Read KIMERU BIBLE PROTESTANT EDITION Hos 9 Bible Online

Hos 9 - KIMERU BIBLE PROTESTANT EDITION bible

Hos 9

¹“Tigeeni kûgwîrua bûrî biathoone antû ba Israeli! Bûkîthithagia ûrîa antû barîa batiijî Mûrungu bathithagia. Tontû buî bûringîte ûmaraya na mîrungu ya mîng'uanano bwatigana na Mûrungu weenu. Buî bûciendetie ta maraya kîrî Baali kûu matîîriine jarîa irio biûragîrwa.

²Bûkaaga irio bia kûng'ana na mîzabibû yeenu îthûûke yaage ndibei.

³Antû ba Israeli batîkara kaîrî nthîgûrûûne îîjî ya MWATHANI, îndî bo nîka bagacoka kaîrî Misri na bae atae Asîria barîjage biakûrîa birî na mûgiro.

⁴Rîrîa bageeta nthî ciaitha batîritîra MWATHANI biewa biaao bibitheru bia ndibei na batîmûritîra igongwana bimûgwîria. Biakûrîa biaao bitîtûma baigua bwega tontû nî ta biakûrîa birîa birîjagwa mathikoone. Barîria biakûrîa biu bia kûbanyiria akî, îndî gûtîbio bigaikua kîûrûûne biritwa ta biewa bibitheru.

⁵Ntukû ya kîatho kîrîa gîtui rî nîatîa bûkathithia? Nîatîa bûkathithia ntukû ya kîatho kîa MWATHANI?

⁶Bakëeja kwonoka kûthirua nî Asîria, Misri îkaboothûrania îbathike Memufisi. Nkonko ikauma intoone biaao bia fetha na mîtî ya miigua yuume maganjoone jaao.

⁷ Îgiita rîa gûkanûkua nî rîkinyîîte Îgiita rîa kûrîwaa nî rîkinyîte. Buugaga atî Kîroria nî kîaa, na muntû ûrîa warîrîtue nî Mûrungu arî na nthû. Tontû bwa ûrîa meeyia jeenu jaingîîte, nî bûnthûûrîte.

⁸Kîroria gîtûmi nî Mûrungu gûkaria antû ba Israeli, amwe na bûu o kûrîa kîreeta nî bûgeragia gûkîgwata na gîtegi ta nyoni, bûgakîonia ûthû kinya kîûrûûne.

⁹ Antû ba Israeli nî bathithîtie meeyia o ta bûrîa baathithîrie Gibea. Mûrungu nî aririkanîte meeyia jaao nawe akabakanûkia.”

¹⁰ MWATHANI ariuga atîrî, “Rîrîa ndoonere Israeli rîa mbere yaakari ta nzabibû rwanda. Rîrîa ndoonere biûjûjû bieenu rîa mbere, biakari ta ntende inguundu cia îciara rîa mbere. Îndî rîrîa baakinyîre kîrîmeene gîa Peori, baraambîrîria kûthaathayia Baali naani ndîrabathûûra o ta ûrîa ndaathûûrîte mûrungu jûu.

¹¹Ûkumio bwa Israeli bûkaberûkîra, o ta ûrîa nyoni îburûkaga; twaana tûtîciarwa kaîrî, aka batîaa babarito kaîrî na batîgwatia îu!

¹²Kinya boona twaana nkajûkia tunthe gûtî ko kagatigwa mwoyo. Rîrîa nkabeerûkîra mantû jakabathûkîra mono!

¹³Nî mboneete kûthirua kwa aana ba Israeli. Beethe nîbo babaîkîîtie kîng'ereroone.

¹⁴Nîmbi ngakûromba waa antû baba? Baeethie nthaata, ûtûme batîgoonkie twaana.”

¹⁵MWATHANI ariuga atîrî, “Meeyia jaao jaambîrîrie Giligali. Nîkû ndambîrîîrie kûbathûûrîra nîûntû bwa ûthûûku bwaao. Naani nkabeenga kuuma nthîgûrûûne yaakwa na ntîboonia wendo bwaakwa kaîrî. Atongeeria baao bonthe nî baregeete kûmbathîkîra.

¹⁶Israeli nî îkanûkîtue, îkari ta mûtî jûrî na mîri înyarîte na jûtî na maciara. Nabo batîgîa na twaana, na kinya bagîa natu ngatûthiria.

¹⁷Mûrungu ûrîa ûntûmîte nî aregeete antû ba Israeli baa baawe tontû batîmwathîkaîra. Bakaa atangatangi nthîgûrû îngî.”