Read KIMERU BIBLE PROTESTANT EDITION Hos 7 Bible Online

Hos 7 - KIMERU BIBLE PROTESTANT EDITION bible

Hos 7

¹“O rîrîa nkwenda kworia mûrimo jwa Israeli, nîrîo mbonaga wooru bwaayo, na mantû jaayo jamathûûku. Tontû bo bakaraga na waayia, aamba bageeta na mbere kûbunja nyomba ciaitha na atuunyani bageeta na mbere gûtuunya antû into njîreene.

²Gûtî rîo bathûgaanagia atî nkaririkana ûthûûku bwaao bunthe, îndî ûthûûku bûbathiûrûkîte kunthe, kinya nkenda, ntîrega kûbwona.”

³“Bagwîragia anene amwe na atongeeria baawe na kûbaîîria.

⁴Bonthe nî athûngîîri, barî na mwanki jwa ûthûngîîri o ta riiko rîa gûkandîra mîgaate, rîrîa rîkaraga na mwanki, rîrîa mûkandi agûkanda mûtu.

⁵Ntuku ya kîatho gîa gûcokeria mûnene nkaatho, mûnene na atongeeria bogitaga nî kûnyua ndibei bakaa biaa.

⁶Nabo baakanaga ta riiko rîa nkunîi rîrîa bagwîka nkireba, bararaga ûtukû bunthe bagîakanaga ta kînyinga, na gwakea bagaakana ta rûmûrî.

⁷Bonthe baakanîte o ta riiko rîa nkunîi, bakooraga anene baao. Anene baao booragîtwe bathingatene, gûtî kinya ûmwe waao ûndombaga mbûtunyûkia.”

⁸Antû ba Israeli bakari ta mûgaate jwa gûkanda jûtîîte bwega, nîûntû bo beerîgîîrîte bateethua nî mîgongo îngî.

⁹Gwîîka wîrîgîîro bwaao kîrî mîgongo îngî nî kûbathirîtie inya, îndî bo batîkûmenya. Ntukû ciaao cia gûtûûra nî inkai, îndî batîkûmenya.

¹⁰Rwikumio rwa antû ba Israeli nîru ûkûûjî bwa kûbagambithia. Amwe na mantû jau jonthe bataacoka kîrî MWATHANI Mûrungu waao kana no bamûcwaa.

¹¹Israeli îkari ta kîjea kîrîa gîtî ûûme îtangatangaga îkîrombaga ûtethio kuuma Misri na Asîria.

¹²Kinya bageeta o narîa bageeta nkabagwata na rûgara rwaakwa mbagwatie o ta nyoni. Naani nkabakanûkia nîûntû bwa ûthûûku bwaao.

¹³“Wûi kîrî bo! Tontû nîka batiganîte naani. Bakathirua nîûntû bo nî ndemi. Ndîngî kûboonokia, îndî banthaathagia batî na ûûma.

¹⁴Antû a bandombaga barî na ûûma ndeene yaao, nîka akî barîîraga bagiitemangaga o ta ûrîa antû barîa barombaga mîrungu ya mîng'uanano bathithagia, rîrîa bakwenda mbaa irîo na ndibei.

¹⁵Nî ni mbeekagîra inya, îndî amwe na bûu nî bambîkagîra nkireba.

¹⁶Bo bagarûkaga bageeta kîrî Baali, mûrungu jûtî inya. Bakari ta ûta bûbûkîgamu, bûrîa bûtîrîgîîrwa. Atongeeria baao bakooragwa tontû bwa rwikumio rwaao na bathekerwe nî antû ba Misri.”