Read KIMERU BIBLE PROTESTANT EDITION Ezek 8 Bible Online

Ezek 8 - KIMERU BIBLE PROTESTANT EDITION bible

Ezek 8

¹Kûrî ntukû ya ithaano ya mweri jwa îtaantatû, mwakeene jwa îtaantatû nyuma ya rîrîa twaikîrue kîthamîrioone, atongeeria ba antû ba nthîgûrû ya Juda, barîa baarî kîthamîrioone nî baakari nthî amwe naani nyomba yaakwa. O ntûti inya ya Mweneinya MWATHANI îrambîjîîra.

² Naani rî nî ndaaciûkîrie meetho ndîroona gîntû gîakari ta muntû. Kuuma arîa gwakari ta kauna kwînama gîntû kîu gîakari ta mwanki, na kuuma kauna gwitia gîakari ta îturutia rîgûkengakenga.

³Gîntû kîu gîakari ta muntû, kîratambûrûkia îrîa yaakari ta njara, kîrangwata mûtuundu. Mûrungu nî aanguûrîîre kîoneki ndîroona Roho waawe anjûkia ambûkîîria ndeeta ncuuracuurîte ambikia Jerusalemu. Nawe arambikia mûrangoone jwa ndeene jwa mpingîro ya kîûrû ya bwa ûrîo, antû kwaarî na mûrungu jwa mûng'uanano jûrîa jwatûmaga Mûrungu aigua rûriitho.

⁴ Au nîo ndoonere weerû bûbûnene bwa ûkumio bwa Mûrungu wa Israeli bûkîenaenagia. Weerû bûu bwakari ta bûrîa ndoonere ndî rûteere rwa mûuro jwa Kebari.

⁵Rîu Mûrungu arambîîra atîrî, “Mûtaana wa muntû, ciûkia meetho ûraithîrie bwa rûteere rwa bwa ûrîo.” Naani ndîraciûkia meetho ndîroona mûrungu jwa mûng'uanano jûrî rûteere rwa bwa ûrîo rwa gîkûrûkîîro gîa mpingîro akuî na kîritîro kîa igongwana. Mûng'uanano jûu nîju jwatûmaga Mûrungu aigua bûbûûî mono.

⁶Mûrungu arambîîra atîrî, “Mûtaana wa muntû nî ûkwona ûrîa antû bakûthithia? Nî ûkwona mantû jamathûûku jarîa antû ba Israeli bakûthithia antû aja, jagûmpînga jambikia kûûraja na kîûrû gîaakwa? Ûkoona kinya mantû jangî jamathûûku nkûrûki ya jaja.”

⁷Ningî Mûrungu arambikia mpingîroone ya Kîarago kîa Mûthia. Naani ndatega ndiroona gîkutho rûthingoone.

⁸Rîu arambîîra atîrî, “Mûtaana wa muntû tûra rûthingo.” Naani ndîratûra rûthingo, ngîtega nî kwaarî na mwari.

⁹Aracoka arambîîra atîrî, “Tonya ndeene woone moothûûku jarîa bakûthithia antû aja.”

¹⁰Tontû bûû, ndîratonya na ndîratega. Ndîroona nthingo iringi mbicha cia mîthemba ya nyamû cionthe irîa nthûûku irîa ikuaga na nthî ithiûrûkîte kunthe, na mîrungu ya mîng'uanano yonthe îrîa îthaathagua nî antû ba Israeli.

¹¹Mbere ya nyamû iu nî kwaarî na akûrû mîrongo mûgwanja ba Israeli baarûngami amwe na Jaazania mûtaana wa Shafani. O mûkûrû nî aagwete karaî ga kwîîthîria ubaani, na toogi nî yaaumaga ubaaniine îîu.

¹²Aracoka arambîîra atîrî, “Mûtaana wa muntû, ûkwona ûrîa atongeeria ba antû ba Israeli bakûthithîria muunduune? O muntû arî arîa eekaga mîrungu yaawe ya mîng'uanano. Nîkwîthîrwa bo baugaga atîrî, ‘MWATHANI atîgûtwona, agûtiganîria nthîgûrû.’”

¹³Ningî arambîîra atîrî, “Ûkoona bakîthithia mantû jamathûûku kinya nkûrûki ya jaja.”

¹⁴Rîu Mûrungu nî aambikîrie mpingîroone ya bwa ûrîo ya kîûrû kîa MWATHANI. Nabo aka nî baakari nthî bakîrîraga nîûntû bwa gûkua kwa mûrungu jûrîa jweetagwa Tamuzi.

¹⁵Ningî nî aambûrîrie atîrî, “Mûtaana wa muntû nî ûkwona ûntû bûbû? Ûkoona kinya mantû jangî jamathûûku nkûrûki ya jaja.”

¹⁶MWATHANI nî aambikîrie kîaragoone kîa ndeene kîa nyomba ya MWATHANI. Au mwariine jwa kîûrû kîa MWATHANI, na gatîgatî ka au gûkûrûkagîîrwa na kîritîroone kîa igongwana, nî kwaarî na antû ta mîrongo îîrî na bataano bautatîrîte kîûrû kîa MWATHANI. Nabo beerekerete rûteere rwa bwa gaiti bakîthaathayia riûa.

¹⁷Nawe nî aambîrîre atîrî, “Ûkwona ûntû bûbû gwe mûtaana wa muntû? Nîka bûrî ûntû bûbûniini antû ba Juda kûthithia moothûûku jarîa bakûthithia antû aja? Nîka bakûthithia mantû jau boojûria nthîgûrû wînyangia nîkenda banthûûria? Tîka bakûnduma na njîra cionthe?

¹⁸Tontû bûû, nkaabakanûkia ndî na mûthûûro, na ntîbacaîîra kana mbaigîîrua kîaao kinya bandîrîra na kajû, ntîthikîîra kîrîro kîaao.”