Read KIMERU BIBLE PROTESTANT EDITION Ezek 9 Bible Online

Ezek 9 - KIMERU BIBLE PROTESTANT EDITION bible

Ezek 9

¹Ningî nî ndaaigîrue Mûrungu agîîtanaga na kajû gakanene akiugaga atîrî, “Njûûni aja buî bwîjîte gûkanûkia ntûûra. Njûûni bûgwete mathaga jeenu ja ndwaa.”

²Atîrî, antû batantatû barauma rûteere rwa bwa mpingîro ya bwa rûgûrû, îrîa yerekerete bwa ûrîo. O muntû nî aagwete mathaga jaawe ja ndwaa. Ningî nî baarî amwe na muntû weekîrîte nguû cia gatani na nî aagwete gîntû gîa kwaandîka nakîo. Nabo antû bau nî beetîre bararûngama rûteere rwa kîritîro kîa igongwana kîrîa kîaathithîtue na îturutia.

³Nabu weerû bwa mwago jwa Mûrungu wa Israeli bûrîa bweenagia mono bûkîonania atî arî antû au, bûraumauma au kîrî akerubimu bûreeta mpingîroone ya kîûrû. MWATHANI areeta muntû ûrîa weekîrîte nguû ya gatani ûrîa wagwete gîntû gîa kwaandîka,

⁴ aramwîra atîrî, “Îtania na ntûûra yonthe ya Jerusalemu ûgîîkagîra antû rwano ûthiû barîa bathûûri na bathîînîte nîûntû bwa mantû jamathûûku jarîa jakûthithua ntûûreene.”

⁵Ningî nî eerîre barîa bangî ni nkiigagua atîrî, “Mûthingateeni bwîtanie na ntûûra bûkîûragaga antû. Menya bwigua kîaao kana bûbacaîîra.

⁶Ûrageni antû babakûrû, na nthaka na aarî na aka na twaana îndî menya bûringithia barîa beekîri rwano ntong'o. Ningî aambîrîrieni kîûrûûne.” Tontû bûû, baraambîrîria na akûrû barîa baarî kîûrûûne.

⁷Mûrungu nî aabeerîre atîrî, “Îteeni bûûjûrie biimba kûu biaragoone bia kîûrû nîkenda kîûrû kîgîa mûgiro.” Tontû bûû, baraumagara bareeta bakîûraaga antû ntûûreene.

⁸Nabo bakîûraganaga o ûu, ûûni nî ndaatigîrwe ninka, ndîratirithia ûthiû nthî ndîrarîra, ndîrauga atîrî, “Wûi itû MWATHANI Mûrungu. Nîka ûkaathiria antû bonthe barîa batigeere Israeli nîûntû bwa ûrîa ûthûûrîîtue nî Jerusalemu?”

⁹Mûrungu arancokeria atîrî, “Antû ba Israeli na Juda nî bathûûkîtie na inya mono. Nî booraganîte nthîgûrûûne kunthe na batîkûthithanîria mantû ja îota kûu Jerusalemu. Bo bariuga atî, ‘Ûûni MWATHANI nî ntiganîrîtie nthîgûrû na ntîûmba kwona ûrîa bakûthithia.’

¹⁰Îndî uûni ntîbaigîîrua kîaao kana mbacaîîra îndî nkaabarîaa kûringana na ûrîa bathithîtie.”

¹¹Rîu, muntû ûrîa weekîrîte nguû ya gatani na waarî na gûntû gwa kwaandîka aracoka kîrî we arauga atîrî, “Ndîkûthithia ûrîa ûkûmbîîrîte nthithie.”