Read KIMERU BIBLE PROTESTANT EDITION Dan 1 Bible Online

Dan 1 - KIMERU BIBLE PROTESTANT EDITION bible

Dan 1

¹ Mwakeene jwa îthatû jwa waathani bwa Jehoiakimu mûnene wa Juda, Nebukadineza mûnene wa Babiloni nî aîthûkîîre Jerusalemu aramîcîgîîria.

² MWATHANI nî eetîkîrîrie Jehoiakimu, mûnene wa Juda, agwatwa nî Nebukadineza na into bimwe bia kîûrû bitawa. Nebukadineza nî eetîre nawe amwe na into biu nthîgûrûûne ya Shinari, nyomba ya mîrungu yaawe, na areeka into biu kûrîa into bia mûrungu jwaawe biakaraga.

³Mûnene nî eerîre Ashipenazi ûrîa waarî mûrûngamîîri wa aakûre baawe, athuure nthaka imwe kuuma kîrî Aisraeli barîa baarî kîthamîrioone. Aramwîra athuure nthaka cia kuuma mîciî ya anene na cia mîciî îrîa yaarî îgweta.

⁴Nthaka iu no mwanka ciîthîrwe ithongomi itî na wonje noo bûrîkû, na ikîmenyaga mantû jamaingî, na irî na ûûme, na iritani bwega, na ikîûmbaga gûtumîka gîkaroone kîa mûnene. Rîu Ashipenazi abaritane kûthoma na kwaandîka rûthiomi rwa Ababiloni.

⁵Mûnene arauga barûmague ntukû cionthe irio bibiega birîa birîjagwa nî mûnene amwe na ndibei îrîa anyunyaga. Ningî arauga baritanwe mîaka îthatû, rîu bareetwe mbere ya mûnene.

⁶Kîrî nthaka iu nî kwaarî na Danieli na Hanania na Mishaeli na Azaria ba mwîrîga jwa Juda.

⁷Mûrûngamîîri wa aakûre nî aabaeere mariîtwa jaja: areeta Danieli Beliteshaza, na areeta Hanania Shadraka, na areeta Mishaeli Meshaki, na areeta Azaria Abedinego.

⁸Îndî Danieli aratua atîciîkîra mûgiro na irio bibiega bia mûnene, kana ndibei îrîa mûnene aanyunyaga. Tontû bûû, arooria mûrûngamîîri wa aakûre amwîtîkîîrie atîkaarîe irio biu aciîkîra mûgiro.

⁹Mûrungu aratûma Ashipenazi aigîîrua Danieli kîaao na amûthithîria bwega.

¹⁰Mûrûngamîîri ûu wa aakûre areera Danieli atîrî, “Nî ngûkîra Mwathi waakwa mûnene ûrîa uugîîte irio birîa bûbuîri kûrîa na ndibei îrîa bûbuîri kûnyua eeja kwona bûrî na mîîrî itîthongomi ja nthaka ingî cia nthukî yeenu. Nkëeja kûthithia ûu, nîka bûkambîkîra ûgwatiine bwa kûûragwa nî mûnene.”

¹¹Rîu Danieli areera mûrûngamîîri wa aakûre ûrîa waathuuri amenyagîîra Danieli, na Hanania, na Mishaeli, na Azaria atîrî,

¹²“Tûtegeere tuî nthûûmba ciaaku ntukû îkûmi. Ka tûrûmague nyani na tûkuundague rûûjî.

¹³Rîu ûtûng'uananie na nthaka irîa irîjaga biakûrîa bibiega bia mûnene. Naagwe ûthithîrie nthûûmba ciaaku ûrîa ûkeenda kûringana na ûrîa tûkeethîrwa tûkari.”

¹⁴Tontû bûû, mûtongeeria ûu areetîkîîria ûntû bûu, na arabaa irio biu ntukû îkûmi.

¹⁵Ntukû iu îkûmi ciathira baroonekana bathongomi na banori nkûrûki ya nthaka cionthe irîa ciarîjaga biakûrîa bibiega bia mûnene.

¹⁶Kuuma rîu mûtongeeria ûu aratua kûbarûmagia nyani antû a biakûrîa na biakûnyua bia mûnene.

¹⁷Mûrungu nî aatûmîre nthaka iu cio-inya igîta ûûme na ûtea bwa kûmenya kîthomo kîonthe na nkuagaya. Ningî Danieli nî aarî na ûûme bwa gûtaûra bioneki na irooto bionthe.

¹⁸Nyuma ya îgiita rîrîa mûnene aaugîîte nthaka iu iritanwe rîkûthira, mûrûngamîîri wa aakûre nî aabaikîrie kîrî Nebukadineza.

¹⁹Mûnene arabaarîria, na kîrî nthaka iu cionthe gûtî we woonekere akari ta Danieli, kana Hanania, kana Mishaeli, na Azaria. Tontû bûû, barambîrîria gûtumîkaga gîkaroone kîa mûnene.

²⁰Îgiita rîonthe rîrîa mûnene eendaga kûmenya ûntû, nthaka iu cio-inya nî ciamûcokagîria irî na ûûme bûbûnene na ûmenyo bûbwingî. Ningî baacokagia bûbwega mainda îkûmi nkûrûki ya aringi-biama na aringia ba nthîgûrû irîa aathaga cionthe.

²¹Danieli nî aakarîre gîkaroone kîa mûnene mwanka mwakeene jwa mbere jwa waathani bwa Koreshi.