Read KIMERU BIBLE PROTESTANT EDITION Dan 8 Bible Online

Dan 8 - KIMERU BIBLE PROTESTANT EDITION bible

Dan 8

¹Mwakeene jwa îthatû jwa waathani bwa mûnene Belishaza, ûûni Danieli nî ndoonere kîoneki kîngî nyuma ya kîrîa kîa mbere.

²Ndeene ya kîoneki kîu, o ntûti ndîraciona Susa ntûûra îrîa nene ya nthîgûrû ya Edomu. O kîonekiine kîu ndîroona ndî rûtere rwa mûuro jwa Ulai.

³Ndîraciûkia meetho ndîroona ntûrûme îrûngami rûteene rwa mûuro. Nayo yaarî na ngoji ijîîrî ciareei, îndî rûmwe rûrî rûrûraaja nkûrûki ya rûngî. Rûu rûraaja nîru rwaumîîre rûrî nyuma.

⁴Ndîroona ntûrûme îîu teeka îkwenda gûtûngana yûgîi bwa rûgûrû, na bwa ûrîo, na bwa ûmotho. Gûtî nyamû îrîngî kûmîkuîrîria kana îmatûka kuuma kîrî yo. Ntûrûme îîu yaathithagia o ûrîa îkwenda îraikumia mono.

⁵Nkarîte o ûu ndigari rî, ndîroona nthenge yauma bwa rûgûrû îgiitanîrîtie nthîgûrûûne îndî îtîgûkinya nthî. Nthenge îîu nî yaarî na rûgoji gatîgatî ka meetho rûtîngî-ithîka.

⁶Nayo îreeta kîrî ntûrûme îrîa yaarî na ngoji ijîîrî irîa ndaarî ndîkwona îrûngami rûteere rwa mûuro. Nthenge îîu îroogîa na inya îîtîte gûtûnga ntûrûme.

⁷Ntegeete ndîroona nthenge yaithûkîra ntûrûme îrî na mûthûûro jûmûnene, îramîtûnga îramiunanga ngoji. Ntûrûme îîu nayo îtaarî na inya ya kûrûngama, îraringwa nthî na gûkinyangîrwa nthî, na gûtî woonora wa kûmîteethia.

⁸Nthenge îîu nayo îraikumia mono na îkûgîta inya mono, rûgoji rwaayo rûraunangwa. Antûûne a rûgoji rûu kûrauma ngoji inya inene itegeete bwa nteere cio inya cia nthîgûrû.

⁹Kuuma kîrî rûgoji rûmwe rwa iu inya kûrauma karûgoji nako karakûra kerekerete bwa ûmotho na bwa gaiti, na bwa nthîgûrû ya wîrane.

¹⁰ Karûgoji kau karagîta inya mono mwanka karaithûkîra njûûrî ya îgûrû, na karaithûkîra njota imwe kaaraigwîthia nthîgûrû, karaikinyangîra nthî.

¹¹Karaikumia mono kararega kinya kwathîkîra mûtongeeria wa njûûrî ya îgûrû karatigithia kûritwa kwa igongwana bia ntukû cionthe birîa biritagîrwa mûtongeeria wa njûûrî cia îgûrû, na kareekîra kîûrû mûgiro.

¹²Antû bareeyia na baratiga kûritaga igongwana bia o ntukû. Ûûma bûrathirua bûragerwa nthî. Nako karûgoji kau karoombana mantûûne jonthe jarîa kaathithîrie.

¹³Rîu ndîraigua mûraîka ooria atîrî, “Mantû jaja, ja kîoneki gîkî jageeta na mbere mwanka rî? Meeyia jamathûûku ûjû jageeta mbere kwîthîrwa jarî o antû a igongwana mwanka rî? Njûûrî ya îgûrû na kîûrû bigeeta mbere gûkinyangîrwa nthî mwanka rî?”

¹⁴Mûraîka ûu aracokeria ûngî atîrî, “Mwanka ntukû ngiri îmwe cia îgana rîa mîrongo îtaano (1,150) ithire. Îgiita rîu igongwana bia rûkîîrî na bia ûgoro bitîritagwa. Nîrîo kîûrû gîgaakwa na gîcokanîrue.”

¹⁵Ûûni Danieli rîrîa ndoonere kîoneki, nî ndeendere kûmenya ûrîa gîkuuga. O rîu, ndîroona mûraîka akari ta muntû arûngami mbere yaakwa.

¹⁶ Ndîraîgua kajû ka muntû karî mûuroone jûu jwa Ulai gakuuga atîrî, “Gabrieli tûma muntû ûûjû amenye ûrîa kîoneki gîkî gîkuuga.”

¹⁷Tontû bûû, Gabrieli arankuîîria arîa ndaarûngami; naani ndîraigua ûguaa ndîragwa na ûthiû. Nawe arambîîra, “Gwe muntû ûrîa ûkuujaga, menya atî kîoneki nî kîa îgiita rîa mûthiro.”

¹⁸Akîmbaragîria o ûu, ndîragwatwa nî toro ndîramama toro îndito, ntirithîtie ûthiû bwaakwa nthîgûrû. Îndî arangwata arambûkîîria ndîrarûngama.

¹⁹Ningî arambîîra atîrî, “Ngakûmenyithia ûrîa gûgakara îgiita rîa mûthia jwa mûthûûro jwa Mûrungu nîûntû mantû jau jegiî îgiita rîa mûthia rîrîa rîtuui.

²⁰“Ntûrûme îrîa woonere îrî na ngoji ijîîrî, nî anene ba Media na Parasia.

²¹Nayo nthenge nî mûnene wa Agriiki. Naru rûgoji rûrîa rûnene rûrî gatigatî ka meetho jaawe nî mûnene wa mbere.

²²Nacio ngoji irîa inya ciaumîre rûgoji rûu rûgûkîîrwa, nî moonene jana jarîa mûgongo jûu jûkagaanwa. Najo jatîîthîrwa jarî na inya ta ya ûnene bûrîa bwa mbere.

²³“Naju mûthieene jwa waathoone bwaajo, rîrîa monene jau jagatuîka jamaaî mono, mûnene ûrî na ûchamba na ûkûmenya mantû ja waiyia akaumîra.

²⁴Nawe akeethîrwa arî na inya înene na akeethîrwa arî na kwînyangia gûkûnene na akoombanaga kîrî jarîa akathithagia. Akathiria antû babanene na antû babatheru ba Mûrungu.

²⁵Tontû akeethîrwa arî na ûûme bwa waayia; waayia nîbu bûkaingîa waathaniine bwaawe. Ningî akeethîrwa arî na rwikumio mono. Akaithûkagîra antû babaingî akabathiria ningî akaithûkîra kinya mûnene wa anene. Nawe akathira na tî inya ya muntû îkamûthiria.

²⁶Kîoneki kîu kîa igongwana bia rûkîîrî na ûgoro wathiria kwîrwa ûrîa gîkuuga, gîgaakarîka. Îndî nandî kîeethie witho nîûntû gîgakara îgiita rîrîraaja mbere ya gîkarîka.”

²⁷Naani ûûni Danieli ndîraaga inya buru ndîraajua ntukû kathûmba. Nyuma ndîrookîîra ndîreeta ngûgîîne ya mûnene îrîa ndaanenkeri, îndî no ndaarigarîte nî kîoneki kîu na ntaamenyaga ûrîa kîaugaga.