Read KIMERU BIBLE PROTESTANT EDITION Hos 8 Bible Online

Hos 8 - KIMERU BIBLE PROTESTANT EDITION bible

Hos 8

¹MWATHANI ariuga atîrî, “Ringeeni tarumbeta! Anthû nî beenamîte ta ndiiû kûthiria antû ba MWATHANI, nîûntû nî bathûûkîtie kîrîkanîro gîaakwa na baregana na mawaatho jaakwa.

²Nî ûtheri bakûrîra bakiugaga, ‘Mûrungu weetû, nî tûkwijî.’

³Tontû Israeli nî îreganîte na mantû jameega, anthû bakeengana nayo.

⁴Antû baakwa baithuragîra anene batîmbûrîtie, bakathuura atongeeria baao batîmenyithîtie. Bajûkagia thaabu na fetha bakaithithîria mîrungu ya mîng'uanano, îndî yo nîka îgatûma bathirua.

⁵Ntîkwenda mîng'uanano ya njaû îrîa bwithithîrîtie buî antû ba Israeli, nî nthûûri nîûntû bwaayo. Nî mwanka rî bûgakara bûkîrombaga mîrungu ya mîng'uanano?

⁶Mîng'uanano îthithîtue nî atea ba Israeli na tî Mûrungu wa mma. Mûng'uanano jwa njaû jûrîa jûthaathagîîrua Samaria jûkathetherangwa.

⁷Baandaga ruuo, bagaketha kîbubani. Kîmera kîrîa kîrî miuundeene yaao nî mauuti jatî mpîndî jatîona gîa kûrûma. Gîkëeja gûciara antû bakuuma nthîgûrû ingî nîbo bakarîa.

⁸Israeli nî îînyangîtue, gatîgatî ka mîgongo îîngî, nî ya ûtheri ta nyongû îkuîte.

⁹O ta ûrîa ntigiri ya kîthaka îtangatangaga îgîcwaa ndûme, nîu Aisraeli batangatangîte bagîcwaa ûteethio kuuma Asîria na barîaa mîgongo îngî îbakaria.

¹⁰Îndî kinya bakarîaa mîgongo îngî kenda bagwatanîra, kagiita gatî kûraaja nkabothûrania amwe mbakanûkie bae atae nîrîo mûnene wa Asîria akabainyîîria.

¹¹O ûrîa antû ba Israeli baakîte iritîro bia igongwana bibingî bia kûthiria meeyia nou bieete bia kûthithîria meeyia.

¹²Ningî kinya nkaandîkîra antû ba Israeli mawaatho jamaingî atîa, bajaregaga bakauga batîkûjamenya nî ja kuuma kûngî.

¹³Antû ba Israeli bendeete kûrita igongwana na kûrîa nyama kuumania nabio, îndî ntîgwîragua nîbo. Nkaririkana meeyia jaao na mbakanûkie nîûntû bwajo, mbacokie Misri kaîrî!

¹⁴Antû ba Israeli baakîte ikaro bia anene bibithongi îndî boorîrua nî mûûmbi waao. Antû ba Juda baakîte ntûûra bairigîra na nthingo. Ngatûma mwanki jûîîthie ntûûra iu, na jwînyangie biitiiro biaao.”