Read KIMERU BIBLE PROTESTANT EDITION Ezek 48 Bible Online

Ezek 48 - KIMERU BIBLE PROTESTANT EDITION bible

Ezek 48

¹Mariîtwa ja mîîrîga îîu nîjo jaja: Rûteereene rwa bwa ûrîo mwanka jwa nthîgûrû jûkauma îrieene rîa Mediterania jwîtîîre ntûûreene ya Hethiloni, jûkûrûkîîre mûcîcîbîroone jwa Hamathi, gwîta ntûûreene ya Enoni gûkinya mwankeene jwa Damaski na Hamathi. Ningî mwanka jûkaumaga bwa gaiti gwîta bwa rûgûrû. Mwîrîga jwa Dani nîju jûkagaîrwa kîthaka kîmwe.

²Kuuma bwa gaiti mwanka bwa rûgûrû rwa kîthaka kîu kîa Dani, mwîrîga jwa Asheri jûkagaîrwa kîthaka kîngî.

³Gwankana na mwîrîga jûu jwa Asheri kuuma bwa gaiti gwîta bwa rûgûrû mwîrîga jwa Nafutali jûkaagaîrwa kîthaka kîngî.

⁴Gwankana na mwîrîga jûu jwa Nafutali bwa gaiti gwîta bwa rûgûrû mwîrîga jwa Manase jûkaagaîrwa kîthaka kîmwe.

⁵Gwankana na mwîrîga jûu jwa Manase kuuma bwa gaiti gwîta bwa rûgûrû mwîrîga jwa Efuraimu jûkaagaîrwa kîthaka kîmwe.

⁶Gwankana na mwîrîga jûu jwa Efuraimu kuuma bwa gaiti gwîta bwa rûgûrû, mwîrîga jwa Rubeni jûkaagaîrwa kîthaka kîngî.

⁷Gwankana na mwîrîga jûu jwa Rubeni kuuma bwa gaiti gwîta bwa rûgûrû, mwîrîga jwa Juda jûkaagaîrwa kîthaka kîmwe.

⁸Gwankana na mwîrîga jûu jwa Juda kuuma bwa gaiti gwîta bwa rûgûrû, kîu nîkîo kîthaka kîrîa bûkaathuura bûkîathûre. Nakîo gîkeethîrwa kîrî kîa kilomita îkûmi na ijîîrî na nusu (12.5km) kwarama, kuuma bwa ûrîo gwîta bwa ûmotho. Ningî kîîthîrwe kîrî kîa ûraaja bûmwe na ithaka birîa bikeethîrwa bieei mîîrîga kuuma bwa gaiti gwîta bwa rûgûrû. Kîûrû nîkîo gîkeethîrwa kîrî kîthakeene kîu kîa gatîgatî.

⁹O kîthakeene kîu bûkaathûra rûthanju rûngî rwa kîthaka nîûntû bwa MWATHANI. Naru rûkeethîrwa rûrî rwa ûraaja bwa kilomita îkûmi na ijîîrî na nusu (12.5km) na wariî bwa kilomita îkûmi (10km).

¹⁰Kinya athînjîri-Mûrungu bakaagaîrwa gachunchî o kîthakeene kîu. Kuuma bwa gaiti gwîta bwa rûgûrû kîthaka kîaao gîkeethîrwa kîrî kîa kilomita îkûmi na ijîîrî na nusu (12.5km) na kuuma bwa ûrîo gwîta ûmotho, kîîthîrwe kîrî kîa kilomita ithaano (5km). Kîûrû kîa MWATHANI nîkîo gîkeethîrwa kîrî gatîgatî ga kîthaka kîu.

¹¹Kîthaka kîû gîkeethîrwa kîrî gîkîtheru. Nakîo gîkeethîrwa kîrî kîa athînjîri-Mûrungu ba rûrîîjo rwa Zadoki. Nabo nîbo baambathîkîrîte na bataatigana na maathana jaakwa ta antû bangî ba Israeli. Kinya athînjîri-Mûrungu ba mwîrîga jwa Lawi bataambathîkîra.

