Read KIMERU BIBLE PROTESTANT EDITION Hos 14 Bible Online

Hos 14 - KIMERU BIBLE PROTESTANT EDITION bible

Hos 14

¹“Cokeeni kîrî MWATHANI Mûrungu weenu, buî antû ba Israeli. Nî meeyia jeenu jatûmîte bûgiitara bûgwa.

²Njûûni bûrombe MWATHANI na buuge atîrî, ‘Tûrekere meeyia jeetû na ûtûthagane na wendo, natuî tûgagûkathaga na tûnyua tweetû.

³Asîria îtîûmba gûtwonokia, mbarathi cia ndwaa îtîûmba gûtûkaria.’ Tûtîîta kaîrî mîrungu ya mîng'uanano îrîa twithithîrîtie, ‘Mûrungu weetû.’ Gwe nî wigagîîrua nkîa kîaao.

⁴Nkabooria mûrimo jwa kwîthîrwa batî eetîkua. Nkabeenda na nkoro yonthe, tontû ntîthûûra nîbo kaîrî.

⁵Ngakara ta ngai kîrî antû ba Israeli, nabo bakariiba ta marao, barikie mîri ta mîthithinda ya Lebanoni.

⁶Mpang'i ciaao igatamba, ûthongi bwaao bûkare ta bwa mûzeituni na yeera rîaawe rîkare ta rîa mîthithinda ya Lebanoni.

⁷Bagacokanîîra kaîrî batûûre ûkarieene bwaakwa. Bakaanda nkano kaîrî na mîzabibû yaao îkûre. Bagîe îgweta ta ndibei ya Lebanoni.

⁸Antû ba Israeli gûtîkîo bûgûcwaa kuuma kîrî mîrungu ya mîng'uanano. Anga tî ûûni ncokagia maromba jeenu? Anga tî ni mbûmenyagîîra? Nkari ta mûtî jûrîa jûtîtûûraga mabûûra, nî ni mpeejanaga matuunda na itharimo.

⁹Ûrîa ûrî na ûmenyo nî amenye mantû jaja. Ûrîa mûciûku nî aciûre. Tontû njîra cia MWATHANI nî intambûrûku, na barîa baagîru beetagîîra ku îndî barîa baunaga Waatho nîka bagitaraga nîcio.”