Read KIMERU BIBLE PROTESTANT EDITION Ezek 40 Bible Online

Ezek 40 - KIMERU BIBLE PROTESTANT EDITION bible

Ezek 40

¹Kûrî ntukû ya îkûmi ya kîambîrîria kîa mwaka jwa mîrongo îîrî na îtaano kuuma tûgwikua kîthamîrioone na mîaka îkûmi na îna nyuma ya Jerusalemu îgûtawa, o ntukû îîu yongwa, nî ndaaigîrue inya ya mwanya kuuma kîrî MWATHANI, nayo îrankamata.

² Mûrungu nî aankamatîre na njîra ya kîoneki arambikia nthîgûrûûne ya Israeli kîrîmeene gîkîraaja aranguûrîra ndîroona gîntû gîakari ta ntûûra mbere yaakwa.

³ Arambikia ku naani ndîroona muntû wakari ta îturutia arî na rûturo rwa kûthima na kîthimi kîathithîtue na nguû, arûngami mpingîroone.

⁴Muntû ûu arambîîra atîrî, “Mûtaana wa muntû ntega bwega na ûthikîîre bwega. Ningî ûthûgaanîrie mantû jonthe jarîa ngaakwonia. Nîkwîthîrwa ûreetetwe gûkû nîkenda nkwonia jo naagwe wîîte ûkeere antû ba Israeli mantû jau.”

⁵ Atîrî, nî kwaarî na rûthingo rwairigîrîte kîûrû. Muntû ûu arajûkia kîthimi kîrîa aagwete kîa uraaja bwa mita ithatû (3m) arathima rûthingo nakîo. Naru rwaarî rwa mita ithatû (3m) gwitia bwa îgûrû na ûmatu bwa mita ithatû (3m).

⁶Nawe areeta mpingîroone ya bwa gaiti, araitia agîkinyaga nkinyo. Arathima kîarago kîa mpingîro. Nakîo kîaarî kîa mita ithatû (3m) kwînama.

⁷Nayo mpingîro îîu nî yaarî na tûnyomba tûthatû twa akaria. O kanyomba kaarî ka mita ithatû nteere cio-ijîîrî. Natu tûnyomba tûu twagaanîtue na rûthingo rwa ûmatu bwa mita ijîîrî na nusu (2.5m). Wakûrûka tûnyomba tûu, nî kwaarî na antû gwa gwitîîria kanyomba karîa gaategeene na kîûrû. Antû au gwa gûkûrûkîîra kwaarî kwa ûraaja bwa mita ithatû (3m).

⁸Arathima kanyomba kau kaarî mbere ya kîûrû. Aroona kaarî ka mita ijîîrî na nusu.

⁹Nako kanyomba kau nî kaarî na antû gwa gûkûrûkîîra gwakinyaga akuî na kîûrû. Naku kwaarî kwa ûraaja bwa mita îmwe.

¹⁰Ningî nî kwaarî na tûnyomba tûngî tûthatû rûteere rwa mpingîro ya bwa gaiti. Natu twaarî twa ithimi bimwe na nthingo irîa ciaatûgaanîtie.

¹¹Ningî muntû ûu nî aathimîre wariî bwa gîkûrûkîîro kîa mpingîro. Kîonthe kîaarî kîa mita ithaano (5m) na mpingîro irugûri, kîaarî kîa mita îthanthatû (6m).

¹²Mbere ya tûnyomba twa akaria nî kwaarî na mûkîîndo. Naju jwaarî jwa nusu mita (0.5m) bwa îgûrû na ûmatu bwa mita ithatû (3m). Nî kwaarî na tûnyomba tûthatû tûng'aneene o kamwe kaarî ka ûraaja bwa mita ithatû na wariî bwa mita ithatû na mita ithatû gwitia.

¹³Ningî nî aathimîre ûraaja bwa gîkûrûkîîro kuuma rûthingo rwa nyuma rwa kanyomba kamwe. Nabu bwaarî bwa mita îkûmi na ijîîrî na nusu (12.5m).

