Read KIMERU BIBLE PROTESTANT EDITION Ezek 38 Bible Online

Ezek 38 - KIMERU BIBLE PROTESTANT EDITION bible

Ezek 38

¹MWATHANI nî aambarîîrie ni Ezekieli arambîîra atîrî,

² “Mûtaana wa muntû, îîra Gogi mûnene wa nthîgûrû ya Magogi nkaamûkanûkia. Ningî noo we mûtongeeria ûrîa mûnene wa Mesheki na Tubali.

³Mûrorerie ûmwîre atî ni MWATHANI Mûrungu ndiuga atîrî: ngakanûkia Gogi mûtongeeria ûrîa mûnene wa Mesheki na Tubali.

⁴Nkaabûgarûra mbûgwatie na ndwano nthea, mbûkuurie kurururu amwe na njûûrî yeenu yonthe, na eetithia mbarathi bonthe barî na rong'o na matumo.

⁵Njûûrî cia Parasia, na cia Ethiopia, na cia Lîbia bari na nkobia cia îthaga na rong'o ciaao, ikaagwatanîra na mûnene Gogi amwe na njûûrî yaawe.

⁶Ningî antû ba ndwaa bonthe ba Gomeri na Bethitogama barîa ba kuuma bwa ûrîo amwe na antû bangî babaingî bakaagwatanîra na Gogi.

⁷Gogi thuranîra njûûrî yaaku amwe na njûûrî îrîa ingî ikûgweete mbaru.

⁸Nyuma ya ntukû mma, bûgeetwa gwîta kwithûkîra nthîgûrû ya antû bacokanîrîîtue kuuma mîgongoone mwanya mwanya. Nabo batûûraga batî na ûguaa bwa kwithûkîrwa. Bûkaithûkîra irîma bia Israeli birîa biaathûûkangîtue na bierûkîrwa kagiita gakaraaja. Îndî antû baabio nî baacokere na batûûraga kiindajî.

⁹Gwe na njûûrî ciaaku cionthe bûkaabaithûkîra ta kîbuubani gîkînene bûûjûre nthîgûrû ta nduume.”

¹⁰MWATHANI Mûrungu arîîra Gogi atîrî, “Îgiita rîu rîakinya ûkaabanga mûbango jûmûthûûku jûrîa ûgaatumîra kûbaithûkîra.

¹¹Naagwe ûkauga, ‘Ka-mbîte nkaithûkîre nthîgûrû îrîa îrî na ntûûra îtiirigîri, îtirigîri na nthingo, na antû baayo batwîre kiindajî.’

¹²Naagwe ûgaataa antû barîa batûûraga ntûûreene irîa ciaarî maganjo na baacokanîîrue kuuma mîgongoone mwanya mwanya, barîa barî na ng'ombe inyingî na into bibingî, barîa batûûraga gatîgatî ka nthîgûrû.

¹³Antû ba Sheba na ba Dedani, na aringi biashara ba Tarishishi na ntûûra ciaayo bakaabûûria atîrî, ‘Nîka bûûthûranîtie njûûrî nîkenda bwithûkîra na bûtaa into? Nîka bûkwenda gûtaa fetha, na thaabu, na ng'ombe na into bia mîthemba îngî, bwîta nabio?’

¹⁴“Tontû bûû, mûtaana wa muntû roreria Gogi ûmwîre MWATHANI Mûrungu ariuga ûjû: ntukû îîu yakinya ûgeeta kwithûkîra antû baakwa ba Israeli barîa batûûraga kiindajî.

¹⁵Bûkaûma kûrîa bûtwîre kûraaja bwa ûrîo, amwe na antû bangî babaingî, bonthe beetithîtie mbarathi. Naabuî bûkeethîrwa bûrî njûûrî înene îrî na inya.

¹⁶Naabuî bûkaithûkîra antû baakwa ba Israeli bûûjûre nthîgûrû yonthe ta nduume. Îgiita rîu rîakinya nkaabûtûma bûkaithûkîre nthîgûrû yaakwa nîkenda antû ba mîgongo îngî îmenya atî ndî ûmûtheru rîrîa ngaagûtûmîra gwe Gogi.

¹⁷Tontû bûû, ûûni MWATHANI Mûrungu ndiuga atî nîgwe ûrîa ndaaugagîra karaaja na njîra ya nthûûmba ciaakwa iroria bia Israeli atî nkaabwikia bûbaithûkîre.”

¹⁸MWATHANI Mûrungu ariuga atîrî, “Ntukû îîu yakinya rîrîa Gogi akaaithûkîra Israeli, mûthûûro jwaakwa jûgookaûka.

¹⁹Tontû bwa ûrîa mûthûûro jwaakwa jûrî jûmûûî na ûrîa ndî wa rûriitho, ntukû îîu îkeethîrwa îrî ya kwinainua gûkûnene Israeli.

²⁰Makûyû ja îria, na nyoni, na nyamû cia kîthaka, na nyomoo irîa ikuaga na nthî, na antû bonthe barîa batwîre nthîgûrû bagaateetema mbere yaakwa. Ningî kinya irîma bikoborangwe na ngîrî igwe nthîgûrû na nthingo cionthe imomokange.

²¹Ngaatûma imakania bia mîthemba yonthe biîjîîra mûnene Gogi. O muntû akooraga muntû ûngî.

²²Nkaareeta mîrimo na ndwaa ngiitîre Gogi îgamba. Nkaamuurithîria amwe na njûûrî îrîa akeethîrwa arî nayo ngai înene, na ngai ya nchûgû na mwanki na mwanki jwa ûbiriti.

²³Tontû bûû, nkoonania ûkumio bwaakwa na waagîru bwaakwa kîrî mîgongo îmiingî. Rîu nîrîo bûkaamenya atî ûûni nî ni MWATHANI.”