Read KIMERU BIBLE PROTESTANT EDITION Dan 11 Bible Online

Dan 11 - KIMERU BIBLE PROTESTANT EDITION bible

Dan 11

¹Mwakeene jwa mbere jwa wathani bwa Dario ûrîa Mûmede nî ndaciritîre kûmwigîka na kûmwîkîra inya.

²Mûraîka areeta na mbere arambîîra atîrî, “Gankwîre ûûma bungwa. Nandî rî, anene bathatû bakaatha Parasia; na mûnene wa bana akeethîrwa atongi nkûrûki ya bau bangî bonthe. Nawe rîrîa agaatonga mono agîte inya agookaûkia antû bonthe nîkenda baithûkîra ûnene bwa Agriiki.

³“Rîu mûnene ûrî na inya mono akaumîra aathanage na inya înene na athithagie o ûrîa akwenda.”

⁴Nawe aumîra anenea mono, ûnene bwaawe bûkagaanua îchunchî bina, îndî bitîathagwa nî nchiarwa ciaawe, kana biaathwa na waathani bûrîa aathanaga nabû. Nîkwîthîrwa agatunywa waathani bûu, nabu bwîte kîrî bangî batî bau.

⁵Mûnene wa Misri akeethîrwa arî na inya mono, îndî ûmwe wa atongeeria baawe ba njûûrî akaatha ûnene bûbûnene nkûrûki.

⁶Nyuma ya mîaka kathûmba mma, mûnene wa Misri akagwataanîra na mûnene wa Sîria; na mûnene wa Misri amûnenkere mwarî waawe amûjûkie. Îndî ngwatanîro îîu îtîkarakara, na mwarî ûu, amwe na mûkûrû waawe, na mwana waawe, na nthûûmba irîa cieetanîrie nawe, bakooragwa bonthe.

⁷Nyumeene, ûmwe wa ndûgû ciaao agatuîka mûnene. Nawe akaithûkîra mûnene wa Sîria, abatonyere gûntû kwaao kûrîa kûrikie na aboombe.

⁸Nawe agacokia mîrungu yaao ya mîng'uanano Misri, na into bia thaabu na fetha birîa biathûrîri mîrungu îîu. Nawe agakara kagiita atîkwithûkîra mûnene wa Asîria.

⁹Mûnene wa Sîria akaithûkîra Misri, îndî akeengwa acoke kwaao.

¹⁰Nabo ataana ba mûnene wa Sîria bakaithuranîra nîûntû bwa ndwaa, bathuranîre njûûrî înene. Nayo njûûrî îîu îgeeta îkoondorie ta îkoondoria na ithûkîre gûntû kûrîa kwirigîri kwarika kwa mûnthû waao.

¹¹Mûnene wa Misri akathûûra aumagare arwee na mûnene wa Sîria, nawe akoomba njûûrî îîu yonthe amûtae.

¹²Nawe agaikumia mono nîûntû bwa ûûmbani bûu na nîûntû bwa gûtaa njûûrî îîu yonthe ya ngiri magana îndî atîîta na mbere kuumbanaga.

¹³Mûnene wa Sîria agacoka kwaao, oothûranie njûûrî îngî înene nkûrûki ya îrîa ya mbere. Narîo îgiita rîgaakinya rîrîa akaumagara na njûûrî îîu na into bia kûng'ana eete ndweene.

¹⁴Rîu nîrîo antû babaingî bakaarega kwathîkîra mûnene wa Misri. Nabo antû kuuma nthîgûrû yaaku gwe Danieli bakaumîra batige kwathîka nîûntû bwa kwona kîoneki, îndî bakoombwa.

¹⁵Tontû bûû, mûnene wa Sîria ageeta acîgîîrie ntûûra oombaûmbanie mîtaro bwega amîthûkîre na amîtae. Nacio njûûrî cia Misri igatiga kûrwaa, kinya asikarî barîa beega buru batîûmba kûrwaa nîûntû gûtî inya bakeethîrwa batigi nayo.