¹⁴Ningî nî aathimîre kanyomba karîa gaakûrûkagîîrwa, nako kaarî akuî na kîarago. Nako kaarî na waariî bwa mita îkûmi (10m).

¹⁵Ûraaja bwa gîkûrûkîîro kîu bunthe kuuma rûthingoone rwa oome rwa mpingîro mwanka rûthingoone rwa mûthia rwa kanyomba ka mûthia bwaarî mita mîrongo îîrî na ithaano (25m).

¹⁶Tûnyomba tunthe nî twaarî na tûndiricha na kinya nthingo irîa ciagaanîtie tûnyomba nî ciaarî na tûndiricha. Ningî nî kwaarî na maûa ja mîkîndû jaathithîtue nthingoone cia ndeene cia gîkûrûkîîro kîu.

¹⁷Ningî muntû ûu arambikia kîaragoone kîa bwa oome. Nakîo nî kîaarî na tûnyomba mîrongo îthatû twaaki tûriganîîrîtie na rûthingo rwa bwa oome. Mbere ya tûnyomba tûu nî kwaathithîtue gûntû gwa gwîtîîra. Gûntû kûu gwa gwîtîîra kwathithîtue na maiga.

¹⁸Gûntû kûu gwa gwîtîîra kwathiûrûkîte kîarago. Kîarago kîu kîa oome kîaarî gûntû kwînami nkûrûki ya kîarago kîa bwa ndeene.

¹⁹Muntû ûu aracoka arathima arîa gwaakûrûkagîîrwa kuuma ndeene ya mpingîro ya gaiti mwanka mbere ya kîarago kîa ndeene. Naku kwaarî kwa mita mîrongo îtaano (50m).

²⁰Muntû ûu aracoka arathima mpingîro ya bwa ûrîo îrîa yeetaga kîaragoone kîa bwa oome.

²¹Tûnyomba tûrîa tûthatû twa gûkaria mpingîro tûrîa twaarî nteere cio-ijîîrî cia mpingîro, na nthingo irîa ciaatûgaanîtie, na kanyomba karîa ka mumaaro, cionthe ciaarî cia ithimi bimwe na mpingîro îrîa yaarî ya mbere. Mpingîro îîu yaarî ya ûraaja bwa mita mîrongo îîrî na ithaano (25m) na waariî bwa mita îkûmi na ijîîrî na nusu (12.5m). Nayo yaarî ya bwa gaiti.

²²Kanyomba karîa ga gûkûrûkîîra, na ndiricha, na maûa jarîa ja mîkîndû biakari ta birîa bia mpingîro ya bwa gaiti. Ningî nî kwaarî na nkinyo mûgwanja ciaitagîîria mpingîroone îîu. Kanyomba kaayo ga gûkûrûkîîra keerekeene na kîarago.

²³Rûteere rûrîa rûngî rwa kîarago kîu kuuma au mpingîroone ya bwa ûrîo nî kwaarî na mpingîro îrîa muntû aakûrûkagîîra agîîta kîaragoone kîa ndeene, o ta kîrîa kîaarî rûteere rwa bwa gaiti. Muntû ûu nawe nî aajûkîrie ithimi bia kuuma mpingîro îmwe gwîta îngî Nabio biaarî mita mîrongo îtaano (50m).

²⁴Ningî muntû ûu nî aambikîrie rûteereene rwa bwa ûmotho kûrîa kwaarî na mpingîro îngî. Nî aathimîre rûthingo rwa ndeene na kanyomba kaayo na arîa baakûrûkagîîra aroona biaarî na ithimi bimwe na mpingîro irîa ingî.

²⁵Tûnyomba twa mpingîro îîu nî twaarî na ndiricha o amwe na kanyomba na arîa gwaakûrûkagîîrwa nî kaarî na ndiricha ikari ûmwe na irîa cia mpingîro ingî. Mpingîro îîu yaarî ya ûraaja bwa mita mîrongo îîrî na ithaano (25m) na waariî bwa mita îkûmi na ijîîrî na nusu (12.5m).

