Read KIMERU BIBLE PROTESTANT EDITION Amo 2 Bible Online

Amo 2 - KIMERU BIBLE PROTESTANT EDITION bible

Amo 2

¹ MWATHANI ariuga atîrî, “Nîkwîthîrwa antû ba Moabu nî beîtie kaîrî na kaîrî batîgûtiga, nîûntû nî baaîthîrie marûitû ja mûnene wa Edomu mwanka jaraa mûju, no mwanka mbakanûkîrie bûu.

²Tontû bûû, ngatûma mwanki nthîgûrûûne ya Moabu jwîîthie biitiiro bia Keriothi buru. Nabo antû ba Moabu bakooragwa na nkuuro cia ndwaa ikiigîîkaga na tarumbeta ikîringagwa.

³Nawe mûnene wa Moabu, amwe na atongeeria baawe mbathirie buru.”

⁴MWATHANI ariuga atîrî, “Nîkwîthîrwa antû ba Juda nî beîtie kaîrî na kaîrî batîgûtiga, No mwanka mbakanûkie. Tontû bo nî baregete kwathîkîra Waatho bwaakwa, na bararega kûthingata mataaro jaakwa. Nî baatithîtue njîra nî mîrungu îrîa yaatithîrie biûjûjû biaao njîra.

⁵Tontû bûû, ngatûma mwanki nthîgûrû ya Juda, jwîîthie biitiiro bia Jerusalemu buru.”

⁶MWATHANI ariuga atîrî, “Nîkwîthîrwa antû ba Israeli nî beeîtie kaîrî na kaîrî batîgûtiga, no mwanka mbakanûkîrie bûu. Tontû bo beendagia barîa baagîru baremwa kûrîaa marandû jaao na nkîa îrîa yaremwa nî kûrîaa mbeecha cia iraatû.

⁷Ningî bo bakinyangagîra nkîa nthî na bakeenga athîîni babeethîra njîreene. Mûtaana na îthe bathengagîîra mwarî ûmwe bageekîra riîtwa rîaakwa rîrîtheru mûgiro.

⁸Kinya iromberoone biaao, bamamagîra nguû irîa batigîri nî nkîa bagwatagîîra nîûntû bwa marandû jaao. Ningî ndibei îrîa baaritîri baini nî eerandû baao, bakanyuîra kîûrûûne kîa Mûrungu waao.

⁹ Anga ni tî ni ndooragîre Aamori nîûntû bweenu! Kinya bakeethîrwa nî bareei ta mîtarakwa na baarî inya ta miuuru. Nî ndaabathirîrie buru amwe na nchiarwa ciaao.

¹⁰Nî ni ndaabûritîre nthîgûrûûne ya Misri na ndabûtongeeria bûrî rwanda mîaka mîrongo îna, nîkenda bwigwatîra nthîgûrû ya Aamori.

¹¹ Ndaathuurîre iroria kuuma kîrî aana beenu na Anaziri[1] kuuma kîrî nthaka cieenu anga tî ûu ndaabûthithîîrie îbuî antû ba Israeli? Ûu nîu MWATHANI akuuga.

¹²Îndî buî nî bwanyuithîrie Anaziri ndibei na bwakaania iroria, bwabiîra ‘Bûkároria.’

¹³Nkabûkanûkia nyiyie mwîtîre jweenu, ta ûrîa ngaarî ya ntigiri înyiagia mwîtîre, yakamatithua mono.

¹⁴Muntû ûrîa ûrî rwîro rûkamûthirîra na ûrîa ûrî inya îkamûûrîra nabu ûng'entu bwa nchamba bûtîmionokia.

¹⁵Kinya ûrîa wiijî kûratha bwega na mîgwî atiirikîria na ûrîa ûûgîaga mono atiiteethia, Kana asikarî wa mbarathi acionokia.

¹⁶Ntukû îîu kinya asikarî ûrîa mûng'entu buru agaatiga mathaga jaawe ja ndwaa amatûke.” Ûu nîu MWATHANI akuuga.