Read KIMERU BIBLE PROTESTANT EDITION Hos 13 Bible Online

Hos 13 - KIMERU BIBLE PROTESTANT EDITION bible

Hos 13

¹“Mbereene mwîrîga jwa Efuraimu jwaragia, mîîrîga îngî ya Israeli îgateetema. Efuraimu nî athûngûûrîtwe. Îndî antû baaju bareeyia bakûthaathayia Baali, tontû bûu bagakua.

²Rîu beetîte na mbere kwîyia nkûrûki bakiithithagîria mîrungu ya mîng'uanano ya fetha nîkenda bamîthaathayia. Mîng'uanano îîu îthithîtue nî antû na ûtea bwa njara ciaao. Rîu bakauga, ‘Mîritîreni igongwana.’ Nîatîa antû boomba gûcûnca mûrungu jwaa mûng'uanano jwa njaû?

³Tontû bûû, bakarima ta nduume ya rûkîîrî, kana ta îme rîrîa rîthiraga gwakea. Bakarima ta maûngo jarîa jatigagwa îtîîriine jageeta na kiurutani kana ja toogi yumîte riiko.

⁴Ni nî ni MWATHANI Mûrungu weenu ûrîa wabûkûrîre kuuma Misri. Gûtî Mûrungu ûngî tiga ni. Gûtî ûngî wa kûbwonokia tiga ni.

⁵ Nî ndabûmenyereete rîrîa bwaarî rwanda, nthî înjûmo îtî rûûjî.

⁶Îndî rîrîa bwarîîre bûranyira, bûraikumia bûroorîrua nî ni.

⁷Tontû bûû nkabwithûkîra ta ngatûnyi, mbwiciithîre njîreene ta naroco.

⁸Nkabaithûkîra ta ndûû îjûkîrîtue twaana twaayo, mbatambûrange na mbarie o ta ngatûnyi kana ûrîa nyomoo îmbîî îrîngîûmba kûbathithîria.

⁹Nkabûthiria antû ba Israeli. Nûû ûûmba kûbwonokia?

¹⁰ Arîkû mûnene weenu abwonokie nandî? Atongeeria beenu bonthe barîkû buî bwaugîre bûrîenda mûnene na atongeeria?

¹¹ Tontû bwa mûthûûro jûrîa ndaarî naju, nî ndabwere anene, tontû bwa marûrû jarîa ndaarî najo, ndîrabûtuunya bo.

¹²Ûthûûku bwa meeyia ja antû ba Israeli nî bwiithi, bweekwa antû arîa bûtîringithua.

¹³Israeli oomba gûtûûra mwoyo îndî nî mûtaana kîaa. Akari ta mwana agîciaragwa akaremera kîu kîa ng'ina.

¹⁴ Ntîbonokia kuuma kîrî gûntû kwa barîa bakuîte, kana mbatunyûkia kuuma kîrî inya ya gîkuû. Reete îkanûkia rîaaku gwe gîkuû! Naagwe gûntû kwa akuû kwînyangia gwaaku kûrî kû! Ntîbaigîîrua kîaao kaîrî.

¹⁵Kinya këethîra Israeli îkariiba o ta nyaki ya mûuro, ruuo rwa MWATHANI kuuma gaiti rûkeeja rûûmie ithima na nthongo cia rûûjî cinyonte. Rûkajûkia gîntû kîonthe kîa goro kuuma mûthithûûne jwaayo.

¹⁶Antû ba Samaria no mwanka bakanûkue nîûntû bwa kûrega kwathîkîra Mûrungu waao. Antû baayo bakooragîrwa ndweene, twaana tûringanue nthî tûkue, na eekûrû baao barîa arito bakothorangwe biu na nchiû.”