Read KIMERU BIBLE PROTESTANT EDITION Hos 11 Bible Online

Hos 11 - KIMERU BIBLE PROTESTANT EDITION bible

Hos 11

¹ MWATHANI ariuga atîrî, “Rîrîa Israeli yaarî mwana nî ndamwendeete, ndîramwîta ta mûtaana waakwa arauma Misri.

²Îndî o ûrîa ndeetîre na mbere kûmwîta nou eetîre na mbere kûmbutatîra. Beetîre na mbere kûritîra mûrungu jwa Baali igongwana na kûîîthîria mîrûngu ya mîng'uanano ubaani.

³Nî ni ndaritanîre Israeli gwîta na magûrû, ndamûgwata na njara ciaakwa, îndî we ataamenya nî ni ndamûmenyagîîra.

⁴Ndabakuucîîria kîrî ni na kîaao na wendo, ndabamamia kîbareene gîaakwa ndabaa biakûrîa.

⁵Bagacoka Misri kaîrî, baathwe nî Asîria tontû nî baregeete gûcoka kîrî ni.

⁶Ndwaa îkarwîîrwa ntûûreene ciaao mpingîro cia ntûûra ciînyangue antû baakwa bathirue tontû bwa nkireba ciaao.

⁷Antû baakwa baciûmîtie kuumauma kîrî ni, tontû bûu bakaethua atae na gûtîonora wa kûbateethia.

⁸ Nîatîa nkoomba gûtîîjîra Israeli? Nîatîa nkoomba kûbanenkanîra, mbûthithîria ta ûrîa ndaathithîîrie ntûûra cia Adima na Zeboiimu? Ntîtîkîîria kûthithia ûu, nîûntû nî nkwendeete mono.

⁹Ntîkanûkîa Israeli nîûntû bwa mûthûûro jwaakwa mbathiria kaîrî, tontû ni ndî Mûrungu na ntî muntû. Ni Ûrîa Mûtheru ndî amwe naabuî, ntîbûthiria na mûthûûro.

¹⁰Antû baakwa bakanthingata ni MWATHANI Mweneinya, rîrîa nkagamba ta ngatûnyi, beeje baumîte rûteere rwa rûgûrû.

¹¹Bakeeja bakiinainaga ta tûnyoni kuuma Misri, ta ijea bakeeja baumîte Asîria, mbacokie mîciî yaao,” nîu ni MWATHANI nkuuga.

¹²“Antû ba Israeli bancîgîîrîîtie na ûrongo na waayia, antû ba Juda bandema ni Mûrungu ûmûtheru na mwîtîkua.