Read KIMERU BIBLE PROTESTANT EDITION Hos 2 Bible Online

Hos 2 - KIMERU BIBLE PROTESTANT EDITION bible

Hos 2

¹Rîu îta ataana ba abaagu, Antû Baakwa, na aarî ba nyakwe, Eendwa nî MWATHANI.

²“Erenceni nyakwe, mwerenceeni tontû tî mwekûrû waakwa kaîrî, naani ntî mûkûrû waawe. Mwîreeni atige kwigemia ûthiû ta mûmaraya na atige gwîkîra kîbara kîaawe ndwano cia amaramari.

³Arega gûtiga, nkamûrita nguû cionthe, atigwe kîthûnû, ntûme atigwe kîthûnû o ta ntukû îrîa aciarîrwe. Mweethie ta rwanda rûrûûmo, na mwîke akare ta gûûntû gûkûûmo, mûûragithie nyoonta.

⁴Ntîkoroigîîrua ataana baawe kîaao, tontû nî aana ba ûmaraya.

⁵Ng'ina nî aringîte ûmaraya atî na nthoni akîgia bo. Tontû we augaga, ‘Ka ngeeta gûcwaa anyanya baakwa tontû nîbo bakandûmia irîo na bankuundie rûûjî, nîbo bagampa guee ya ng'ondu, nguû cia bamba, maguta na bankuundie ndibei.’

⁶Tontû bûû, nkamwirigîra ndeene na rwego rwa miigua, ncoke mwakîre rûthingo rûmûthiûrûke rwiinge njîra ciaawe, atîkoone agwîtîîra.

⁷Akeengana na anyanya baawe, îndî atîbagwatagwata, akabacwaa îndî atîboona. Nîrîo akauga atîrî, ‘Kaaba ngacoka kîrî mûkûrû waakwa wa mbere, nîrîo ndaarî na munya nkûrûki ya nandî.’

⁸We atamenya nî ni mwejaga irio na ndibei, na maguta, na ndamwaa fetha na thaabu, irîa athaathagia nacio Baali.

⁹Tontû bûû, ni nkamûtuunya irîo biaakwa bia maketha kagiita kaajo na ndibei yaakwa kagiita kaayo gaakinya. Njûkie guee ya ng'ondu, na nguû ya bamba irîa aikunîkagîra nacio kîthûnû.

¹⁰Naani rîu, nkamûrita nguû atigwe kîthûnû, mbere ya anyanya baawe, na gûtî we ukamûjûkia kuuma kîrî ni.

¹¹Nkathiria biatho biaawe; biatho bia mwaka, bia o mweri na bia sabatû, na nthirie biûthûrano biaawe birîa bitheru.

¹²Nkeenyangia miuunda yaawe ya mîzabibû na mîtî yaawe ya mîkûû, îrîa augaga atî aeerwe nî anyanya baawe. Naani nkamîeethia kîthaka, nyomoo cia kîthaka irîjage ku.

¹³Nkamûkanûkia nîûntû bwa rîrîa rîonthe aathithîrie biatho na aîthîrîrîa ubaani nîûntû bwa Baali na ûntû bwa gwîkîra mîkang'i na into bia goro nîkenda athingatana na anyanya baawe na oorîrua nî ni, nîu MWATHANI auga.”

¹⁴Tontû bûû, nkamûgambia mwikie rwanda kaîrî, nîkenda mwarîria nteto cia wendo, nciendithie kîrî we kaîrî.

¹⁵ Nîrîo nkamûcokeria miuunda yaawe ya mîzabibû na mpeethie mûguuru jwa mîthangîko mûrango jwa wîrîgîîro. Tûrî o nau nîrîo agancokeria o ta ûrîa ancokagîria rîrîa aarî mwarî rîrîa aaumîte Misri.

¹⁶MWATHANI ariuga atîrî, “Ntukû îîu yakinya, ûkambîta ‘mûkûrû waakwa,’ na ûtîkorombîta, ‘Baali.’

¹⁷Naani ntîreka agweta mariîtwa ja Baali kaîrî.

¹⁸“Îgiita rîu ngeeka kîrîkanîro na nyomoo cia kîthaka na nyoni cia îgûrû, na nyomoo irîa ikuaaga na nthî, nîkenda itîkabûthithîrie bûbûthûûku. Ningî nkathiria into bionthe bia ndwaa: ta moota na nchiû kuuma nthîgûrûûne na ntûme bûtûûre ku na thîîrî bûtîgûkîra.

¹⁹Israeli, ngakûgûra wee mwekûrû waakwa. Ndakûgûra ûkaa mwekûrû waakwa ûmwagîru na wa mma, nkwonie wendo na nkwigagîîrue kîaao.

²⁰Ngakûgûra wee mwekûrû waakwa mwîtîkua, nîrîo ûkamenya nî ni MWATHANI.

²¹Îgiita rîu ngacokeria îgûrû maromba jarîo jakûgîta matu, narîo îgûrû rîcokerie nthî îromba rîaayo rîa kurithîrua ngai.

²²Nthî nayo ikagîa irîo na ndibei na maguta, nîkenda nabio biingia moobatu ja Aisraeli.

²³ Naani nkarikithia antû baakwa nthîgûrû îîu, ntûme bûthinyaare. Barîa beeti, ‘antû batîendi,’ nkaboonia wendo bwaakwa. Barîa beeti, ‘Bûtî-antû-baakwa’ nkabeera, ‘Bûrî antû baakwa.’ Nabo bauge, ‘Gwe nîgwe Mûrungu weetû.’”