Read KIMERU BIBLE PROTESTANT EDITION Dan 4 Bible Online

Dan 4 - KIMERU BIBLE PROTESTANT EDITION bible

Dan 4

¹Mûnene Nebukadineza nî aatûmîre nteto iji kîrî antû baa mîgongo yonthe, na ba mîthemba yonthe, na ba nthiomi cionthe nthîgûrûûne yonthe, arauga atîrî, “Jûkieni nkeethi.

²Nî nkwona kwagîrîte mbwîra biama na iriga birîa Mûrungu Ûrîa Ûrî Îgûrû buru ambonetie.

³Biama bia Mûrungu nî bibinene, iriga birîa athithaagia nî bia inya. Ûnene bwaawe nî ûnene bwa gûtûûra, na aathanaga kuuma nthukî gwîta îngî.

⁴“Ûûni Nebukadineza ndaarî nja yaakwa nthinyaarîte.

⁵Naani ndîraroota kîrooto gîatûmîre ndîrakîra mono. Rîrîa ndaamami nî ndoonere bioneki birandigaria.

⁶Tontû bûû, ndîrauga antû barîa boome bonthe ba Babiloni bareetwe kîrî ni, nîkenda bambîîra ûrîa kîrooto kîu kîaugaga.

⁷Nabo aringia, na aringi-biama, na Ababiloni, na barîa baijî mantû ja njota bareeja. Naani ndîrabeera kîrooto, îndî batoombîre kûmbîîra ûrîa kîaugaga.

⁸Nyumeene, Danieli areeja kîrî ni, we ûrîa weetagwa Beliteshaza o ta ûrîa mûrungu jwaakwa jweetagwa. Nawe Danieli ûu nî aarî na Roho wa mîrungu îmîtheru. Nawe ndîramwîra kîrooto, atîrî,

⁹Itû Beliteshaza mûrûngamîîri wa aringi-biama, nîûntû nî nkûmenya ûrî na Roho wa mîrungu îrîa mîtheru, na atî gûtî kîriga gîkûrema. Kîu nîkîo kîrooto mbîîra ûrîa gîkuuga.

¹⁰Rîrîa ndaamami gîtandeene nî ndoonere kîoneki; ndîroona mûtî jûmûnene jûmûraaja, jûrî gatîgatî ka nthîgûrû.

¹¹Mûtî jûranenea jûragîta inya mono, naju jûratiira îgûrû, naju nî jwonekaga nthîgûrûûne kunthe.

¹²Mabûûra jaaju jaarî jamathongi, na matuunda jaaju jaarî jamaingî, jomba kûrîwa nî antû ba nthîgûrû yonthe. Nyamû cia kîthaka nî cionaga mwigunye kîrî ju, na nyoni îrîa îburûkagîra îgûrû nî ciatûûraga mpang'iine, na biûmbe bionthe nî biarîjaaga kuuma kîrî ju.

¹³“Rîrîa ndaamami gîtandeene nî ndoonere kîoneki na mûtwe; ndîroona mûraîka, waciûkîîtie meetho araithîrîtie auma îgûrû.

¹⁴Nawe arauga na kajû gakanene atîrî, ‘Kûûra mûtî jûu, na ûgiitange mpang'i ciaaju. Jûûrûre mabûûra na ûnyaganie matuunda jaaju. Nacio nyamû cia kîthaka nî imatûke ciume ruungu rwaaju na nyoni iburûke ciume mpang'iine ciaaju.

¹⁵Îndî ûtige gîtinkî na mîri yaakîo nthîgûrû, gîtinkî kîu kîogi na nyororo cia chuuma na îturutia. Ûgîtige nyakiine nau kîeniine. “‘Rekeeria muntû ûu agwîrwe nî îme na atûûranagîre na nyamû cia kîthaka nau kîthakeene.

¹⁶Nî atuunywe mathûgaanio jaawe, eekîrwe mathûgaanio ja nyamû ya kîthaka, atûûre kîthakeene mîaka mûgwanja.

¹⁷Jau nîjo matua ja araîka barîa bakaragia baciûkîtie meetho, mwanka kenya nîkenda barîa batwîre mwoyo bamenya atî Ûrîa Ûrî Îgûrû buru nîwe ûnenkagîra antû waathani; akabûnenkanîra kîrî o muntû ûrîa akwenda, kinya kîrî barîa aniini buru.’

¹⁸Kîrooto kîu nîkîo ûûni mûnene Nebukadineza ndaarootere. Itû Beliteshaza, mbîîra ûrîa kîrooto kîu gîkuuga, nîûntû antû barîa boome bonthe ba nthîgûrû îrîa mbathaga batîûmbîte kûmbîîra. Îndî gwe woomba kûmbîîra ûrîa gîkuuga nîûntû Roho wa mîrungu îrîa mîtheru îrî ndeene yaaku.”

¹⁹Danieli ûu weetagwa Beliteshaza nî aathûgaanîrie mantû jau ararigara mono kagiita gagakai. Mûnene aramwîra atîrî, “Beliteshaza menya ûrigarua nî kîrooto kîu, kana ûrîa gîkuuga.” Beliteshaza aramûcokeria atîrî, “Mwathi waakwa, kîrooto kîu kîrwethîrwa kîegiî barîa bakûthwîre!

