Read KIMERU BIBLE PROTESTANT EDITION Hos 10 Bible Online

Hos 10 - KIMERU BIBLE PROTESTANT EDITION bible

Hos 10

¹“Israeli yaakari ta mûzabibû jûrîa jûciaraga maciara. O ûrîa yeetîre na mbere gûtonga, nou yeetîre na mbere gwaka iritîro bibingî bia igongwana. O ûrîa nthîgûrû yaao yeetîre na mbere kûbua, nou beetîre na mbere kûgemia itugî bia mîrungu ya mîng'uanano.

²Tontû nkoro cia antû ba Israeli nî cia waayia, bagakanûkua nîûntû bwa meeyia jaao. MWATHANI akatharia iritîro bia igongwana biaao na eenyangie itugî bia mîrungu yaao ya mîng'uanano.

³Rîu bakauga, ‘Tûtî na mûnene, tontû nî tûregete gûkîra MWATHANI. Îndî kinya tûkëethîrwa tûrî nawe rî, atûthithîria atîa?’

⁴Nî kwaria baaragia akî, bageeka kîrîkanîro îndî batîûjûrie, bagaciîtia mîciîtio ya ûrongo. Mantû ja îota nî jaeejûkîte ja îota jakara ta matî ja sumu, jarîa jakûraga muundeene jûrîmi.

⁵Antû barîa batwîîre Samaria bagateetema nîûntû bwa mûrungu jwa mûng'uanano jwa njaû îrîa bathaathagîria barî kûu Bethiaveni. Antû bakaithikîîra nîûntû bwaaju, athînjîri-mûrungu baaju bagakaya, nîûntû ûkumio bwa mûrungu jwaao bûtîo.

⁶Jûkajûkua jwikue Asîria ta ûgoti kîrî mûnene wa kûu. Israeli îkagîa nthao nîûntû bwa kûjwîtîkia.

⁷Mûnene wa Israeli ageetîwa nawe ta ûrîa kînuku kîa rûbaû kîereragua rûûjîîne.

⁸ Iritîro bia igongwana bia mîrungu ya mîng'uanano birîa birî Betheli bikathirua. Miigua na nkonko bikauma îgûrû rîa iritîro bia igongwana biu Antû bakeera irîma ‘Tûkunîkîreni,’ na beere tûrîma, ‘Tûgwîreni.’”

⁹ MWATHANI arîîra Israeli atîrî, “Kuuma rîrîa bwathithîrie meeyia Gibea, bûtatiga kwîyia. Kuuma rîu ndî na ndwaa naabuî.

¹⁰Nkaithûkîra antû baba babaî mbakanûkie. Mîgongo îngî ikagwatanîra ibakanûkie, tontû bwa meeyia jaao jamaingî.

¹¹Kûrîrîo Israeli yakari ta mwari îbundithîtue bwega kûrîma, yeethagîrwa îkîendaga mono kûûra nkano. Îndî ndamîîkîra gîchooki nîkenda yûmba kûrita ngûgî înjûmo nkûrûki. Juda îkarîma na mûraû, Israeli înje mîtaro.

¹² Rîmeni bwaande waagîru, naabuî bûgaketha maciara ja kûthaathayia na mma. Rîmeni tontû kagiita nî gakinyîte ga gûcwaa MWATHANI nîkenda eeja abuurithîria ngai ya wonokio.

¹³Îndî bwaandîre ûthûûku bwaketha meeyia ta maciara; bwarîa matuunda ja ûrongo bweenu. Tontû nî bwetîkîrie ngaarî cieenu cia ndwaa, na bwetîkia asikarî tontû baarî babaingî,

¹⁴rîu ndwaa îkabwîjîîra, biitiiro bieenu bikamomorangwa, ta ûrîa mûnene Shalimani eenyangîrie ntûûra ya Bethiaribeli ndweene rîrîa eekûrû amwe na twaana twaao baagitangîrwe tûnukutûnuku.

¹⁵Ûu nîu bûkathithîrua buî antû ba Betheli, nîûntû bwa meeyia jarîa bûthithîtie. Rîrîa ndwaa îkambîrîria, mûnene wa Israeli akooragwa.”