¹²Tontû bûû, athînjîri-Mûrungu bakeethîrwa barî na kîthaka rûteere rwa kîrîa gîkeethîrwa kîrî kîa Alawi, na nîkîo gîkeethîrwa kîrî gîkîtheru mono.

¹³Kinya Alawi bakethagîrwa barî na kîthaka bwa ûmotho bwa kîthaka kîa athînjîri-Mûrungu. Nakîo gîkeethîrwa kîrî kîa kilomita îkûmi na ijîîrî na nusu (12.5km) kuuma bwa gaiti gwîta bwa rûgûrû, na kîîthîrwe kîrî kîa kilomita ithano (5 km) kuuma bwa ûrîo gwîta bwa ûmotho.

¹⁴Kîthaka kîrîa kîathûrîri MWATHANI nîkîo kîrîa kîega buru nthîgûrûûne. Gîtîbuîrîte kwendua kinya aniini kana gîkûranua na kîngî kana kînenkerwa muntû kinya ûrîkû.

¹⁵Kîthaka kîrîa gîkeethîrwa gîtigeere gîtîîthîrwa kîthereetue. Nakîo nî kîa ûraaja bwa kilomita îkûmi na ijîîrî na nusu (12.5km) na wariî bwa kilomita ijîîrî na nusu (2.5km). Antû no batûûre kîthakeene kîu na ntûûra îîthîrwe îrî gatîgatî gaakîo.

¹⁶Kîthaka kîa ntûûra îîu gîkeethîrwa kîng'aneene nteere cio-inya. Rûteere rûmwe rûkethagîrwa rûrî rwa ûraaja bwa mita ngiri ijîîrî cia magana jaîrî ja mîrongo îtaano (2,250m).

¹⁷Kûthiûrûkîra kîûrû gûkeethîrwa kûrî na gûntû gûtî na gîntû kwa mita îgana rîa mîrongo îîrî na ithaano (125m) kûgiitanîîria gatîgatî.

¹⁸Kîthaka kîrîa gîkeethîrwa gîtigeere kîrî akuî na kîûrû nyuma ya kîûrû gwakwa, gîkeethîrwa kîrî bwa ûmotho bwa gûntû kûrîa kûtheru. Nakîo gîkeethîrwa kîrî kîa ûraaja bwa kilomita ithaano (5km) na wariî bwa kilomita ithaano (5km) rûteereene rwa bwa gaiti. Ningî kîîthîrwe kîrî kîa ithimi o ta biu bwa rûgûrû. Kîthaka kîu no kîrîmagwe nî antû ba ntûûra îîu.

¹⁹Muntû wonthe ûrîa ûtwîre ntûûreene îîu kinya eethîrwa arî wa mwîrîga jûrîkû no arîme kîthakeene kîu.

²⁰Tontû bûû, kîthaka kîonthe kîrîa gîkeethîrwa kîrî gatîgatî ka nthîgûrû, kîrîa gîkeethîrwa kîathûri, gîkeethîrwa kîng'aneene nteere cio-inya. O rûteere rûkethagîrwa rûrî rwa kilomita îkûmi na ijîîrî na nusu (12.5km). Kîthaka kîu nî amwe na kîrîa gîkeethîrwa gîaki ntûûra.

²¹Kîthaka kîrîa gîkeethîrwa gîtigeere gîankeene na kîûrû nyuma ya kîthaka kîa athînjîri-Mûrungu, na kîa Alawi, na kîa ntûûra, kîu nîkîo gîkaa kîthaka kîa mûnene ûrîa ûkwaathana. Nakîo gîgeeta bwa gaiti gîkinye mwankeene jwa bwa gaiti, kîrî kîa ûraaja bwa kilomita îkûmi na ijîîrî na nusu (12.5km). Ningî gîîte bwa rûgûrû gîkinye îrieene rîa Mediterania. Nakîo gîkeethîrwa kîrûngameene na ithaka bia mîîrîga. Kîu nîkîo kîthaka kîa mûnene, nakîo kîûrû gîkeethîrwa kîrî gatîgatî.

