Read KIMERU BIBLE PROTESTANT EDITION Ezek 7 Bible Online

Ezek 7 - KIMERU BIBLE PROTESTANT EDITION bible

Ezek 7

¹MWATHANI nî aambarîîrie arambîîra atîrî,

²“Mûtaana wa muntû, MWATHANI Mûrungu ariuga ûjû mantû jegiî nthîgûrû ya Israeli: Mûthiro jûgûkinya jûgûkinya nteere cionthe cia nthîgûrû.

³Nandî mûthiro jûkûbûkinyîîra. Nkaabûtûrîkîria mûthûûro jwaakwa; mbûgiitîre îgamba kûringana na mathithio jeenu, mbûkanûkie nîûntû bwa mantû jamathûûku jonthe jarîa bûthithagia.

⁴Ntîbûcaîîra kana mbwigîîrua kîaao. No mwanka mbûkanûkie nîûntû bwa mîîtîre yeenu îîmîthûûku, mbûkanûkie nîûntû bwa mantû jeenu jamaaî. Rîu bûkamenya ni nî ni MWATHANI.”

⁵MWATHANI Mûrungu ariuga ûjû, “Mîtino îmînene nî îjîte îthingati nî îngî.

⁶Mûthiro jûgûkinya, jûgûkinya mma. Mûthiro jwîjîte nîûntû bweenu na jûgûkinya.

⁷Ntukû ya ûûî îgûkinya kîrî buî bûtwîre nthîgûrûûne. Îgiita rîgûkinya rîa kîrîro na gûtî kûgwîrua kaîrî bûrî kûu irîmeene.

⁸Ndî akuî kûbûtûrîkîria mûthûûro jwaakwa; mbûtûrîkîrie marûrû jaakwa. Nkaabûkanûkia nîûntû bwa mîîtîre yeenu îmîthûûku; mbûkanûkie nîûntû bwa mantû jeenu jamaaî.

⁹Ntîbwigîîrua kîaao kana mbûcaîîra; no mwanka mbûkanûkie nîûntû bwa mîîtîre yeenu îmîthûûku mbûkanûkie nîûntû bwa mantû jeenu jamaaî. Nîkenda bûkamenya ni nî ni MWATHANI ûrîa ûkanûkaanagia.

¹⁰Ntukû îgûkinya! Ntukû nîyo îîjî! Kûthirua kweenu gûgûkinya. Ûmaramari na wikumia bûkwingîa mono.

¹¹Wînyangia bwingîîte bwaa rûturo rwa gûkanûkia ûthûûku. Gûtî antû bagaatigara kana ûtonga bwaao bûtigara; kana gîntû kîrî na gîtûmi gîtigara.

¹²Îgiita rîrî akuî, na ntukû îgûkinya. Agûri nî batige kûgwîrua, na eendia baithikîîre, nîkwîthîrwa îkanûkia nî rîa antû bonthe.

¹³Aringi biashara batîkorocoka kwona birîa beendeetie barî mwoyo. Nîkwîthîrwa kîoneki kîu kîegiî gûkanûkua kwa antû bonthe no mwanka kîûjûre. Antû batîûmba kwonokia mîoyo yaao nîûntû nî eeyia.

¹⁴Antû bakûringa tarumbeta na baithûranîra îndî gûtî we ûgwîta ndweene nîkwîthîrwa îkanûkia nî rîa antû bonthe.

¹⁵Oome kûrî na ndwaa, na nyomba ndeene kûrî na mpara na mîrimo. Barîa barî miuundeene bakooragîrwa ndweene; barîa barî ntûûreene booragwe nî mpara na mîrimo.

¹⁶Barîa bakoonoka bagaitia irîmeene ta ijîa biîngi kuuma mîguuruune, o muntû aithikîre nîûntû bwa meeyia jaawe.

¹⁷O muntû nî agoogoi njara, na maru jagîa rûûjî.

¹⁸Bageekîra mathango kwonania ûrîa baithikîrîte, bagîteetemaga nî ûguaa. Bakoojûrwa nî nthao, na beenjwe mîtwe yaao.

¹⁹Bakaagera fetha ciaao njîreene, na thaabu yaao îtîonerwa gîtûmi. Thaabu na fetha itîbateethia ntukû îrîa MWATHANI akabakanukia. Ningî itîbathiria mpara kana itumîrwa kûgûra biakûrîa. Nîkwîthîrwa thaabu na fetha nîcio ciatûmîre beeyia.

²⁰Kûrî îgiita baikumagia nîûntû bwa maiga jaao ja goro na jamathongi, îndî barajatumîra kwithithîria mîrungu ya mîng'uanano, îrîa nthwîre kwona. Tontû bûû, nkaethia ûtonga bwaao gîntû kîrî na mûgiro.

²¹Nkaarekeria antû ba mîgongo îngî batae ûtonga bwaao, na ntûme antû babaathûûku batae ûtonga bwaao na beekîre ûtonga bûu mûgiro.

²²Nkabautatîra nîkenda beekîra kîûrû gîaakwa mûgiro; atuunyani bagaatonya ku, bagîîkîre mûgiro.

²³Thuranîreeni nyororo! Nîkwîthîrwa nthîgûrû nî yûjûri ûûragani na ntûûra nî yûjûri ûtuunyani na wînyangia.

²⁴Nkaareeta antû ba mîgongo îrîa mîthûûku buru batae nyomba ciaao; Nkabathiria inya îrîa baikumagîria, na kîûrû kîaao gîîkîrwe mûgiro.

²⁵Rîrîa rwakaî rûkabeejîra, bagaacwaa thîîrî, îndî thîîrî îtîoneka.

²⁶Mûtino jûmûnene jûkathingatwa nî jûngî, nteto itîramenyekana bwega îgaatamba na ithingatwe nî ingî. Antû bageeta kîrî iroria gûcwaa bioneki; Athînjîri-Mûrungu bagaatiga kûritana Waatho, na akûrû baage kîrîra gîa kweejana.

²⁷Mûnene akaithikîîra, atongeeria bakeethîrwa batî na wîrîgîîro, na antû nthîgûrûûne bakeethîrwa batuîkangi maru. Nkaabakanûkia kûringana na mîîtîre yaao; na mbagiitîre îgamba kûringana na ûrîa bagiitagîra bangî. Rîu nîrîo bakaamenya ni nî ni MWATHANI.”