Read KIMERU BIBLE PROTESTANT EDITION Ezek 45 Bible Online

Ezek 45 - KIMERU BIBLE PROTESTANT EDITION bible

Ezek 45

¹“Rîrîa mîîrîga îkaagaana ithaka, gîchunchî kîmwe gîkeethîrwa kîrî kîa MWATHANI. Nakîo gîkeethîrwa kîrî kîa ûraaja bwa kilomita îkûmi na ijîîrî na nusu (12.5km) na wariî bwa kilomita îkûmi (10km). Nakîo kîthaka kîu gîkeethîrwa kîrî gîkîtheru.

²Kîrî kîthaka kîu, gûkeethîrwa kûrî na kîthaka kîng'aneene nteere cio inya. O rûteere rûmwe rûkeethîrwa rûrî rwa mita magana jaîrî ja mîrongo îtaano (250m). Kîthaka kîu gîkeethîrwa kîrî gîa gwakwa kîûrû.

³Nusu ya kîthaka kîu, ûraaja bwa kilomita îkûmi na ijîîrî na nusu (12.5km) na wariî bwa kilomita ithaano (5km). Gîchunchî kîu nîo kîûrû kîrîa kîtheru gîgaakwa.

⁴Naku gûntû kûu nîku gûkeethîrwa kûrî gûkûtheru buru gûkaragwa nî athînjîri-Mûrungu barîa batumîkagîra MWATHANI kîûrûûne. Nîkû gûkeethîrwa kûrî na nyomba ciaao na kîûrû.

⁵Nusu îngî ya kîthaka kîu îkaa ya Alawi barîa batumîkagîra kîûrûûne. Nîkû gûkeethîrwa kûrî na ntûûra ciaao cia gûtûûra. Nayo îkeethîrwa îrî ya ûraaja bwa kilomita îkûmi na ijîîrî na nusu (12.5km) na waariî bwa kilomita ithaano (5km).

⁶“Rûteere rwa kîthaka kîu gûkeethîrwa kwathûri na kûtheretue. Gûkeethîrwa kûrî na kîthaka kîngî kîa ûraaja bwa kilomita îkûmi na ijîîrî na nusu (12.5km) kîa wariî bwa kilomita ijîîrî na nusu (2.5km). Kîthaka kîu kîomba gwakwa ntûûra ya gûtûûrwa nî Mûisraeli o wonthe.”

⁷“Kîthaka gîkeethîrwa kîrî o kîa mûtongeeria ûrîa ûkeethîrwa akîathanaga. Nakîo gîkethagîrwa kiumîte bwa rûgûrû rwa gûntû kûu kûtheru gîgeeta mwanka bwa rûgûrû rwa îria rîa Mediterania. Ningî gîkeethîrwa gîkiumaga bwa gaiti gîgeeta mwankeene jwa bwa gaiti jwa nthîgûrû. Kîthaka kîu gîkeethîrwa kîng'aneene na kîthaka kîrîa gîkeethîrwa kîgaîri mwîrîga jûmwe jwa Israeli.

⁸Kîu nîkîo gîkeethîrwa kîrî kiigai kîa mûtongeeria ûrîa ûkethagîrwa akîathanaga Israeli, nîkenda atîkainyîîrie antû, na nîkenda eetîkîîria o mwîrîga jwa Israeli jwigwatîra kithaka kîrîa kîrî kiigai kîaao.”

⁹MWATHANI Mûrungu ariuga atîrî, “Buî atongeeria ba Israeli nî bûkarîte îgiita rîrîraaja bûkîthithagia meeyia. Tîganageeni na kûthithia ûthûûku na kwiinyagîîria antû. Thithagieni mantû ja îota na ja waagîru. Menyagîîreeni bûtîkeenge antû baakwa bauma nthîgûrûûne yaao. Ûu nîu ûûni MWATHANI Mûrungu nkûbwîra.

¹⁰ “No mwanka wîthagîrwe ûrî na ithimi bia mma; ithimi bia kûthima into bibiûmo, na ithimi bia kûthima into birîa binyûûrûkaga.

¹¹Kîthimi kîa efa[1] kîrîa kîthimaga into bibiûmo kîîthîrwe kîng'aneene na bathi, kîthimi gîa kûthima into birîa binyûûrûkaga. Kîthimi kîa efa îmwe kîng'aneene na kîthimi kîa kilo ithatû. Ningî kîthimi kîa bathi îmwe kîng'aneene na kîthimi kîa kilo mîrongo îîrî.