²⁶Nî kwaarî na nkinyo mûgwanja irîa ciaitagia mpingîroone îîu. Kanyomba karîa kaarî au gwaakûrûkagîîrwa keerekeene na kîarago. Nthingoone cia mpingîro nî kwathithîtue maûa ja mîkîndû.

²⁷Ningî nî kwaarî na mpingîro bwa ûmotho bwa kîarago kîa ndeene. Muntû ûu nî aathimîre mpingîro kuuma mpingîroone îîu gwîta îrîa yaarî bwa oome. Aroona yaarî na mita mîrongo îtaano (50m).

²⁸Muntû ûu arankûrûkîîria mpingîroone ya bwa ûmotho tûreeta kîaragoone kîa ndeene. Nawe arathima au twaakûrûkîrîîre kûreethîrwa kûrî na ithimi bimwe na mpingîro irîa ingî cia bwa oome.

²⁹Tûnyomba twaayo twa akaria na nthingo irîa ciaatûgaanîtie, na kanyomba karîa gwaakûrûkagîîrwa kaarî na ithimi bimwe na bia mpingîro ingî. Natu nî twaarî na ndiricha kûthiûrûka. Ûraaja bwaarî mita mîrongo îîrî na ithaano (25m) na waariî bwa mita îkûmi na ijîîrî na nusu (12.5m).

³⁰Tûnyomba tûu twaarî twa ûraaja bwa mita mîrongo îîrî na ithaano (25m) na waariî bwa mita îkûmi na ijîîrî na nusu (12.5m).

³¹Ningî nî kwaarî na nkinyo inyanya cia gwitia mpingîroone îîu. Kanyomba ka arîa gwaakûrûkagîîrwa keerekeene na kîarago kîa oome. Ningî nthingo nî ciaagemetue na maûa ja mîkîndû.

³²Muntû ûu nî aambikîrie kîaragoone ndeene rûteere rwa bwa gaiti. Nî aathimîre gîkûrûkîroone kîa mpingîro aroona kîrî na ithimi bimwe na mpingîro ingî.

³³Natu tûnyomba twaayo twa akaria, na kanyomba karîa gaakûrûkagîîrwa na nthingo ciaako cia ndeene ciaarî cia ithimi bimwe na mpingîro irîa ingî. Tûnyomba tûu nî twaarî na ndiricha kunthe. Ithimi biaatu biaarî mita mîrongo îîrî na ithaano kûreea (25m) na waariî bwa mita îkûmi na ijîîrî na nusu (12.5m).

³⁴Kanyomba ka gûkûrûkîîra keerekeene na kîarago kîa oome. Nacio nthingo ciaako nî ciaagemetue na maûa ja mîkîndû. Nî kwaarî na nkinyo inyanya irîa ciaitagia ku.

³⁵Muntû ûu arambikîîria mpingîroone ya bwa ûrîo. Aaramîthima aroona îrî na ithimi bimwe na mpingîro irîa ingî.

³⁶Kinya yo o ûmwe na mpingîro ingî nî yaarî na tûnyomba twa akaria, na kanyomba karîa gwaakûrûkagîîrwa, na nthingo nî ciagemetue, na nî yaarî na ndiricha kûthiûrûka. Ûraaja bwaayo bwaarî mita mîrongo îîrî na ithaano (25m) na waariî bwa mita îkûmi na ijîîrî na nusu (12.5m).

³⁷Nako kanyomba kaayo ga gûkûrûkîîra keerekeene na kîarago kîa bwa oome. Nacio nthingo cia gîkûrûkîîro kîa mpingîro ciagemetue na maûa ja mîkîndû. Nî kwaarî na nkinyo inyanya irîa ciaitagia mpingîroone îîu.