¹⁶Îndî mûnene wa Sîria akabaithûkîra, abathithîrie o ûrîa akeenda nîûntû batîûmba kûrwaa nawe. Mûnene ûu wa Asiria agataa nthîgûrû îîu ya wîrane yonthe, na îthîrwe îrî waathoone baawe.

¹⁷Mûnene wa Sîria nawe akabanga gwîta ndweene na njûûrî înene. Ageeka kîrîkanîro na mûnene mûnthû na amûnenkere mwarî waawe amûgûre nîkenda oomba kûthiria ûnene bwa mûnthû ûu. Îndî mûbango jûu jûtîbua.

¹⁸Nyuma ya ûu akaithûkîra nthîgûrû irîa ciankeene na îria, na oombe inyiingî ciaacio. Îndî mûtongeeria wa ndwaa wa kûngî akamûûmba amûthirie rwikumio. Agatûma mûnene wa Sîria acokerwe nî ûthûûku bwaawe.

¹⁹Mûnene ûu wa Sîria agacoka nthîgûrûûne yaawe gîkaroone kîaawe kîrîa kiirigîri kîarika, îndî akoombwa ndweene athirue buru.

²⁰“Nawe akathingatwa nî mûnene ûngî ûrîa ûkainyîîria antû na ûgoti akîenda gûtongia ûnene bwaawe. Îndî nyuma ya îgiita rîrîkai akooragwa, na atîûragîrwa ndweene kana weerûûne oome.”

²¹Mûraîka areeta na mbere arambîîra, “Antûûne a mûnene ûu wa Sîria gûkaumîra mûnene ûmûthûûku ûtîagîrîte kwîthîrwa arî mûnene.” We akeeja na mpwîî ajûkie ûnene na njîra ya waayia.

²²Nawe akathiria njûûrî cionthe irîa ikarûngama mbere yaawe, na kinya mûthînjîri-Mûrungu ûrîa mûnene akathirua.

²³Nawe ageekaga kîrîkanîro na mîgongo îngî, amîaîîrie na agîte inya înene mono kinya këethîra antû barîa akeethîrwa akîathaga nî babakai.

²⁴Nawe na witho akaithûkagîra nthîgûrû irîa itongi na athithîrie nthîgûrû iu mantû jataathithua nî muntû wa rûrîîjo rwaao. Nawe akagaaga into bîrîa ataîte kîrî antû baawe. Akabangaga kwithûkîra gûntû kûrîa gwaki kwarikua, îndî akathithia ûu kagiita gagakai.

²⁵“Akoothûrania njûûrî înene nîkenda aithûkîra mûnene wa Misri.” Îndî mûnene wa Misri akeethîrwa arî na njûûrî înene mono nkûrûki. Mûnene wa Misri akaîrua na atîûmbana.

²⁶Amwathi kîrîra baawe ba ndeene nîbo bakamwînyangia. Njûûrî yaawe îkathirua na asikarî booragwe babaingî mono.

²⁷Anene bau bobaîrî nabo bagakara meetheene barîjanîre, îndî mîbango yaao îkeethîrwa îrî îmîthûûku, na bakeerana mantû ja ûrongo, nabu gûtî u bûgaateethia, nîûntû îgiita rîaabu rîtîîthîrwa rîkinyîte.

²⁸Mûnene wa Sîria agacoka nthîgûrû yaawe na into birîa akethîrwa ataîte, îndî akeethîrwa agiitîte kûthiria antû ba kîrîkanîro kîa Mûrungu. We akathithia o ûrîa akwenda rîu acoke nthîgûrû yaawe.

²⁹“Nyumeene mûnene wa Sîria akaithûkîra Misri kaîrî. Îndî îgiita rîu rîtîîthîrwa rîkari ta rîrîa rîa mbere.

