Read KIMERU BIBLE PROTESTANT EDITION Amo 3 Bible Online

Amo 3 - KIMERU BIBLE PROTESTANT EDITION bible

Amo 3

¹Thikîîreeni ûrîa MWATHANI akuuga mantû jabwegiî buî antû ba Israeli, buî ba rûrîîjo rûrîa MWATHANI aaritîre nthîgûrû ya Misri. MWATHANI ariuga atîrî,

²“Kîrî antû bangî bonthe ba nthîgûrû nî buî bwinka nthuurîte; tontû bûu, nkaabûkanûkia nîûntû bwa meeyia jeenu jonthe.”

³“Antû baîrî rî, boomba gwîtania batîrîkeenie?

⁴Ngatûnyi nî îruumaga mwitûûne ûtheri îtîgwete gantû? A-kîanaana kîa ngatûnyi kîomba kûng'enta ûtheri kîrî kîmamoone gîaakîo gîtîgwete noo mbi?

⁵Nyoni-rî, ka îkuujagîîrua mûtegoone jûtî na mpîndî? A gîtegi rî, kîomba gûtegûka o ûu ûtheri gîtîringithîtue?

⁶Tarumbeta ya ndwaa yoomba kûringwa ntûûreene na antû batîmake? Mûtino jwoomba kwîjîîra ntûûra tiga MWATHANI atîjûrekeeretie?

⁷Nî mma MWATHANI Mûrungu gûtî u athithagia atîguûrîrîte iroria, tabio nthûûmba ciaawe.

⁸Ngatûnyi nî îruumîte; nûû we ûkarega kûmaka? MWATHANI nî arîtie; nûû we ûkarega kûroria?

⁹Tûmîîria kîrî barîa batwîre biitiiroone Misri na Ashidodi uuge atîrî, ‘Kinyeni ngîrî bûcionere moothûûku jamaingî na kûinyanîîria kûrîa kûrî ntûûreene ya Samaria.’

¹⁰Antû ba ntûûra iji batiijî kûthithanîria mantû ja iota, boojûrîtie nyomba ciaao na ûûî na into birîa batuunyanîte na inya.”

¹¹Tontû bûû, MWATHANI Mûrungu ariuga atîrî, “Anthû bakaathiûrûkîra nthîgûrû yaao, na bamomorange nthingo irîa ibwirigîrîte, na batae ûtonga bweenu kuuma biitiiroone bieenu.”

¹²MWATHANI ariuga atîrî, “O ta ûrîa mûrîîthi gûtîkîo oonokagia ng'ondu yaarîîwa nî ngatûnyi tiga mathagiro na gachunchî ga gûtû noou gûgaakara kîrî Aisraeli barîa batwîre Samaria. Nî tûchunchî twa itî na itanda biaao bakoonokia.

¹³MWATHANI Mûrungu Mweneinya ariuga atîrî, Thikîîra wîre nchiarwa cia Jakubu ûjû:

¹⁴ ntukû îrîa ngaakanûkia Israeli nîûntû bwa meeyia jaao, nîyo nkaathiria iritîro bia igongwana bia Betheli buru koona cio-inya cia kîritîro kîa igongwana kîu ikaunangwa îgwe nthî.

¹⁵Nkaamomoranga nyomba ciaao cia îgiita rîa mpio na cia îgiita rîa mûû; nthiranîrie nyomba ciaaki na mîgwongo na nyomba îrîa nene.”