Read KIMERU BIBLE PROTESTANT EDITION Ezek 5 Bible Online

Ezek 5 - KIMERU BIBLE PROTESTANT EDITION bible

Ezek 5

¹MWATHANI nî eerîre Ezekieli atîrî, “Mûtaana wa muntû, jûkia rûchiû rûrûûgî ûrûtumîre kwenja kîreru na mûtuundu junthe. Ûcoke wîkîre mûtuundu jûu kîthimiine, ûjûthime na ûjûgaanie ichunchî bithatû.

²Gîchunchî kîmwe kîaaju ûkîîthîrie gatîgatî ga ntûûra rîrîa ntukû cia gûcîgîîrua kwaayo ikaathira. Ningî ûjûkie gîchunchî kîngî wîte ûgîkîgiitangaga na rûchiû na ûthiûrûke ntûûra. Ningî ûjûkie gîchunchî kîa bithatû ûkînyagie ruuoone. Naani nkeengana na mûtuundu jwaakîo nkûûrîte rûchiû.

³Mbere ya ûthithia ûu ûjûkie mûtuundu jûmûkai ûjwogeere gîcooreene kîa nguû.

⁴Ningî ûjûkie mûtuundu jûmwe ûjûgere mwankiine jûye. Kuumania na mûtuundu jûu mwanki jûgaataamba nthîgûrûûne ya Israeli yonthe.”

⁵MWATHANI Mûrungu ariuga ûjû, “Îîjî nî ntûûra ya Jerusalemu. Mîîkîte gatîgatî ka mîgongo îmîthiûrûkîrîte.

⁶Nî îthûûkîtie mono îkîreganaga na mooritani na Waatho bwaakwa, kinya nkûrûki ya mîgongo îngî. Nî îregeete kûthingata mooritani jaakwa kinya nkûrûki ya nthîgûrû irîa imîthiûrûkîrîte na yaarega kwathîkîra Waatho bwaakwa.

⁷Tontû bûû ni MWATHANI Mûrungu ndîbwîra atîrî, tontû nî bûregeete kwathîkîra Waatho bwaakwa na kûthingata mooritani jaakwa, nî bûthithîtie mantû jamathûûku nkûrûki ya antû ba mîgongo îrîa îbûthiûrûkîte, na bwathingata nkuagaya ciaao.

⁸Tontû bûû, Ûûni MWATHANI Mûrungu ndî mûnthû weenu na nkaabûkanûkia, mîgongo îîu îtegeete.

⁹Nkaabûkanûkia nîûntû bwa moothûûku jonthe jarîa bûthithîtie, ûrîa ntaabûkanûkia na ûrîa ntîkorobûkanûkia kaîrî.

¹⁰ Tontû bûû, aciari bakaa biakûrîa bia aana baao, nabo aana bakaa biakûrîa bia aciari baao. Naani ngaakanûkia barîa bagaatigara na mbanyaganie gûntû kunthe.

¹¹“Tontû bûû, ni MWATHANI Mûrungu, ndiuga na mma atî no mwanka mbûthirie buru na ntîbwigîîrua kîaao. Nîkwîthîrwa nî bwîkîrîte kîûrû gîaakwa mûgiro bûkîthaathagia mîrungu ya mîng'uanano na kûthithia mantû jamathûûku.

¹²Gîchunchî kîmwe kîrî bithatû kîa antû gîkooragwa nî mîrimo na mpara; gîchunchî kîngî o ta kîo gîkooragîrwa ndweene oome ya ntûûra na gîchunchî kîngî o ta kîo ngaakînyagania gûntû kunthe nkûûrîte rûchiû.

¹³“Ûu nîu nkaabatûrîkîria mûthûûro jwaakwa na ûng'eentu rîu ng'anîrwe; nabo bakaamenya ûûni MWATHANI nî ni ndaaria mantû jau nthûûri nîûntû nî baregeete kûmbathîkîra ninka.

¹⁴Ningî nkaabûethia îgaanjo na mbûethie gîntû gîa kûmeneerua nî mîgongo îrîa îbûthiûrûkîte na kinya akûrûki na njîra.

¹⁵Naabuî bûkaa antû ba kûmenwa, na gûkurungwa, na bwee gîntû gîa gûtûma mîgongo iimenyeera na îmaka rîrîa nkaabûgiitîra îgamba na mûthûûro ng'eenti. Ûu nîu ûûni MWATHANI nkuuga.

¹⁶Ngaatûma irio bieenu bithûûke bûûragwe nî mpara, nayo mpara îbwigithie ûrûrû ta antû barathi na mîgwî ya ûbai.

¹⁷ Ngaatûma mpara na nyamû cia kîthaka ciûrage aana beenu, na ntûme antû booragwe nî mîrimo na bangî booragîrwe ndweene. Ûu nîu ûûni MWATHANI nkuuga.”