Read KIMERU BIBLE PROTESTANT EDITION Ezek 46 Bible Online

Ezek 46 - KIMERU BIBLE PROTESTANT EDITION bible

Ezek 46

¹MWATHANI Mûrungu ariuga atîrî, “Mpingîro ya bwa gaiti îrîa îtonyagîîrwa nî antû bagîîta kîaragoone kîa bwa ndeene no mwanka iingagwe ntukû ithanthatû îndî îkaarugûragwa ntukû ya sabatû na ntukû ya kîatho kîa mweri jûkîguûka.

²Mûnene agaatonyagîîra kanyomba karîa karî mpingîroone ya bwa oome. Nawe akaarûngamaga gatîgatîîne ka itugî bia ntûûra rîrîa athînjîri-Mûrungu bakûrita igongwana bia gwakîîria, na bia gûcwaa thîîrî. Ningî mûnene akathaathayia Mûrungu arî au mwariine jwa mpingîro rîu acoke aumagare. Îndî mwari jûtiingwa mwanka rîrîa gûgaatuka.

³Nabo antû bakaarombaga MWATHANI barî au mpingîroone îîu ntukû cia sabatû na cia kîatho kîa mweri jûkîguûka.

⁴Ntukû ya sabatû mûnene agaikagia tûtûrûme tûtaantatû na ntûrûme îmwe itî na antû athûûku noo amwe nîkenda iritagîrwa MWATHANI irî igongwana bia gwakîîria.

⁵Kîgongwana gîa ntûrûme gîkaaritanagîrua na kilo ithatû cia irio. Nabio igongwana bia tûtûrûme bikaaritanîrua na igongwana bia biakûrîa bibingî o ûrîa kûûmbîka. O kilo ithatû cia irio ikaaritanagîrua amwe na lita mûgwanja na nusu cia maguta ja nzeituni.

⁶Ntukû ya kîatho kîa mweri jûkîguûka, mûnene akaarita kareegwa na tûtûrûme tûtaantatû na ntûrûme îmwe; cionthe itî na antû athûûku noo amwe birî kîgongwana gîa gwakîîria.

⁷Ningî akaaritanîria o kîgongwana kîa ndeegwa kana kîa ntûrûme na kilo ithatû cia irio. Acoke aritanîrie kîgongwana kîu gîa tûtûrûme na ntûrûme inyiingî ûrîa akoomba. Akaabiritanîria amwe na lita mûgwanja na nusu cia maguta ja nzeituni.

⁸Mûnene agaatonyagîîra kanyomba karîa ka mpingîro na akaumagîîra o au.

⁹“Rîrîa antû bageetaga kûthaathayia MWATHANI îgiita rîa biatho birîa bituui, muntû atonya na mpingîro ya bwa ûrîo, akaumagaragîîra na ya bwa ûmotho. Ûrîa ûgaatonyaga na mpingîro ya bwa ûmotho akaumagaragîîra na ya bwa ûrîo. Gûtî muntû ûbuîrîte kuumagara na mpingîro îrîa atonyere nayo.

¹⁰“Mûnene agaatonyaga amwe na antû na akaumagarania amwe nabo.

¹¹Biathoone birîa bituuî ndeegwa na ntûrûme bikaaritanagîrua na kilo ithatû cia irio. Tûtûrûme natu tûkaaritanagîrua na gîntû kîonthe kîrîa muntû akethagîrwa arî nakîo. Ningî igongwana biu bikaaritanagîrua amwe na lita mûgwanja na nusu cia maguta ja nzeituni.

¹²“Rîrîa mûnene akaaritagîra MWATHANI kîgongwana gîa gûciendera wengwa, kîethîrwa kîrî kîa gwakîîria kana kîa gûcwaa thîîrî, akaarugûragîrwa mwari jwa bwa gaiti. Nawe akaaritaga kîgongwana kîaawe kîethîrwa kîrî kîa gwakîîria kana kîethîrwa kîrî kîa gûcwaa thîîrî o ta ûrîa aritaga ntukû ya sabatû. Athiria, akaumagaragîîra mpingîroone îrîa atonyereere. Aumagara, mwari jûkaingagwa.”