³⁰Aroma bakeeja na meri kûrwaa nawe, tontû bûu akaigua ûguaa, acoke athûûri mono, akîendaga kûûraga antû ba kîrîkanîro kîa Mûrungu. Mûnene ûu akathingata kîrîra kîa barîa batigîte kwaa antû ba kîrîkanîro kîa Mûrungu.

³¹ Asikarî baawe bamwe bageekîra kîûrû mûgiro, batigithie antû kûritaga igongwana bia o ntukû na barûngîke mûrungu jwa mûng'uanano au kîûrûûne.

³²Nawe akaîria barîa batigîte wîtîkio, îndî barîa baijî Mûrungu waao bakarûngama batîkwebaeba.

³³Nabo barîa barî na kîrîra bakoomîagia antû baingî. Îndî îgiita rîng'anona, antû bau barî kîrîra bamwe bakooragwa, bangî baîthue, na bangî baikue kîthamîrioone, na bangî batawe.

³⁴Rîrîa bakeethîrwa barî thînene, bakoona ûteethio bûbûkai. Nabo antû bageeta rûteere rwaao nîûntû bwa kwenda kwiguna.

³⁵Bamwe ba antû bau barî na kîrîra, bakooragwa, ûntû bûu bûgatûma beekîrwe inya, na batherue, beerûûwe mwanka îgiita rîa mûthia, rîrîa rîtuui.

³⁶ “Mûnene wa Sîria akathithia o ûrîa akwenda. Agaikumia akiugaga nîwe mûnene nkûrûki ya mîrungu yonthe, na mûnene kinya nkûrûki ya Mûrungu wa ûrîa mûnene. Akathithia ûu mwanka rîrîa Mûrungu akamûkanûkia; nîkwîthîrwa ûrîa gûtuui nîu gûkathithua.

³⁷Mûnene ûu atînogua nî mîrungu ya biûjûjû biaao, kana mûrungu jûrîa jwendi nî aka. We atîtindanîra na mûrungu noo jûrîkû nîûntû akathûgaania nîwe mûnene nkûrûki yaayo yonthe.

³⁸Îndî we agatîîa Mûrungu jûrîa jûkaragia gûntû kûrîa gwaaki kwarika. Mûrungu jûu akaajûtîa na kûjûritîra thaabu na fetha na maiga ja goro na biewa bia goro na nî mûrungu jûrîa jûtaijîîwe nî biûjûjû biaawe.

³⁹Nîkenda oomba gûkaria gûntû kwaawe kûrîa gwaki kwarikua, agatumîra antû barîa bathaathagia mûrungu jwa kûngî. Nabo barîa bonthe bamwathîkagîra arî mûnene waao, akabaneneia batuîke athani na abaee ithaka birî biewa.

⁴⁰“Îgiita rîa mûthia rîa mûnene wa Sîria rîakinya, mûnene wa Misri akamwithûkîra. Mûnene wa Sîria akairûîra na inya yonthe, agîtumagîra mbarathi, na ngaarî cia ndwaa, na meri. Nawe akaithûkîra nthîgûrû inyiingî aikoondorie ta ûrîa rûûjî rokoondoragia.

⁴¹Ningî akaithûkîra kinya nthîgûrû îrîa ya wîrane oorage antû ngiri makûmi, îndî antû ba Edomu, na ba Moabu, na barîa baatîgere ba Amoni bakamatûka.

⁴²Rîrîa akaithûkîra nthîgûrû iu cionthe akaithûkîra kinya Misri.

⁴³Agataa mîthithû ya Misri ya thaabu na fetha, na into biaayo bia goro. Ningî akaithûkîra antû ba Lîbia na ba Ethiopia.

⁴⁴Îndî nteto irîa akaigagua kuuma bwa gaiti na bwa ûrîo igatûma aigua ûguaa mono, na oorage antû babaingî na mûthûûro.

⁴⁵Akarûngîka maema jaawe ja ûnene gatîgatîîne ka îria na kîrîma kîrîa gîaki kîûrû. Îndî amwe na bûu agakua, na gûtî muntû ûkeethîrwa arî o wa kûmûteethia.”