeene na nî bathiri buru.

¹²Tontû bûû, barorerie ûbeere ûûni MWATHANI Mûrungu ndîbeera atîrî, ‘Nkaarugûra mbîrîra cieenu, mbûriûkie kuuma gîkuûne buî antû baakwa. Ncoke mbwikie nthîgûrûûne yeenu ya Israeli.

¹³Antû baakwa! Rîrîa nkarugûra mbîrîra cieenu mbûriûkie nîrîo bûkaamenya atî ni nî ni MWATHANI.

¹⁴Ngeekîra Roho waakwa ndeene yeenu naabuî bûgîe mwoyo. Ncoke mbwikie nthîgûrûûne yeenu bwingwa. Rîu nîrîo bûkaamenya ni nî ni MWATHANI, na nî ni mbugîîte nkaathithia ûntû bûu.’”

¹⁵MWATHANI aambarîîrie arambîîra atîrî,

¹⁶“Mûtaana wa muntû, jûkia rûturo ûrwaandîke nteto iji, ‘Ûnene bwa Juda.’ Ûcoke ûjûkie rûturo rûngî ûrwaandîke, ‘Ûnene bwa Israeli.’

¹⁷Ûjûkie nturo iu cio-ijîîrî wigwatithanie njareene ciaaku ciee rûturo rûmwe.

¹⁸Rîrîa antû beenu bagakûûria, gîtûmi gîa nteto iji nî kîrîku?

¹⁹Ûbeere MWATHANI Mûrungu ariuga ûjû: ndî akuî kûjûkia rûturo rûrîa rûrûngamîrîte antû ba Juda ndûgwatithanie na rûrîa rûrûngamîrîte antû ba Israeli. Ngaatûma nturo iu cio-ijîîrî ciaa rûturo rûmwe njareene ciaakwa.

²⁰“Ûgwate nturo cio-ijîîrî njareene ciaaku antû bategeete.

²¹Rîu ûbeere, ûûni MWATHANI Mûrungu ndiuga ûjû: nkaarita antû ba Israeli baume mîgongoone îrîa batwîre, mboothûranie kuuma nteere cionthe mbaikie nthîgûrûûne yaao bongwa.

²²Naani nkaabaeethia mûgongo jûmwe nthîgûrûûne na irîmeene bia Israeli bacoke beethîrwe barî na mûnene ûmwe wa kûbaathaga bonthe. Nabo batîkara barî mîgongo îîrî kaîrî kana beethîrwa bagaûkanîte baa moonene jaîrî.

²³Nabo batîciîkîra mûgiro kaîrî bakîthaathayia mîrungu ya mîng'uanano kana baithûûkia na mantû jarîa jatîagîrîte ja meeyia. Nkaaboonokia, baambîtîkie na mbatherie baee antû baakwa, naani mpee Mûrungu waao.

²⁴ Mûnene ûkari ta nthûûmba yaakwa Daudi nîwe ûkaa mûnene waao, nabo bonthe beethîrwe barî na mûrîîthi ûmwe. Bakaathingataga mataaro jaakwa na Waatho bwaakwa.

²⁵Nabo bagaatûûra nthîgûrû îrîa biûjûjû biaao biatûûraga, îrîa ndaaeete nthûûmba yaakwa Jakubu. Nabo amwe na aana baao, na aana ba aana baao bagaatûûra kûu magiita jonthe. Mûnene ûkari ta nthûûmba yaakwa Daudi akabaathaga kenya na kenya.

²⁶Naani ngeekanîîra nabo kîrîkanîro kîa thîîrî, nakîo gîkeethîrwa kîrî gîa gûtûûra. Nkaabatharima na mbathegeyie na ntûme kîûrû gîaakwa gîkaraga nthîgûrûûne yaao kenya na kenya.

²⁷ Gîtûûro gîaakwa gîkethagîrwa kîrî amwe nabo. Naani nkaa Mûrungu waao, nabo baee antû baakwa.

²⁸Nîrîo antû ba mîgongo îngî bakaamenya atî ûûni MWATHANI nî ni nthuurîte Israeli, rîrîa ngatûma kîûrû gîaakwa gîkare nthîgûrûûne yaao kenya na kenya.”