²⁰Mûtî jûrîa woonere jûrîa jwakûrîre jûranenea mwanka jûratiira îgûrû, na nî jwonekaga nthîgûrûûne yonthe;

²¹mûtî jûu jwaarî na mabûûra jamathongi, na matuunda jamaaingî, na jwaarî na irio bia antû bonthe; jûrîa nyamû cia kîthaka cionaga mûng'unye na nyoni îrîa îburûkagîra îgûrû itûûraga mpang'iine ciaaju,

²²mûtî jûu nîgwe mûnene! Nîgwe ûneneete wagîta inya, nabu ûnene bwaaku bwitîîtie bwakinya îgûrû, na waathani bwaaku bwakinya nthîgûrûûne yonthe.

²³Mûraîka ûrîa mûnene oonere aumîte îgûrû aciûkîtie meetho arauga ‘Kûûra mûtî na ûjwebie o buru, îndî ûtigie gîtinkî na mîri yaakîo nthîgûrû, kîogeeri nthîgûrû na nyororo cia chuuma na îturutia. Nawe arauga muntû nî agwîrwe nî îme rîa îgûrû na atûûranie na nyamû cia kîthaka mîaka mûgwanja.’

²⁴Mûnene, kîrooto kîu kîriuga ûjû: Ûrîa Ûrî Îgûrû buru nîbu agitîte nîu mûnene agakara ûu.

²⁵Atî ûûgwe ûkeengwa uume kîrî antû, ûgatûûranagie na nyamû cia kîthaka. Ûkarîjaga nyaki ta ndeegwa, na ûgwîrwe nî îme ûthirie mîaka mûgwanja, mwanka ûmenye Ûrîa Ûrî Îgûrû buru nîwe waathaga moonene ja antû na akajanenkanîra kîrî o ûrîa akwenda.

²⁶O ta ûrîa kweranîrwe gîtinkî gîtigwe nthîgûrû amwe na mîri ya mûtî, ûgacokerua ûnene bwaaku rîrîa ûkaamenya Mûrungu nîwe waathanaga.

²⁷Tontû bûû, itû mûnene, thikîîra ûrîa ngûkwîra. Tigana na meeyia jaaku ûthithagie mantû jarîa jaagîrîte, na ûtigane na ûthûûku bwaaku ûtue kwigagîîrua barîa bainyîîrîtue kîaao, noo kwombîka ûgeeta na mbere kwona munya.”

²⁸Mantû jau jonthe nî jaakarîkîre kîrî mûnene Nebukadineza.

²⁹Nyuma ya mîeri îkûmi na îîrî kuuma rîu, mûnene nî eetaîtaga îgûrûgûrû rîa nyomba ya ûnene îrîa îrî Babiloni.

³⁰Mûnene arauga atîrî, “Anga tî ûûni mbaakîte Babiloni îîjî nene ûjû na inya yaakwa ningwa, nîkenda yaa gîkaro kîa mûnene gîa kwonanagîria ûnene bwaakwa?”

³¹Mûnene akîaragia o ûu, kajû karauma îgûrû karamwîra atîrî, “Gwe mûnene Nebukadineza igua ûrîa ngûkwîra: Ûgûtunywa ûnene.

³²Ningî ûkeengwa ûume gîkaroone kîa antû, wîte ûgatûûranagie na nyamû cia kîthaka. Ningî ûgatua kûrîîjaga nyaki ta ndeegwa, ûthirie mîaka mûgwanja, mwanka rîrîa ûkaamenya Ûrîa Ûrî Îgûrû buru nîwe waathaga moonene ja antû na akajanenkanîra kîrî o ûrîa akwenda.”

³³O rîu mantû jau jaroojûra kîrî mûnene Nebukadineza. Areengwa arauma kîrî antû, aratua kûgûjagîrwa nî îme mwanka nchiûri ciaawe irareea irakara ta mbûî cia ndiiû, na nkunyû irakara o ta cia ndiiû.

³⁴“Nyuma ya mîaka îîu mûgwanja kûthira, ûûni Nebukadineza nî ndaaciûkîrie meetho îgûrû, ndîracokeerwa nî mathûgaanio jaakwa. Ndîrakumia Ûrîa Ûrî Îgûrû buru, ndîramûkaatha na kûmwîkîîra we ûrîa ûtûûraga o kenya na kenya. Nîkwîthîrwa waathani bwaawe nî bwa kenya, na ûnene bwaawe nî bwa gûtûûra kûuma nthukî gwîta îngî.

³⁵Oonaga atûûri ba nthîgûrû barî gîntû gûtîkîo na akathithia o ûrîa akwenda kîrî araîka ba îgûrû na kîrî atûûri ba nthî; na gûtî we ûûmba kûmûgiria.

³⁶Rîrîa ndaacokeerwe nî ûûme bwaakwa, kinya gwîkîîrwa gwaakwa, na ûnene bwaakwa, na ûkumio bwa ûnene bwaakwa nî ndaacokeerue. Ambathi kîrîra baakwa, na atongeeria baakwa baracwaa mbacokia ûneneene bwaakwa, na kinya ndîroongeerwa waathani.

³⁷Nandî ûûni Nebukadineza nî ngûkumia na gwîkîîra, na gûtîîa mûnene wa îgûrû nîûntû ngûgî ciaawe cionthe nî ciagîrîte, na njîra ciaawe nî cia îota. Nabo barîa betaga baikumîtie nî abekagîra nthao.”