Read KIMERU BIBLE PROTESTANT EDITION Joe 1 Bible Online

Joe 1 - KIMERU BIBLE PROTESTANT EDITION bible

Joe 1

¹Iji nîcio nteto irîa MWATHANI aarîîrie Joeli mûtaana wa Pethueli.

²Buî akûrû igueni nteto iji, kindeni matû bwigue buî bwinthe atûûri ba nthîgûrû îîjî. Ûntû ta bûbû bûrakarîka kaîrî bûrî mwoyo kana bûkarîka îgiiteene rîa biûjûjû bieenu?

³Îreeni aana beenu mantû jaja; nabo beere aana baao nabo beere aana ba aana baao,

⁴Kîrîa ngigî ciatigarîtie nyuma ya kûgiitanga, ngigî cia mûrumbî nî ciarîîre. Kîrîa ngigî cia mîrumbî ciatigarîtie; ngigî irîa ithûngûthaga nî ciarîîre, na kîrîa ngigî irîa ithûngûthaga ciatigarîtie; ngigî irîa ciînyangagia nî ciathirîrie buru.

⁵Ûkîîreeni buî antû ba mbogita bûrîre; ugeeni mbu buî bwinthe anyui ndibei, rîreeni nîûntû nî bûtunyi ndibei îrîa nthongi.

⁶ Nîkwîthîrwa njûûrî ya ngigî nî iithûkîrîte nthîgûrû yeetû; nî njûûrî îrî na inya înene, îrî na maîgo ta ja ngatûnyi îrî na mîguara îkûrûmana ta ya ngatûnyi nka.

⁷Njûûrî îîu nî îînyangîtie mîzabibû yeetû, na yakeranga mîkûû yeetû, îmîcaûrangîte makonde jaathira, mpang'i ciatigwa irî injerû.

⁸Rîreni na bwithikîîre ta ûrîa mwekûrû arîraga akuîri nî mûrûme.

⁹Igongwana bia irio na igongwana bia gwîtûûrîria nî biûrîte kîûrûûne. Athînjîri-Mûrungu, tabo atumîkîri MWATHANI ka bakûrîra.

¹⁰Miuunda gûtî kîo îrî nakîo; nthîgûrû yûmagari buru; irio nî bithûûkangîtue, gûtî ndibei îkwonora na gûtî maguta jakwonora.

¹¹Rîreni buî arîmi; ugeeni mbu buî bûmenyagîîra miuunda ya mîzabibû, ugeeni mbu nîûntû bwa nkano na mûnyaki, nîûntû irio bionthe birîa birî miuundeene nî bithûûkîtue.

¹²Mîzabibû nîka îkûûma nayo mîkûû nî înyaarîte. Mîkukumanga, na mîkîndû, na mîtuuja, na mîtî îngî yonthe ya matuunda nî yûmîte. Antû nî batigîte buru kûgwîrua.

¹³Athînjîri-Mûrungu îkîreni mathango bûrîre, ugeeni mbu buî bûtumîkaga kîritîroone kîa igongwana. Toonyeni kîûrûûne bûrîre ûtukû bunthe buî atumîkîri Mûrungu waakwa. Nîkwîthîrwa gûtî na igongwana bia irio na gûtî na igongwana bia gwîtûûrîria bikaaretwa kîûrûûne kîa Mûrungu weenu kaîrî.

¹⁴Uthûranieni antû amwe, buuge kûgîe na îgiita rîa gûciata biakûrîa. Ûthûranieni atongeeria na antû bonthe barîa batwîre nthîgûrû ya Juda kîûrûûne kîa Mûrungu weenu bûkaîre MWATHANI.

¹⁵ Wûi nîûntû bwa ntukû ya MWATHANI, ntukû ya MWATHANI îrî akuî; ntukû îrîa Mweneinya akaathiria birîa birî o.

¹⁶Anga irio toka bikûthûûkua tûkîonaga, na kûgwîrua na nkerû biathira kîûrûûne kîa Mûrungu weetû?

¹⁷Mbeeû îrîthûûkîra mûthetuune, na nyomba cia gwîka into nî intheri. Nchuku itî na gantû nîûntû gûtî irio bikethi.

¹⁸Nyomoo gaikwania nî mpara ndîîthia cia ng'ombe na mbûri na ng'ondu gaikwambaamba nîûntû gûtî na gûntû gwa kwirîîthia.

¹⁹Ni ngûgûkaîra gwe MWATHANI. Tontû ithaka bia kûrîîthia, na mîtî yonthe nî birîîkîtie kûûma, biakara teeka biîîthîtue nî mwanki.

²⁰Kinya nyamû cia kîthaka nî igûgûkaîra nîûntû rûûjî nî rûwîte kunthe na mwanki nî jwîîthîtie ithaka birîa irîîthagua.