Read KIMERU BIBLE PROTESTANT EDITION Ezek 44 Bible Online

Ezek 44 - KIMERU BIBLE PROTESTANT EDITION bible

Ezek 44

¹Muntû ûu nî aanjûkîrie arancokia mpingîroone ya bwa oome ya kîûrû rûteere rwa bwa gaiti. Nayo mpingîro îîu nî yaaingi.

²Arambîîra atîrî, “Mpingîro îîjî îbuîrîte gûkaraga iingi magiita jonthe na gûtî muntû ûbuîrîte gûkûrûkagîra ku, nîûntû MWATHANI Mûrungu wa Israeli nî athirîtie gûkûrûkîîra ku. Tontû bûû, nî îkarage îingi magiita jonthe.

³Nî mûtongeeria akî ûbuîrîte gûkaraga ku rîrîa akûrîa biakûrîa birîa bitheru. Abuîrîte gûtonyagîîra mwariine jwa kanyomba karîa antû bakûrûkagîîra na akaumagarîîra o kaîrî.”

⁴Aracoka arambikîîria mpingîroone ya bwa ûrîo mbere ya kîûrû. Naani ndîratega ndîroona weerû bwa MWATHANI bûûjûri kîûrûûne kwonania nî aarî ku. Naani ndîraturia maru ndîratiirithia ûthiû bwaakwa nthî ndîramûthaathayia.

⁵MWATHANI arambîîra atîrî, “Mûtaana wa muntû thikîîra bwega jarîa ûkaigua na jarîa ûkoona. Ndîenda gûkwîra mawaatho ja kîûrû. Menyeera bwega nîkenda ûmenya barîa bageetîkagîîrua gûkûrûka kîûrûûne na barîa batîîtîkîîrua gûkûrûka ku.

⁶Îîra antû ba Israeli barîa ndemi ûûni MWATHANI Mûrungu ndiuga atîrî, nî batigane na mantû jamathûûku mono jarîa bakûthithia.

⁷Bo nî beekîrîte kîûrû mûgiro nîûntû bwa gwîtîkîîria ageni ba nthîgûrû ingî bakûrûka ku, na bageetîkîîria antû barîa batîmbijî bagatonya kîûrûûne rîrîa bakûrita igongwana bia irio, na bia maguta na bia tharike. Tontû bûû nî baunîte kîrîkanîro kîrîa tweekanîîre nabo.

⁸Nkûrûki ya jau bûtîmenyagîîra into biaakwa bibitheru kîûrûûne îndî buî nî ageni ba kuuma kûngî bwaeetherie amenyeeri ba into biu.

⁹“Tontû bûû, ûûni MWATHANI Mûrungu ndiuga atîrî, gûtî mûgeni wa kuuma nthîgûrû îngî ûbuîrîte gûtonya kîûrûûne. Kinya ageni barîa batwîre amwe naabuî batîbuîrîte gûgîtonya.

¹⁰“Alawi barîa baaregere kûmbathîkîra, na barataratara na barathaathayia mîrungu ya mîng'uanano bagaakanûkua nîûntû bwa meeyia jau.

¹¹Nîbo bagatumîkaga kîûrûûne gîaakwa bakîmenyagîîra mpingîro. Ningî bakaaritaga igongwana bia gwakîîria na igongwana bingî nîûntû bwa antû.

¹²Îndî nîkwîthîrwa nî baatithîrie antû ba Israeli njîra, baratûma bathaathayia mîrungu ya mîng'uanano, no mwanka mbakanûkie.

¹³Bau batîbuîri gûntumîkîra barî athînjîri-Mûrungu kana beeta akuî na gîntû no kîrîkû gîaakwa gîkîtheru, kana batonya antû arîa atheru buru. Rîu nîrîo rîkaa îkanûkia nîûntû bwa mantû jamathûûku jarîa bathithîtie.

¹⁴Bau no baritage ngûgî mwanya mwanya kîûrûûne mono cia gûkaria kîûrû.”

¹⁵MWATHANI Mûrungu nî aaugîre atîrî, “Athînjîri-Mûrungu ba nchiarwa cia Alawi ba rûrîîjo rwa Zadoki nî baantumîkîîre bwega kîûrûûne rîrîa antû bangî ba Israeli baaeete ndemi. Tontû bûû, nîbo nkwenda bantumîkagîra, batûa kûnditagîra igongwana bia maguta na tharike.

