Read KIMERU BIBLE PROTESTANT EDITION Amo 1 Bible Online

Amo 1 - KIMERU BIBLE PROTESTANT EDITION bible

Amo 1

¹ Iji nî nteto cia Amosi ûrîa waarî ûmwe wa arîîthi ba ng'ondu kuuma ntûûreene ya Tekoa. Amosi oonerue nteto iji ciegiî Israeli nî Mûrungu, mîaka îîrî mbere ya kwinaina kwa nthî. Nawe oonerue cio rîrîa Uzia aarî mûnene wa Juda na Jeroboamu mûtaana wa Joashi aarî mûnene wa Israeli.

² Amosi arauga atîrî, “MWATHANI aruumaga arî Zaiûni, akagondoka na kajû kuuma Jerusalemu; kûrîa arîîthi barîîthagia gûkooma, na nyaki ya kathûmbî ga kîrîma gîa Karimeli îkanyaara.”

³ MWATHANI ariuga atîrî, “Nîkwîthîrwa antû ba Damaski nî beeîtie kaîrî na kaîrî batîgûtiga, baatûgûta antû ba Gileadi ntûgûto îmbîî no mwanka mbakanûkîrie bûu.

⁴Tontû bûû, ngatûma mwanki jwîîthie gîkaro kîa mûnene Hazaeli, jwîîthie biitiiro birîa biaki nî mûnene Beni-hadadi.

⁵Nkaunanga mpingîro cia ntûûra ya Damaski, nthaamie barîa batwîre kîguuruune kîa Aveni na mûnene wa Bethiedeni. Antû ba Sîria bagatawa bathaamîrue nthîgûrû ya Kiri.”

⁶ MWATHANI ariuga atîrî, “Nîkwîthîrwa antû ba Gaza nî beeîtie kaîrî na kaîrî batîgûtiga, na nîûntû nî baathaamîrie mûgongo junthe barajwendia jûrî atae nthîgûrû ya Edomu, no mwanka mbakanûkîrie bûu.

⁷Tontû bûû, ngatûma mwanki jwîîthie nthingo cia ntûûra ya Gaza, jwîîthie biitiiro biaayo buru.

⁸Nkaathiria atongeeria ba ntûûra ya Ashidodi, na mûnene wa ntûûra ya Ashikeloni. Ngaakanûkia antû ba ntûûra ya Ekironi, na Afilisti barîa batigeere bakue.”

⁹ MWATHANI ariuga atîrî, “Nîkwîthîrwa antû ba Tiro nî beeîtie kaîrî na kaîrî batîgûtiga, na nîûntû nî baathaamîrie mûgongo junthe barajwendia jûrî atae nthîgûrû ya Edomu, na atî bataaririkana kûthithanîria ûrîa antû ba îthe ûmwe babuîrîte kûthithanîria, no mwanka mbakanûkîrie bûu.

¹⁰Tontû bûû, ngatûma mwanki jwîîthie nthingo cia ntûûra ya Tiro, jwîîthie biitiiro biaayo buru.”

¹¹ MWATHANI ariuga atîrî, “Nîkwîthîrwa antû ba Edomu nî beîtie kaîrî na kaîrî batîgûtiga, na nî baagwati nî mûthûûro jûtîkûthira beengana na ataana ba ng'ina tabo antû ba Israeli, barabooraga na rûchiû batî na kîaao, no mwanka mbakanûkîrie bûu.

¹²Tontû bûû, ngatûma mwanki jwîîthie ntûûra ya Temani na jwîîthie biitiiro bia Bozira buru.”

¹³ MWATHANI ariuga atîrî, “Nîkwîthîrwa antû ba Amoni nî beeîtie kaîrî na kaîrî batîgûtiga, na nîûntû bwa gûkothora aka barî na mau kûrîa Gileadi bagîcwaa kwaramia nthîgûrû yaao, no mwanka mbakanûkîrie bûu.

¹⁴Tontû bûû, ngatûma mwanki jwîîthie nthingo cia ntûûra ya Raba jwîîthie biitiiro biaao buru. Naku gûkeethîrwa kûrî na nkuuro ntukû îîu ya ndwaa, ndwaa îng'ente na inya mono.

¹⁵Nawe mûnene waao amwe na atongeeria baawe bonthe bagaikua kîthamîrioone.”