Read KIMERU BIBLE PROTESTANT EDITION Joe 3 Bible Online

Joe 3 - KIMERU BIBLE PROTESTANT EDITION bible

Joe 3

¹MWATHANI ariuga atîrî, “Îgiita rîu rîakinya ngacokeria Juda na ntûûra ya Jerusalemu ûthinyaari bwaacio.

²Nkoothûrania mîgongo yonthe mîreete kîguuruune gîa kûgiitîra îgamba. Au nîo nkaamîgiitîra îgamba nîûntû bwa mantû jonthe jarîa îthithîrîtie antû baakwa. Nî banyagîtie antû ba Israeli nthîgûrûûne inyiingî na bagaana nthîgûrû yaakwa ya Israeli.

³Bo baaringaga kuura nîkenda bamenya ûrîa ûgeeta na atae. Bo beendagia tûîjî na twarî nîkenda boona mbeecha cia kûrîaa maraya na cia kûgûra ndibei nacio.

⁴ “Ka-bûrî baû buî Tiro na Sidoni naabuî bwinthe ba nthîgûrû cia Filisti? Ka-kûrî îraandû bûkûndîaa? Bwethîrwa kûrî bio bûkûndîaa, menyeni atî nkaairîîria kîrî buî ntûti.

⁵Nî bûjûkîtie fetha yaakwa na thaabu na bwajûkia into bingî bia goro bwabiikia biûrûûne bieenu.

⁶Buî nî bwendeetie antû ba Juda na ba ntûûra ya Jerusalemu kîrî Agriiki bwabaikia kûraaja na nthîgûrû yaao.

⁷Îndî nandî nkabaûkaûkia kuuma gûntû kûrîa bwabeenderie, mbûriyie nîûntû bwa mathithio jarîa bûbathithîrîtie.

⁸Nkarekeeria nthaka cieenu na aarî beenu beendue kîrî antû ba Juda, nabo bakabeendia kîrî mûgongo jwa Asabea jwa kûraaja, nîu ûûni MWATHANI nkuuga.

⁹Tûmîîria mantû jaja kîrî mîgongo: Ithuranîreni nîûntû bwa ndwaa îteni nchamba cieenu cia ndwaa. Njûûrî cieenu cionthe nî ciithuranîre gwîta ndweene.

¹⁰ Tureni mîraaû yeenu îtuîke nchiû na machembe jeenu jatuîke matumo; nabo barîa iguaa bauge, ‘Ndî nchamba ya ndwaa.’

¹¹Njûûni na mpwîî bûûthûrane au buî mîgongo îrîa îrî nteere cionthe, MWATHANI tûma njûûrî yaaku îbaithûkîre.

¹²Mîgongo no mwanka iithuranîre îîje kîguuruune kîa Jehoshafati; nîûntû au nîo ûûni MWATHANI ngaakara ngambithie mîgongo îrîa îthiûrûkîrîte Israeli yonthe.

¹³ Nîkwîthîrwa ûthûûku bwa antû ba mîgongo îîu nî bûbûnene baketheeni ta ûrîa gûkethagwa into biakama bûbakinyangîre nthîgûrû ta ûrîa nzabibû ithithagua, mwanka ndibei îkaunîkara.

¹⁴Kîrîndî gîkiingî mono mono nî kîûthûranîre kîguuruune kîa îgamba Nîkwîthîrwa ntukû ya MWATHANI îrî akuî kîguuruune kîu kîa îgamba.

¹⁵Riûa na mweri bikagîa muundu nacio njota itige kûthaara.”

¹⁶ “MWATHANI akaaruruma ta ngatûnyi arî Zaiûni; kajû kaawe kaigîîgue kuuma Jerusalemu; îgûrû na nthî nabio bikainaina. Îndî MWATHANI nîwe giiciitho kîa antû baawe nîwe giitiiro kîa antû ba Israeli.

¹⁷Rîu nîrîo Israeli îkamenya atî nî ni MWATHANI Mûrungu waao ûrîa ûkaraga Zaiûni kîrîmeene kîrîa kîtheru. Jerusalemu îgaatuîka întheru na ageni batîkoromiithûkîra kaîrî.

¹⁸Ntukû îîu yakinya irîma bikeethîrwa biûjûri mîzabibû ng'ombe ciîthîrwe irî tûrîmene tunthe na ndûûjî cia Juda cionthe ciîthîrwe irî o. Nako karûûjî gakauma kîûrûûne kîa MWATHANI gatue kûnyuithagia kîguuru kîa mîtî ya mîgaa.

¹⁹Misri îgaatuîka rwanda nayo Edomu îkare ta îgaanjo, nîûntû nî ciaithûkîîre Juda irooraga antû batîîtie.

²⁰Îndî nthîgûrû ya Juda na ntûûra ya Jerusalemu îgaatûûrwa kenya na kenya nthukîîne cionthe.

²¹Nkairîîria antû barîa booragîrwe na ntîcaîîra barîa bathûûkîtie. MWATHANI atûûraga Zaiûni.”