Read KIMERU BIBLE PROTESTANT EDITION Ezek 41 Bible Online

Ezek 41 - KIMERU BIBLE PROTESTANT EDITION bible

Ezek 41

¹Muntû ûu aracoka arambikia gatîgatî ka antû arîa kûtheru buru. Arathima au gwetagîîrwa antû au kûtheru buru. Aroona gûtonyete mita ithatû (3m) bwa ndeene

²na kaarî na waariî bwa mita îthaano (5m) na nthingo cia ûmatu bwa mita ijîîrî na nusu (2.5m). Ningî aracoka arathima kanyomba kau tako antû arîa kûtheru buru, aroona karî ka ûraaja bwa mita mîrongo îîrî (20m) na waariî bwa mita îkûmi (10m).

³Ningî nî aatonyere kanyomba karîa karî ndeene mono arakathima. Arathima gîkûrûkîîro kîrîa gîaatonyaga ku aroona kîaarî kîa mita îmwe (1m) kwînama, na wariî bwa mita ithatû (3m) nthingo ciaarî na ûmatu bwa mita ithatû na nusu (3.5 m).

⁴Kanyomba kau kaarî ndeene mono nako nî kaang'aneene nteere cio-inya. O rûteere rwaarî rwa mita îkûmi (10m). Araambîra atîrî, “Antû aja nîo arîa atheru buru.”

⁵Muntû ûu nî aacokere arathima ûmatu bwa nthingo cia ndeene cia kîûrû aroona bûrî bwa mita ithatû (3m). Ningî nî kwaarî na tûnyomba twaarî na wariî bwa mita ijîîrî (2m) tûgwateene na rûthingo rûu runthe kûthiûrûka kîûrû.

⁶(Tûnyomba tûu twaarî twa ngoroba ithatû na o ngoroba nî yaarî na tûnyomba mîrongo îthatû [30]). Nthingo cia kîûrû nî cieethagîrwa irî na ûmatu bûbûkai o ûrîa ngoroba îkwînama. Tontû bûû, tûnyomba nî tweethagîrwa tûrî îgûrû rîa rûthingo îndî tûtaagwatanîte.

⁷Tontû bûû, nthingo cionekaga kuuma bwa oome ta irî na ûmatu bûmwe kuuma îgûrû mwanka nthî. Rûthingoone rwa oome buru rwa kîûrû nî gwaki nkinyo oome ya tûnyomba tûu twaagwateene na rûthingo. Tontû bûû, nî kwombîkaga muntû gwitia kana kwînama ngorobeene iu agîtumagîra nkinyo iu.

⁸Ningî ndîroona rûthingo rûu nî rwaarî na mûsingi jwookîîrîîtue kûthiûrûkîra rûthingo, au nîo tûnyomba twaaki. Naju jwaarî jwa ûmatu bwa mita ithatû (3m).

⁹Naru rûthingo rwa oome rwa tûnyomba tûu twaaki nteere rwaarî rwa mita ijîîrî na nusu (2.5m). Nî kwaarî na karîîngo gatîgatî ga tûnyomba tûu twaarî nteere cia kîûrû,

¹⁰na tûnyomba tûrîa twa athînjîri-Mûrungu. Nako kaarî ka mita îkûmi (10m) kûgiitanîîria gatîgatî.

¹¹Nî kwaarî na mîrango îrîa yaatonyaga tûnyomba tûu twa nteere kuuma karîîngoone kau. Nayo yaarî îîrî; jûmwe bwa ûrîo na jûngî bwa ûmotho. Mûsingi jwa karîîngo kau jwaarî jwa mita ijîîrî na nusu (2.5m) kuuma nthîgûrû.

¹²Mûthieene jwa karîîngo kau, rûteereene rwa bwa rûgûrû rwa kîûrû nî kwaarî na nyomba ya ûraaja bwa mita mîrongo îna na îthaano (45m) na wariî bwa mita mîrongo îthatû na ithaano (35m) na nthingo ciaayo ciaarî cia ûmatu bwa mita ijîîrî na nusu (2.5m).

