Read KIMERU BIBLE PROTESTANT EDITION Joe 2 Bible Online

Joe 2 - KIMERU BIBLE PROTESTANT EDITION bible

Joe 2

¹Ringeeni tarumbeta kûu Zaiûni; nayo nî ya kûmenyithania kîrîmeene gîaakwa kîrîa kîtheru atî kûrî na ûgwati. Rekeni antû bonthe barîa batwîre nthîgûrû ya Juda bateeteme, nîûntû Ntukû ya MWATHANI îrî akuî gûkinya.

²Ntukû îîu îkeethîrwa îrî ya muundu na kwithikîîra; ntukû întumanu na îrî na matu. Njûûrî înene îrî na inya ya ngigî îkeeja ta ûrîa muundu jûkunîkaga irîma Gûtoonekana ûntû ta bûu kaîrî ningî gûtîkoroonekana ta bu îgiita noo rîrîku.

³Igeeta ikîrîîjaga kîrîa kîonthe ikeethagîîria, mwanka gûgatigwa gûkari teeka kûîîthîtue na mwanki. Mbere yaacio nthîgûrû îkethagîrwa îkari ta muunda jwa Edeni, Îndî nyuma ya gûkûrûkîîra ku îgaatigwa îrî rwanda rûrûtheri, gûtî gantû igaatiga.

⁴ Ngigî iu ikoonekana ikari ta mbarathi, ikamatûkaga ta mbarathi cia ndwaa.

⁵O ûrîa ikaathûngathûngûthaga irîmeene ikaruruma ta ngaarî cia ndwaa Ikaathandîkangaga ta matî jamoomo jakûya nî mwanki; Ningî igeetaga ithingatene ta njûûrî înene îîtîte ndweene.

⁶Antû bagaacionaga bakagwatwa nî kîmako moothiû jaao jagatuka buru.

⁷Ikaithûka o ta nchamba cia ndwaa; igaitanagia na nthingo o ta asikarî ba ndwaa. Iikaagwataga njîra igeeta itîgwaûkîra, itîkuuma njîreene irîa igwete.

⁸Gûtî yo îkaagiitaragia îngî ciîtîte, o ngigî îgeetîîra antû aayo. Igeetîîra gûntû kûrîa itîkûrîgîîrua gûtîkîo gîkoomba gûcirigîîria.

⁹Ikaathûngûthaga igatonya ntûûreene, na ikabarabara nthingo; Igaitanagia na nyomba, igaatonyeera ndiricheene ta aamba.

¹⁰ Nthîgûrû gaîkainainaga îkûrûkîte, îgûrû narîo rîgateetema. Riûa na mweri bikaaga weerû nacio njota igaatiga kûthaara.

¹¹ MWATHANI nîwe ûkeeraga njûûrî îîu yaawe ûrîa akwenda îthithia. Njûûrî yaawe nî înene mono; njûûrî îrîa îmwathîkagîra nî njûûrî îrî inya. Ntukû ya MWATHANI îrîa agaatua magamba nî ya kûrigaria na îmbîî. Nûû ûmba kûmîûmîîria?

¹²MWATHANI ariuga atîrî, “Ningî amwe na bûu, irireeni bûcoke kîrî ni; bûciate biakûrîa bwîje bûkîrîraga bûkiinainaga.

¹³Irireeni na nkoro cieenu gûtambûranga nguû akî gûtîng'ani.” Cokeeni kîrî MWATHANI Mûrungu weenu nîûntû nî wa kîaao gîkiingî, atîthûûrangaga na mpwîî na arî wendo bûbwingî. Ningî nî areekagîîra ûthûûku bûrîa arîngî gûkanûkia.

¹⁴Nûû wiijî këethîra atîgarûka na abwigîîrua kîaao, abûtharima na bwoona into bia kûrita igongwana, bia irio na bia gwîtûûrîria, nîûntû bwa MWATHANI Mûrungu weenu.

¹⁵Ringeeni tarumbeta kûu Zaiûni buuge kûgîe na îgiita rîa gûciata biakûrîa, na bûûthûranie antû amwe.