³⁸Nî kwaarî na nyomba kîaragoone kîa oome yaagwateene na gîkûrûkîîro kîrîa kîaarî rûteere rwa bwa ûrîo. Mûrango jwaayo jwerekeene na kanyomba karîa gaakûrûkagîîrwa karîa keerekeene na kîarago. Nyomba îîu nîo antû baathambagîria biimba bia nyomoo irîa ciaaritagwa irî igongwana bia gwakîîria.

³⁹Nyomba îîu nî kwaarî na meetha inya; ijîîrî rûteere rûmwe na ijîîrî rûteere rûngî. Îgûrû rîa meetha iu nîo booragagîra nyomoo cia igongwana bia gwakia nyomoo yonthe na igongwana bia kûthiria meeyia na bia kûthiria maatia.

⁴⁰Oome ya nyomba îîu nî kwaarî na meetha ingî inya ciaakari o ûmwe na irîa ingî. Nacio cieeki meetha ijîîrî ijîîrî o rûteere rûmwe rwa mpingîro îîu ya bwa ûrîo.

⁴¹Meetha cionthe irîa nyomoo cia igongwana ciaathînjagîrwa ciaarî inyaanya. Inya cieethagîrwa irî nyomba ndeene na inya ingî oome kîaragoone.

⁴²Ningî nî kwaarî na meetha inya ciaaji kuuma maigeene na nîku igongwana bia gwakîîria nyomoo yonthe biaaritagîrwa. Ciaarî centimita mîrongo îtaano (50) bwa îgûrû, na ûraaja bwa centimita mîrongo mûgwanja na ithaano (75) na waariî o ta bûu. Into bionthe birîa biatumagîrwa kîgongwaneene bieekagwa meetheene iu.

⁴³Nchibe nî ciaangîrîîtwe ikathiûrûkîra meetha îîu. Nacio ciaarî cia ûraaja bwa milimita mîrongo mûgwanja na ithaano (75mm). Nyama cionthe irîa ciaaritagwa irî igongwana cieekagwa meetheene iu.

⁴⁴Aracoka arambikia kîaragoone kîa ndeene. Naku nî kwaarî na tûnyomba twîrî. Kamwe kaarî rûteere rwa mpingîro ya bwa ûrîo keerekerete bwa ûmotho. Kanyomba kangî kaarî rûteere rwa mpingîro ya bwa ûmotho keerekerete bwa ûrîo.

⁴⁵Muntû ûu arambîîra kanyomba kau keerekerete bwa ûmotho kaarî ka athînjîri-Mûrungu barîa batumîkaga kîûrûûne.

⁴⁶Nako kanyomba karîa keerekerete bwa ûrîo nî ka athînjîri-Mûrungu barîa bamenyagîîra kîritîro kîa igongwana bia MWATHANI; nabo baarî nchiarwa cia Zadoki ûrîa waarî mûtaana wa Lawi.

⁴⁷Muntû ûu nî aathimîre kîarago kîa ndeene aroona kîaarî kîa mita mîrongo îtaano (50m) na waariî bwa mita mîrongo îtaano (50m). Nakîo kîûrû kîaarî bwa rûgûrû rwa kîarago kîu na kîritîro kîa igongwana kîaarî mbere ya kîûrû.

⁴⁸Aracoka arambikia kanyomba karîa kaarî arîa gwaakûrûkagîîrwa. Arakathima aroona kaarî ka waariî bwa mita mûgwanja (7m) na mita ijîîrî na nusu (2.5m) kwînama bwa nthî. Nthingo cia mpingîro ciaarî na ûmatu bwa mita îmwe na nusu (1.5m).

⁴⁹Nî kwaarî na nkinyo ciaitagia kanyomba kau kaarî arîa gwaakûrûkagîîrwa. Kanyomba kau kaarî ka ûraaja bwa mita îkûmi (10m) na waariî bwa mita ithanthatû (6m). Ningî nî kwaarî na itugî biîrî o gîtugî rûteere rûmwe rwa mwari.