Read KIMERU BIBLE PROTESTANT EDITION Ezek 39 Bible Online

Ezek 39 - KIMERU BIBLE PROTESTANT EDITION bible

Ezek 39

¹“Mûtaana wa muntû, roria mantû jegiî mûnene Gogi uuge atîrî, ‘Ndî mûnthû waaku gwe mûtongeeria ûrîa mûnene wa Mesheki na Tubali.

²Naani ngaakûgarûra kuuma kûraaja bwa ûrîo nkwerekerie irîmeene bia Israeli.

³Rîu nkaaringa ûta bwa Gogi kuuma njareene yaawe ya ûmotho na mîgwî îgwe îrîa agwete na njara yaawe ya ûrîo.

⁴Gogi na njûûrî îrîa îrî rûteere rwaawe îkooragîrwa irîmeene bia Israeli, ntûme biimba biaao biee biakûrîa bia nyamû na nyoni.

⁵Nabo bakooragîrwa bûûrîîne, nîu ûûni MWATHANI Mûrungu nkuuga.

⁶Ngaatûma mwanki jwîîthie nthîgûrû ya Magogi amwe na gûntû kûrîa kûrîganîrîtie na îria, kûrîa antû batûûraga kiindajî. Nabo rîu bakaamenya nî ni MWATHANI.

⁷Ngaatûma antû ba Israeli bamenye riîtwa rîaakwa rîrîtheru na ntîrekeeria rîmeneerua kaîrî kana rîîkîrwa mûgiro kaîrî. Nîrîo mîgongo îkaamenya atî ni nî ni MWATHANI, Ûrîa Mûtheru wa Israeli.’”

⁸MWATHANI Mûrungu nî aaugîre atîrî, “Ntukû îrîa ndaugîîte îgaakinya no mwanka îgaakinya.

⁹Yaakinya nîrîo barîa batwîre ntûûreene cia Israeli bakaumaaraga bakaîthia mathaga jaao ja ndwaa; tajo rong'o iniini na inene na moota na mîgwî na nchûgûma na matumo. Bagakara mîaka mûgwanja bagîtumagîra mathaga ja ndwaa jarî nkû.

¹⁰Tontû bûû, batîîthîrwa barî na gîtûmi gîa kuuna nkû mwitûûne nîûntû bagaakagia mwanki na mathaga ja ndwaa. Nabo bakaithûkîra barîa babaithûkîrîte na batae barîa baabataîte. Ûu nîu MWATHANI Mûrungu akuuga.”

¹¹Ntukû îîu yakinya nkaanenkera mûnene Gogi gûntû gwa kûthikanaga kûu Israeli. Nkaamûnenkera Kîguuru kîa Ageendi kîrîa kîrî gaiti ka îria rîa Chumbî nîkenda we na njûûrî îrîa arî nayo bakaathikwa kîguuruune kîu. Njîra ya ageendi îkaingwa nî kaburi kau. Nakîo gîgeetagwa kîguuru kîa Hamonigogi.

¹²Antû ba Israeli bakaathika biimba biu mîeri mûgwanja nîkenda beeberia mûgiro nthîgûrûûne yaao.

¹³Antû bonthe bagaateetheria kûthikana. Nabo bakaaeewa gîtîîo ntukû îrîa nkoonania ûkumio na njîra ya ûûmbani bûu. Ûu nîu ûûni MWATHANI Mûrungu nkuuga.

¹⁴Nyuma ya mîeri mûgwanja, antû bakaathuurwa beetanie na nthîgûrû yonthe bagicwaga biimba birîa bitigeere nthî bakabithika nîkenda beeberia nthîgûrû mûgiro.

¹⁵Rîrîa muntû akeethîrwa eetîte na njîra oone mîîndîîndî, ageekagîra antû au rwano nîkenda athikani beeta bamîthika kîguuruune kîa Hamonigogi.

¹⁶Ntûûra îgwîtwa Hamona kinya yo îkeethîrwa îrî akuî au. Nayo nthîgûrû îkeeberua mûgiro buru.

¹⁷ Îndî gwe-rî, mûtaana wa muntû, ûûni MWATHANI Mûrungu ndîkwîra ûjû, “Arîria nyoni cia mîthemba yonthe na waarîrie nyamû cia kîthaka cionthe. Ûciîre atîrî, ‘Ûthûraneeni amwe buumîte nteere cionthe bwîje kîathoone gîa kîgongwana kîrîa mbûthuranîrîte. Nakîo nî kîatho gîkînene mono kîrîa gîkeethîrwa kîrî irîmeene bia Israeli. Bûkaarîa nyama na bûnyue tharike.

¹⁸Bûkaarîa nyama cia nchamba cia ndwaa na bûnyue tharike ya atongeeria ba nthîgûrû, na ya ntûrûme, na mbûri, na ndeegwa irîa cionthe noru mono kuuma Bashani.

¹⁹Bûkaarîa maguta mwanka bûnyire, na bûnyue tharike mwanka îbûkore kîathoone kîu nkaabûthuranîrîra!

²⁰Naabuî bûkaarîa nyama cia mbarathi na eetithia baacio na cia asikarî. Ûu nîu ûûni MWATHANI Mûrungu nkuuga.’

²¹“Ngaatûma mîgongo yonthe yoone ûkumio bwaakwa na yoone ûrîa ngambithanagia na îota.

²²Kuuma ntukû îîu antû ba Israeli bakaamenya atî ni nî ni MWATHANI Mûrungu waao.

²³Nabo antû ba Israeli bakaamenya atî beetîre kîthamîrioone nîûntû bwa meeyia jaao jarîa beeîîtie kîrî ni. Naani ndîrabautatîra ndîrarekeeria anthû baao barabaithûkîra na barabooragîra ndweene.

²⁴Ûûni ndaabakanûkîrie kûringana na ûthûûku bwaao na maatia jaao. Naani ndîrabautatîra buru.”

²⁵Tontû bûû, MWATHANI Mûrungu ariuga atîrî, “Nandî ngacokeria nchiarwa cia Jakubu mawega jarîa baarî najo mbereene mbigîîrue antû ba Israeli bonthe kîaao. Naani nkamenyeera riîtwa rîaakwa rîrîtheru rîtîkathûûkue kaîrî.

²⁶Rîrîa bagaakara kiindajî nthîgûrûûne yaao gûtî na ûgwati bwa kwithûkîrwa, nîrîo bakoorîrua nî mantû jamathûûku jarîa banthithîîrie.

²⁷Nayo mîgongo îngî îkaamenya ndî ûmûtheru rîrîa nkaabacokanîîria kuuma nthîgûrûûne cia anthû baao.

²⁸Rîu nîrîo bakaamenya atî nî ni MWATHANI Mûrungu waao nîûntû nî ni ndeendere baikua kîthamîrioone kûu mîgongoone îngî na ndîraboothûrania kuuma ku ndîrabaikia nthîgûrûûne yaao bongwa. Gûtî muntû waao ûgatigara mîgongoone îîu.

²⁹Nkaaboojûria Roho waakwa na ntîbautatîra kaîrî. Ûu nîu ûûni MWATHANI Mûrungu nkuuga.”