Read KIMERU BIBLE PROTESTANT EDITION Ezek 47 Bible Online

Ezek 47 - KIMERU BIBLE PROTESTANT EDITION bible

Ezek 47

¹ Muntû ûrîa wathimaga kîûrû nî aancookeerie mwariine jwa kîûrû. Kûrî rûûjî rwaumagîîra au rungu rwa mwari jwa kîûrû, rûkîînamaga rwîtîte bwa gaiti naru nîru rûteere rûrîa kîûrû kîerekerete. Rûûjî rûu, rwaumaga nthîgûrû rungu rwa bwa ûmotho bwa kîritîro kîa îgongwana.

²Aracoka arampumagaria kîûrûûne arambikîîria bwa mpingîro ya bwa ûrîo na aranthiûrûkia mpingîro îîu yerekerete bwa gaiti. Nako kamûuro ka rûûjî nî keenamaga kuuma bwa ûmotho.

³Muntû ûu nî aathimîre mûuro jûu erekerete bwa gaiti. Naju jwaarî jwa mita magana jataano (500m) kûreea. Rîu arambîîra mbunîîre rûûjîîne rûu au. Naru rwankinyaga nchang'ûûrû.

⁴O kaîrî arathima mûuro mita magana jataano (500m), rûûjî rûrankinya maru. Aroongeera mita ingî magana jataano (500m), rûûjî rûrankinya kauna.

⁵Ningî aroongeera mita ingî magana jataano (500m). Arambîîra mbune rûûjî rûu. Naru rûtîngîûmba kuunwa tiga muntû akîthambagîra.

⁶Muntû ûu arambîîra atîrî, “Mûtaana wa muntû, ûkwona ûntû bûbû?” Rîu arancokia rûteere rwa mûuro.

⁷Ndîgûkinya nao ndîroona nteere cia mûuro jûu irî na mîtî îmiingî mono nteere cio-ijîîrî.

⁸Muntû ûu arambîîra atîrî, “Rûûjî rûrû rûtaambûrûkaga rûgeeta bwa gaiti, rûgeetîîra kîguuruune kîa Jorodani, rûgeeta rûgatonya îrieene rîa Chumbî. Rwatonya îrieene rîa Chumbî, rweethagia rûûjî rûu rûrwega rwa kûnyua.

⁹Kûrîa rûûjî rûu rwîtagîîra, nyamû cia mîthemba yonthe nî ciîthagîrwa irî ku amwe na makûyû. Rûûjî rûu rûtûmaga îria rîa Chumbî rîgîta rûûjî rûrwega. O kûrîa rûûjî rûu rwîtagîîra nî rûtûmaga into birîa birîku bionthe bigatûûra mwoyo.

¹⁰Agwatia ba makûyû bakarûngama mpwîroone cia îria; kuuma Enigedi mwanka Enegilaimu baanîkîte ngara, naku gûkeethîrwa kûrî na makûyû ja mîthemba îmiingî ta jarîa jeethagîrwa jarî îrieene rîa Mediterania.

¹¹Îndî marimbeene na itetemeene rûûjî rûtîîthagîrwa rûrî rûrwega, rwîthagîrwa rûrî na chumbî.

¹² Nteere cia mûuro cio-ijîîrî ikauma mîtî ya mîthemba îmiingî ya kûrîîwa. Mabûûra jaayo jatîûrûûkaga kana mîtî îtiga gûciara matuunda. Îndî îgatua gûciaraga matuunda o mweri o mweri nîûntû rûûjî rwaayo ruumaga kîûrûûne. Mîtî îîu îkaeejanaga biakûrîa na mabûûra jaayo jagatumagîrwa jarî ndawa.”

¹³MWATHANI Mûrungu ariuga atîrî, “Îîjî nîyo mîanka îrîa îkagaana nthîgûrû îrîa îrî kiigai kîa mîîrîga îkûmi na îîrî ya Israeli. Mwîrîga jwa nchiarwa cia Josefu jûkagaîrwa ichunchî biîrî.

¹⁴Mîîrîga nî îgaanage ithaka bing'aneene o ta ûrîa ndaaciîtîîrie biûjûjû bieenu, nkabwaa nthîgûrû yee kiigai kîeenu.

¹⁵“Mîanka ya nthîgûrû îkeethîrwa îkari ûjû: Rûteereene rwa bwa ûrîo, kuuma îrieene rîa Mediterania gwîtîîra ntûûreene ya Hethiloni, mwanka mûcîcîbîroone jwa Hamathi, gwîta mwanka ntûûreene ya Zedadi.

¹⁶Jwîtîîre Berotha, na Siburaimu (iria irî mwankeene jwa Damaski na Hamathi) gwîta ntûûreene ya Hazari-hatikoni, îrîa îrî mwankeene jwa Haurani.

¹⁷Tontû bûû, mwanka jwa bwa ûrîo jûkauma îrieene rîa Mediterania gwîta bwa gaiti ntûûreene ya Enoni, îrîa yankeene na Damaski na Hamathi rûteereene rwa bwa ûrîo.

¹⁸Rûteereene rwa bwa gaiti, mwanka jûu jûkauma gatîgatî ka Damaski na Haurani, jwîtanie na mûuro jwa Jorodani jûrîa jwankanagia nthîgûrû ya Israeli na ya Gileadi. Ningî mwanka jûu jûgeeta jûkinye Tamari îrîa îrî îrieene rîa Chumbî.

¹⁹Rûteereene rwa bwa ûmotho mwanka jûkauma Tamari jwîîte karieene ga Meribathi-kadeshi. Kuuma au jwîte bwa ûrîo bwa gaiti jwîteenie na mwanka jwa karûûjî ka Misri, jûmunte îrieene rîa Mediterania.

²⁰“Rûteereene rwa bwa rûgûrû mwanka jûu jûkambîrîria îrieene rîa Mediterania jwîte bwa ûrîo, jûmunte mûcîcîbîro jwa Hamathi bwa rûgûrû.

²¹“Bûgae nthîgûrû îîu kîrî mîîrîga yeenu ya Israeli.

²²Bûkaagaana yo yee kiigai kîeenu, na kinya bûgaîre ageni barîa bûtûûranagia nabo, barîa barî na mîciî yaao o kûu. Ageni bau bakaagaîrwa o ta ûrîa antû ba Israeli bakagaîrwa.

²³O mwîrîgeene jûrîa muntû mûgeni akëethîrwa atwîre, au nîo akaaerwa kiigai kîaawe. Ûu nîu ûûni MWATHANI Mûrungu nkuuga.”