Read KIMERU BIBLE PROTESTANT EDITION Hos 4 Bible Online

Hos 4 - KIMERU BIBLE PROTESTANT EDITION bible

Hos 4

¹Antû ba Israeli, thikîîreeni, MWATHANI arî na îgamba na antû ba nthîgûrû îîjî. Ariuga atîrî, “Nthîgûrû îîjî gûtî na antû ba gwîtîkîka kana ba kwiganîîrua kîaao, na gûtî na antû bakûmenya Mûrungu.

²Bûciîtagia bûtîkûûjûria, bûkaria ûrongo, bûkooragana, bûkaiya na bûkathûûngîîra. Moothûûku nîu jaingîîte, na kûûragana gûtî ntîîri.

³Tontû bûû, nthîgûrû îkaaga ngai, na barîa bonthe batwîîre ku bathire. Kinya nyomoo cia kîthaka, na nyoni cia îgûrû amwe na makûyû ja îria bikue.”

⁴MWATHANI ariuga atîrî, “Gûkágîta muntû ûgambithua kana atwîrîîrwa, ni nî athînjîri-Mûrungu nkûgambithia.

⁵Naabuî athînjîri-Mûrungu bûkagitara mûthenya, nabio iroria bikagiitara amwe naabuî ûtukû. Naani nkathiria nyakwe Israeli.

⁶Antû baakwa barîthira nîûntû batîmbijî tontû nî bûregeete kûûmenya na bwarega mooritani jaakwa, naani nkûbûrega na ndarega bwaa athînjîri-Mûrungu baakwa. Nîkwîthîrwa nî bûrîrîtue nî Waatho bwaakwa, kinya ni nkorîrua nî aana beenu.

⁷O ûrîa buî athînjîri-Mûrungu bûkwongeereka, nou bûkwongeera kûthithia meeyia. Tontû bûû, nkagarûra ûkumio bweenu, mbweethie nthao.

⁸Bwinyiragia na îgongwana birîa antû baakwa baritaga bia kûthiria meeyia, tontû bûû bûkagwîrîrua beeta na mbere kwîyia nkûrûki.

⁹O ta ûrîa ngakanûkia antû bangî, nou ngakanûkia athînjîri-Mûrungu, nkabakanûkia nîûntû bwa mîîtîre yaao îmîthûûku mbarîe kûringana na mathithio jaao.

¹⁰Bakarîa biakûrîa îndî batînyira; baringe ûmaraya îndî batîthegea. Tontû nî berûkîrîte MWATHANI, batumîkîra mîrungu îngî.”

¹¹Ndibei înkûrû na înjerû nîka îthiragia ûmenyo.

¹²Antû baakwa booragia mantû kuuma kîrî kînuku kîa mûtî, bakooria mantû kuuma kîrî rûturo. Bantigîte ni Mûrungu waao, bakara ta mûka mûmaraya, beeta kîrî mîrungu ya mîng'uanano.

¹³Baritagîra igongwana biaao irîmeene birîa inene, na bakarita biewa barî tûrîmene. Baritagîra barî itinene bia mîtî îmînene ta miuuru, na mîtarakwa, na mîgumo tontû bwa ithiîki biaayo. Tontû bûû, aarî beenu nîka baringaga ûmaraya, na aka ba ataana beenu bakamaramara.

¹⁴Naani ntîkanûkia aarî beenu baaringa ûmaraya kana aka ba ataana beenu bathithia ûmaramari. Tontû buî bwingwa arûme nî bûringaga ûmaraya na aka na bûkabagwatia kûritîra mîrungu ya mîng'uanano igongwana. O ta ûrîa kuugagwa, Antû batî na ûmenyo bakathirua.

¹⁵Kinya këethîra gwe Israeli antû baaku tî eetîkua kîrî ni, antû ba Juda bakorokara ûu, bathûûkia. Tigeeni gwîta kûrombera Giligali kana bwîta Bethiaveni nyomba ya kûrombera mîrungu ya mîng'uanano. Tigeeni gûciîtagia na riîtwa rîa MWATHANI bûrî nao.

¹⁶Israeli yûmîtie mûtwe ta ntigiri. Rîu nîatîa MWATHANI oomba kûbarîthia ta ng'ondu bûûrîîne?

¹⁷Antû ba Israeli nî batiganwe nabo, nî baigwatithanîtie na mîrungu ya mîng'uanano.

¹⁸Bathiragia kûnyua ndibei bakaringa ûmaraya tontû beendeete nthao nkûrûki ya gîtîîo.

¹⁹Tontû bûû rûûo rûûnene rûkabakamata rûbate kûraaja na igongwana birîa baritaga bibareetere nthao.