¹³MWATHANI Mûrungu ariuga atîrî, “Mûnene akaaritagîra MWATHANI kîgongwana gîa gwakîîria ntukû cionthe, o rûkîîrî o rûkîîrî akaritaga kang'ondu ka mwaka jûmwe.

¹⁴Acoke aritage kilo ithatû cia mûtu jûu o rûkîîrî o rûkîîrî. Mûtu ajuunganagie na lita ijîîrî cia maguta ja nzeituni birî kîgongwana kîrî MWATHANI. Bûu nîbu Waatho bwegiî igongwana bia gwakîîria birîa bikaaritagwa magiita jonthe.

¹⁵Gatûrûme na kîgongwana kîa irio na kîa maguta ja nzeituni bikaaritagwa o rûkîîrî o rûkîîrî. Nabio biritagwe birî igongwana bia gwakîîria magiita jonthe.”

¹⁶MWATHANI Mûrungu nî aacokere arauga atîrî, “Mûnene akëeja kwaa mûtaana waawe kîthaka kîrî kîewa, kîthaka kîu gîkaa kîa mûtaana ûu na gîa nchiarwa ciaawe.

¹⁷ Îndî akëeja kwaa nthûûmba yaawe kîthaka kîrî kîewa, kîthaka kîu gîkaa kîa nthûûmba îîu mwanka mwaka jwa gûcokanîria. Rîu nîrîo kîthaka kîu gîgacoka kwaa kîa mûnene kaîrî. Ithaka bia mûnene nî rûgai rwa ataana baawe akî na nchiarwa ciaao.

¹⁸Mûnene atîbuîrîte gûtuunya muntû no ûrîkû rûgai rwaawe rwa kîthaka. Ithaka bionthe birîa akaa ataana baawe bibuîrîte kwîthîrwa birî ithaka bia rûgai rwaawe, nîkenda atîkeeje kwinyîîria antû kana abatuunya ithaka biaao.”

¹⁹Muntû ûrîa wathimaga kîûrû nî aanjûkîrie arambikia antû arîa gwaakûrûkagîîrwa naku kwaarî akuî na tûnyomba tûrîa twerekerete bwa ûrîo akuî na mpingîro îrîa îrî bwa ûmotho rûteere rwa kîarago kîa bwa ndeene. Tûu nî tûnyomba tûtûtheru twa athînjîri-Mûrungu. Nawe aroorota antû amwe rûteereene rwa bwa rûgûrû rwa tûnyomba tûu.

²⁰Arambîîra atîrî, “Aja nîo antû arîa athînjîri-Mûrungu bagaatua kûtherûkagîria kîgongwana kîa kûthiria maatia kana gîa kûthiria meeyia. Ningî nîo bagaakandagîra mîgaate ya kîgongwana nîkenda batîmiumagaria oome ya kîarago kîa bwa oome, ûtheru bwaakîo bûtîkeeje kûreetera antû ûthûûku.”

²¹Rîu aracoka arambikia kîaragoone kîa bwa oome, arambikia kîrî kona cio inya cia kîarago. O kîrî kona nî kwaarî na kaarago kaniini.

²²Kaarago kau kaarî ka ûraaja bwa mita mîrongo îîrî (20m) na wariî bwa mita îkûmi na ithaano (15m).

²³O kaarago nî kaarî na rûthingo rwa maiga rûkathiûrûkîrîte, na gûntû kwa gwakia mwanki kûgomeene na rûthingo.

²⁴Aracoka arambîîra atîrî, “Bibi nî irugîro birîa barîa batumîkagîra kîûrûûne bakaarugagîra igongwana birîa biriti nî antû.”