¹⁶Ûthûranieni antû bûtherie kîûthûrano; ûthûranieni antû agima, na twaana na kinya tûkenke turîa tûgwonka kinya mûgûrwa na mûgûrani nî baume nyomba beete kîûthûranoone.

¹⁷Athînjîri-Mûrungu tabo atumîkîri MWATHANI barîa batumîkaga gatîgatî ga kîritîro kîa igongwana na mpingîro ya kîûrû, nî barîre bakiugaga: “Igîîrua antû baaku kîaao itû MWATHANI. Ûkáreka antû ba mîgongo îngî batûmeneeria na batûcikûûra bakiugaga: Arîkû Mûrungu weenu?”

¹⁸MWATHANI arathûgaanîria nthîgûrû yaawe araigîîrua antû baawe kîaao.

¹⁹MWATHANI arabacokeria arauga atîrî, “Atîrî, nkaabûnyiria na irio na ndibei na maguta. Ningî ntîkororekeeria bûmenerua nî mîgongo îngî kaîrî.

²⁰Nkaabweberia njûûrî ya ngigî îrîa îbwîjîîrîte kuuma bwa ûrîo nciîngîîrie rwanda rûrûûmo na rûtî gîntû, îrîa irî mbere nciîngîîrie bwa îria rîa Chumbî na irîa irî nyuma bwa îria rîa Mediterania, nacio igaakua inuunke. Nkaithiria buru nîûntû bwa jarîa jonthe ibûthithîrîtie.

²¹Bûgákîreni buî miuunda, gwîrueni na bûkene nîûntû MWATHANI nî athithîtie mantû jamanene.

²²Naabuî nyamû cia kîthaka tigeeni gûkîra, nîûntû ithaka bikûriiba biarerûka; mîtî nî îgûciara matuunda, mîkûû na mîzabibû nî îgûciara mono.

²³Naabuî antû ba Zaiûni gwîrueni, bûgwîrue ndeene ya MWATHANI Mûrungu weenu; nîûntû abuurithîrîtie ngai ya mbere nîkenda abûûmbanîra, abuurithîria ngai ya kûng'ana ya ûthima na ûrugûra o ta mbereene.

²⁴Matîîri jakoojûra irio bia kûûra na imiiri biunîkarage ndibei na maguta.

²⁵Nkaabûcokeria birîa biathûkîrue, birîa ngigî ciarîîre, îrîa ndaatûmîte irî njûûrî înene îbwithûkîra.

²⁶Bûkoona irio bibingî biakûrîa mwanka bûnyire, naabuî bûkaathe riîtwa rîa MWATHANI Mûrungu weenu, ûrîa ûbûthithîrîtie mantû ja kûrigaria na antû baakwa batîkoroekîrithua nthao kaîrî.

²⁷Naabuî bûkaamenya ndî amwe naabuî Israeli na atî ûûni MWATHANI nî Mûrungu weenu na gûtî ûngî tiga ûûni. Antû baakwa batîkoroekîrithua nthao kaîrî.”

²⁸ “Naku gûgaakara atîrî nyumeene, ngeetûûrîria antû bonthe Roho waakwa; nthaka cieenu na aarî beenu bakaroragia, akûrû bakarootaga irooto, na nthaka cieenu cionage bioneki.

²⁹Ningî ngeetûûrîria Roho waakwa kinya kîrî nthûûmba cieenu cia arûme na cia aka.

³⁰“Ningî nkoonania iriga îgûrû na nthîgûrûûne. Gûkeethîrwa kûrî na tharike na mwanki na irûngûûjû bia toogi.

³¹ Riûa rîkagîa muundu, na mweri jûtunee ta tharike mbere ya ntukû îîu nthûûku ya kwîja kwa MWATHANI.

³² Naku gûgaakara atîrî, barîa bonthe bagaakaîra MWATHANI bakoonokua. Nîkwîthîrwa barîa bakoonoka bakeethîrwa barî kîrîmeene gîa Zaiûni na Jerusalemu amwe na barîa bageetwa nî MWATHANI o ta ûrîa augîîte.”