¹²Nakîo kîthimi gîa shekeli kîng'aneene na gera mîrongo îîrî (20). Shekeli mîrongo îtaantatû (60) nî ûmwe na kîthimi kîa mina îmwe. Kîthimi kîa shekeli îmwe nî ûmwe na ngiramu îkûmi na îmwe (11g), na kîthimi kîa gera îmwe nî ûmwe na nusu ngiramu (0.5g). Ningî kîthimi kîa mina nî ûmwe na ngiramu magana jantantatû ja mîrongo înana (680g).

¹³Ritageeni biewa bieenu ûjû: kîrî ichunchî mîrongo îtaantatû (60) bia mûnyaki, ritageeni kîmwe kîrî bio.

¹⁴Kîrî ichunchî îgana (100) bia maguta ja nzeituni jarîa ûrî najo, ritaga gîchunchî kîmwe.

¹⁵Bûritage ng'ondu îmwe kuuma kîrî ng'ondu magana jaîrî kuuma o mûciî jwa Israeli. Ningî bûreetage igongwana bia irio, na bia gwakîîria, na bia gûcwaa thîîrî, nîkenda bûrekagîrwa meeyia jeenu. Ûu nîu ûûni MWATHANI Mûrungu nkuuga.

¹⁶“Igongwana biu bikaaritagwa nî antû bonthe nthîgûrûûne, bikaanenkanîrwa kîrî mûnene wa Israeli.

¹⁷Mûnene nîwe ûkaanenkanagîra nyomoo irîa ikaaritagwa igongwana. Ningî anenkanagîre irio na ndibei ya birîa bikaaritagwa birî igongwana nî Israeli biathoone bia mweri jûkîguûka, na bia ntukû cia sabatû na bia biatho bionthe birîa bituui. Ningî mûnene nîwe ûkaathuranagîra into birîa bikaaritagwa nîûntû bwa igongwana bia kûthiria meeyia, na bia irio na bia gwakîîria, o amwe na bia gûcwaa thîîrî nîkenda antû ba Israeli batherua.”

¹⁸MWATHANI Mûrungu ariuga atîrî, “Kûrî ntukû ya mbere ya mweri jwa mbere, bûkaaritaga kareegwa gatî na antû athûûku noo amwe karî kîgongwana gîa kûtheria kîûrû.

¹⁹Mûthînjîri-Mûrungu akaajûkagia tharike ya kîgongwana gîa kûthiria meeyia amîake itugîîne bia kîûrû, ngoji cio-inya cia kîritîro kîa igongwana. Ningî akaamîaka mîariine ya kîarago kîa bwa ndeene.

²⁰Ûu nîu bûkaathithagia o ntukû ya mûgwanja ya mweri nîkenda kîthiria meeyia ja o muntû wonthe ûrîa ûkethagîrwa eeîîtie atîkûmenya kana eeîîtie nîûntû bwa waa bwaawe wengwa. Bûu nîbu bûgaatûmaga kîûrû gîkara kîrî gîkîtheru.

²¹ “Kûrî ntukû ya îkûmi na inya mweri jwa mbere nîrîo bûkaambagîîria gûkûngwîra mambura ja Pasaka. Antû bakaarîîjaga mîgaate îtîîkîri mûtheega jwa kwimbithia. Bathithagie ûu ntukû mûgwanja.

²²Ntukû îîu mûnene akaarita ndeegwa ya kûrita kîgongwana gîa kûthiria meeyia jaawe wengwa na ja antû bonthe.

²³O ntukû o ntukû kîrî ntukû iu mûgwanja mûnene akaaritaga ndeegwa mûgwanja na ntûrûme mûgwanja itî na antû athûûku noo arîkû cia kûrita kîgongwana kîa MWATHANI gîa gwakîîria. Ningî o ntukû o ntukû akaaritaga nthenge ya kîgongwana gîa kûthiria meeyia.

²⁴Ningî kîrî o ndeegwa kana ntûrûme îrîa îkaaritwa îrî kîgongwana no mwanka îritanagîrue amwe na kilo ithatû cia irio na maguta lita mûgwanja na nusu (7.5).

²⁵ “Kîrî ntukû mûgwanja cia mambura ja tûgaanda, jarîa jaambagîîria kûrî ntukû ya îkûmi na ithaano cia mweri jwa mûgwanja, mûnene akaaritaga igongwana o ta biu o ntukû o ntukû nîûntû bwa kûthiria meeyia. Nabio igongwana biu bikeethîrwa birî bia kûthiria meeyia na bia gwakîîria na bia irio na bia maguta ja nzeituni.”