¹⁶“Bau nîbo bonka babuîrîte gûntumîkagîra kîûrûûne gîaakwa na kîritîroone kîa igongwana na gûtongagîîria antû kûnthaathayia.

¹⁷ Rîrîa bagîtonya mpingîro cia Kîarago kîa bwa ndeene, babuîrîte kwîthîrwa beekîrîte nguû cia gatani îndî batîbuîrîte gwîkagîra nguû cia bamba rîrîa bagûtumîkîra barî kîaragoone kîa ndeene.

¹⁸Ningî bakaogaga iremba na beekagîre churubaarî itumi na ndigi cia bamba nîkenda batîthithinaga.

¹⁹ Îndî baumagara kîaragoone kîa bwa oome, babuîrîte kûritaga nguû iu bagûtumîkagîra nacio bacitige antû arîa atheru. Nabo bageekagîra nguû ingî nîkenda antû batîkeeje kûthirua nî ûtheru bwa nguû iu. Nî beenjage ireru biaao akî.

²⁰ Athînjîri-Mûrungu batîbuîri kwenja mîtwe yaao buru kana barekeeria mîtuundu yaao înenea mono. Babuîrîte kûmîgiitaga îkang'ananîria.

²¹ Athînjîri-Mûrungu batonya kîaragoone kîa bwa ndeene batîbuîrîte kûnyunyaga ndibei.

²² Ningî batîbuîrîte kûgûra ntigwa ya mûka, kana mûka wîngi nî mwene îndî bo babuîrîte kûgûra mwarî karaiti ûmwe wa antû ba Israeli, kana ntigwa îndî îkeethîrwa îrî ntigwa ya mûthînjîri-Mûrungu ûngî.

²³ Babuîrîte kûritanaga antû baakwa kwathûranaga birîa birî bibitheru na birîa bitî bibitheru, na kwathûranaga birîa birî na mûgiro na birîa bitî na mûgiro.

²⁴Rîrîa kûrî na mateta, nîbo babuîrîte kwîthagîrwa barî agambi ba kwathûranaga antû bau bagûteta. Nabo bakagiitaga magamba jau o ta ûrîa ûûni mpendaga jagiitwa. Ningî bakathingataga Mawaatho na nkuagaya ciaakwa nîûntû bwa biatho birîa bituui. No mwanka baathîkagîre ntukû cia sabatû.

²⁵ Ningî bagáaciîkîra mûgiro baringithia kiimba. Nonga gîkëethîrwa kîrî kîa mwîrî jwa îthe kana jwa ng'ina, kana mûtaana waawe kana mwarî waawe, kana mûtaana wa ng'ina kana mwarî wa ng'ina ûrîa ûtagûrwa.

²⁶Athiria kûtherua nîûntû bwa mûgiro, mûthînjîri-Mûrungu abuîrîte gûkara ntukû mûgwanja rîu akeethîrwa akûthera.

²⁷Nayo ntukû îrîa agaatonya antû arîa atheru, kîaragoone kîa bwa ndeene nîkenda atumîkîra, abuîrîte arite kîgongwana gîa kûthiria meeyia jaawe. Ûu nîu ûûni MWATHANI Mûrungu nkuuga.

²⁸ Athînjîri-Mûrungu batîbuîrîte kwîthîrwa barî na kiigai Israeli. Rûgai rwaao nî ngûgî îîu ya ûthînjîri. Ûûni nî ni kiigai kîaao.

²⁹ Bakaarîjaga igongwana birîa biritagwa bia irio, na bia kûthiria meeyia na bia kûthiria maatia na into birîa mbathûrîri ndeene ya Israeli bionthe, nî biaao.

³⁰Maciara ja mbere ja maketha jeenu nî jaao na biewa bia mîthemba yonthe na igongwana birîa nditîri noo biaao. Rûmagieni athînjîri-Mûrungu biakûrîa bieenu nîkenda bwona kîtharimo.

³¹ Athînjîri-Mûrungu batîbuîrîte kûrîa nyama cia kiimba gîkuîte na bwaakio kana kîûragi nî nyamû îngî; kîethîrwa kîrî kîa nyoni kana nyomoo.”