²²Tontû bûû, kîthaka kîa Alawi na kîa ntûûra bikeethîrwa birî ndeene gatîgatî ga kîthaka kîa mûnene. Kîthaka kîa mûnene gîkeethîrwa gîîkîri gatîgatî nî kîthaka kîa mwîrîga jwa Juda na mwîrîga jwa Benjamini.

²³Mîîrîga îîu îngî îkaagaîrwa kîthaka kuuma bwa gaiti gwîta bwa rûgûrû. Mwîrîga jwa Benjamini jûkaagaîrwa rûthanju rûmwe rwa kîthaka.

²⁴Gwankana na mwîrîga jwa Benjamini, mwîrîga jwa Simioni jûkaagaîrwa rûthanju rûngî rwa kîthaka kuuma bwa gaiti gwîta bwa rûgûrû.

²⁵Gwankana na mwîrîga jwa Simioni, mwîrîga jwa Isakari jûkaagaîrwa rûthanju rûmwe rwa kîthaka kuuma bwa gaiti gwîta bwa rûgûrû.

²⁶Gwankana na mwîrîga jwa Isakari, mwîrîga jwa Zebuloni jûkaagaîrwa rûthanju rûmwe rwa kîthaka kuuma bwa gaiti gwîta bwa rûgûrû.

²⁷Gwankana na mwîrîga jwa Zebuloni, mwîrîga jwa Gadi jûkaagaîrwa rûthanju rûmwe rwa kîthaka kuuma bwa gaiti gwîta bwa rûgûrû.

²⁸Gwankana na mwîrîga jwa Gadi, rûteereene rwa bwa ûmotho, mwanka jûkauma Tamari jwîte rûûjîîne rwa gîcîgîîrio rwanda rwa Maribathi-kadeshi, ningî jwîte bwa ûrîo jwankeene na mwanka jwa Misri jûkinye îrieene rîa Mediterania.

²⁹MWATHANI Mûrungu ariuga atîrî, “Ûu nîu nthîgûrû îkaagaîrwa mîîrîga ya Israeli, nîkenda ithaka birîa bikaagawa biaa baao.”

³⁰ Iji nîcio ikeethîrwa irî mpingîro cia ntûûra ya Jerusalemu: Kwambîrîîria rûteere rwa bwa ûrîo rûrîa rûrî rwa mita ngiri ijîîrî na magana jaîrî ja mîrongo îtaano. (2,250m).

³¹Naru rûteere rûu rûkeethîrwa rûrî na mpingîro ithatû cieei mariîtwa ja mwîrîga jwa Rubeni, na jwa Juda, na jwa Lawi.

³²Rûteere rwa bwa gaiti rûkeethîrwa rûrî rwa mita ngiri ijîîrî na magana jaîrî ja mîrongo îtaano (2,250m). Naru rûrî na mpingîro ithatû cieei mariîtwa ja mwîrîga jwa Josefu, na jwa Benjamini na jwa Dani.

³³Rûteere rwa bwa ûmotho rûkeethîrwa rûrî rwa mita ngiri ijîîrî na magana jaîrî ja mîrongo îtaano. (2,250m). Naru rûrî na mpingîro ithatû cieei mariîtwa ja mwîrîga jwa Simioni, na jwa Isakari, na jwa Zebuloni.

³⁴Rûteere rwa bwa rûgûrû rûkeethîrwa rûrî rwa mita ngiri ijîîrî na magana jaîrî ja mîrongo îtaano. (2,250m). Naru rûrî na mpingîro ithatû cieei mariîtwa ja mwîrîga jwa Gadi, na jwa Asheri na jwa Nafutali.

³⁵Rûthingo rwa ntûûra yonthe kûthiûrûka rûkeethîrwa rûrî rwa kilomita kenda (9km). Ntûûra îîu kuuma nandî gwîta na mbere îgeetagwa MWATHANI ARÎ GÛKÛ.