Read KIMERU BIBLE PROTESTANT EDITION Amo 4 Bible Online

Amo 4 - KIMERU BIBLE PROTESTANT EDITION bible

Amo 4

¹Thikîîreeni nteto iji, buî aka ba Samaria buî bûnorete ta ng'ombe cia Bashani, buî bûthangîkagia barîa batî na inya, na bûkainyîîria nkîa; buî bwîraga akûrû beenu babûreetere ndibei bûnyue.

²Tontû MWATHANI Mûrungu nî Ûmûtheru, aciîtîtie auga atîrî, “Îgiita nî rîîjîte rîrîa bûkaagwatua na ndwano bwinthe buru bûkare ta makûyû jagwetue na ndwano.

³Bûkaumagarua oome ya ntûûra bûkururîrîîtue ikuthoone bia rûthingo bûgerwe Hamoni.” [2]

⁴MWATHANI Mûrungu ariuga atîrî, “Antû ba Israeli, Njûûni Betheli bûthithie meeyia tu! Bwîte Giligali bûthegeyie meeyia tu! Îteeni na mbere kûreetaga igongwana o rûkîîrî o rûkîîrî na îchunchî bieenu bia kîmwe kuuma kîrî îkûmi o ntukû ya ithatû.

⁵Riteeni kinya mîgaate iimbithîtue îrî kîgongwana gîa nkaatho, na bwikumie nîûntû bwa igongwana bia gûciendera nîûntû mantû jau nîjo bûgwîragîrua kûthithia.

⁶Ndaabûreetere mpara ntûûreene cieenu cionthe bûraaga biakûrîa kûrîa bûtûûraga kunthe, amwe na bûu bûtaacoka kîrî ni.

⁷Ningî ndîrarigîîria ngai îtîkaure rîrîa imera bieenu biatigeerie mîeri îthatû bikethwa; ndaaurithagia ngai ntûûra îmwe ngatiga ntûûra ingî gûtiurîte; nkaurithia ngai muundeene jûmwe ngatiga miuunda îngî gûtiurîte imera bikooma.

⁸Antû barîîwa nî nyoonta, baraanga na ntûûra bagîcwaa rûûjî îndî rûtîbang'ane. Amwe na bûu bûtaacokere kîrî ni.

⁹Ndîrabûtûmîra mîrimo na îreenyangia imera bieenu, ngigî irarîa mîzabibû yeenu, na mîkûû, na mîzeituni. Amwe na bûu bûtaacokere kîrî ni.

¹⁰Nî ndaabûtûmîîre mûrimo jûmûthûûku ta jûrîa ndaatûmîrîte antû ba Misri; ndooragîra nthaka cieenu ndweene na ndaataa mbarathi cieenu cia ndwaa; ndaatûma kîrumba kîa biimba kîûjûra kambîîne yeenu. Amwe na bûu bûtaacoka kîrî ni.

¹¹ Ndîrooraga bamwe beenu o ta ûrîa ndooragîre antû ba Sodomu na Gomora, Nî mma bamwe beenu nî boonokere, bakari ta kînyinga kîriti riiko. Amwe na bûu bûtaacokere kîrî ni.

¹²Tontû bûû, buî antû ba Israeli, kûrî u nkaabûthithîria, na nîûntû nkaabûthithîria u-rî ithuranîreni gûtirimana îgambeene nani Mûrungu weenu. Ûu nîu ni MWATHANI nkuuga.”

¹³We Ûrîa woombîre irîma na ruuo, ûguûragîra muntû mathûgaanio jaawe; agatûma gûtuka rûkîîrî, na eetagîîra irîmeene bia nthîgûrû, riîtwa rîaawe nî MWATHANI Mûrungu Mweneinya.