¹³Muntû ûu aracoka arathima kîûrû bwa oome. Aroona kîrî na ûraaja bwa mita mîrongo îtaano (50m). Naku kuuma bwa nyuma ya kîûrû, kûgiitanîîria karîîngoone kau mwanka gwîta nyomba îîu yaarî bwa rûgûrû, kwaarî na ûraaja bwa mita mîrongo îtaano (50m).

¹⁴Kuuma arîa antû baakûrûkagîîra, o amwe na kaanya karîa kaarî arîa karîîngo gaaki, antû au kunthe kwaarî kwa mita mîrongo îtaano (50m).

¹⁵Aracoka arathima nyomba îîu yaarî bwa rûgûrû ya kîûrû o amwe na ngoroba ciaayo irîa ciaarî nteere cio-ijîîrî, aroona ciaarî na ûraaja bwa mita mîrongo îtaano (50m). Kanyomba karîa kaarî arîa antû baakûgûkagîîra kîûrûûne na antû arîa atheru, na antû arîa atheru buru

¹⁶nî gwaaki na mbaaû kuuma nthîgûrû mwanka ndiricheene. Mbaaû iu nî ciaatonyanîte bwega mono. Kinya ndiricha iu nî ciakunîkagwa na mbaaû.

¹⁷Nthingo cia kîûrû cionthe cia ndeene kinya gwitia îgûrû rîa mîrango nî kwagemetue na mbaaû ciaarî inthongi mono.

¹⁸Nacio ciaathithîtue maûa ja akerubimu na ja nkîndû. Najo maûa jau ja akerubimu na nkîndû nîka jaunganîte kunthe nyomba. O mûkerubi nî aarî na moothiû jaîrî.

¹⁹Ûthiû ta bwa muntû bwa mûkerubi ûu bwaategeete mûkîndû rûteere rûmwe na ûthiû bûngî ta bwa ngatûnyi bûgatega mûkîndû rûteere rûngî. Mbicha iu ciaarî nthingoone kûthiûrûka.

²⁰Kuuma nthîgûrû mwanka îgûrû rîa mûrango, akerubimu na mîkîndû nî ciaagemetie nthingo na bwa ndeene.

²¹Itugî bia kîûrû na bia antû arîa atheru buru biaang'aneene nteere cionthe.

²²Naku nî kwaarî na kîritîro kîa igongwana kîa mbaaû. Nakîo kîaarî kîa mita îmwe na nusu (1.5m) gwitia bwa îgûrû na waariî bwa mita îmwe (1m) na ûraaja bwa mita îmwe (1m). Gîtîîri gîaakîo na nteere ciaakîo ciaarî cia mbaaû. Muntû ûu arambîîra atîrî, “Meetha îîjî nîyo îkaraga mbere ya MWATHANI.”

²³Ningî nî kwaarî na mwari mûthieene jwa antû au gweetagîîrwa antû arîa atheru, na jûngî arîa gweetagîîrwa antû arîa kûtheru buru.

²⁴Mwari jûu jwaarî na mîrango îîrî yaingagîrwa gatîgatî. Jwarugûragwa, mûrango jûmwe jûgeeta ndeejî na jûngî jûgeeta ndeerea.

²⁵Mîariine îîu ya antû arîa atheru nî yaagemetue na maûa ja akerubimu na ja mîkîndû o ta ûrîa nthingo ciaakari. Ningî nî kwaarî na mwari jwa mbaaû jwa kanyomba karîa antû baakûrûkagîîra.

²⁶Kanyomba karîa kaarî arîa gwaakûrûkagîîrwa nî kaarî na ndiricha kûthiûrûka kunthe na nthingo ciaako nî ciagemetue na maûa ja mîkîndû.