Read KIMERU BIBLE PROTESTANT EDITION Amo 5 Bible Online

Amo 5 - KIMERU BIBLE PROTESTANT EDITION bible

Amo 5

¹Antû ba Israeli, thikîîreeni rwîmbo rwa kîrîro rûrîa nkûbwinîra:

²“Israeli mwarî karaiti îgwîte ûrîa îtîkorookîîra kaîrî. Îîrûkîri yatigwa yonka, îtî na wa kûmîteethia yûûkîîra.”

³MWATHANI Mûrungu arîkwîra atîrî, Îgwe Israeli: “Rîrîa ntûûra îgaikia asikarî ngiri ndweene nî asikarî îgana akî bagaatigaraga, nayo îrîa îgaikia asikarî îgana ndweene nî asikarî îkûmi akî bagaacokaga.”

⁴MWATHANI arîîra antû ba Israeli atîrî, “Ncweeni naabuî bûgatûûra mwoyo

⁵Tigeeni gwîta kîrombero kûu Betheli kana kinya Giligali, kana Beerisheba. Tontû antû ba Giligali bagaikua kîthamîrioone na Betheli îkaathirua buru.”

⁶Cwaageni MWATHANI naabuî bûgaatûûra mwoyo, atîkeeje gûtûrîkîra antû ba Israeli ta mwanki, mwanki jûu jûkaîîthia antû ba Betheli na gûtî we ûkoomba kûjworia.

⁷Ûûi kîrî buî barîa bûkombokagia îota na bûkaregana na waagîru!

⁸ We ûrîa woombîre njota irîa ciîtagwa Karîmîra na Nkûûnkû na atûmaga ûtukû bûkea na agatûma mûthenya jûtuka, We ûrîa wîîtaîtaga rûûjî rwa îria agatûma rwereera, Riîtwa rîaawe nî MWATHANI.

⁹Nîwe ûthiragia barîa barî inya na akeenyangia biitiiro biaao.

¹⁰Buî bûthwîre barîa bagambanagîra na îota na barîa batîendaga gûkûjîîra mantû ja ûrongo.

¹¹Tontû nî bûinyîrîtie nkîa na kûbeetia ûgoti bûbûnene bwa nkano bûtîkororaara nyomba inthongi irîa bûciakîrîte kana bûnyua ndibei ya mîzabibû îmîega îrîa bûrîmîte.

¹²Ûûni nî mbijî ûrîa maatia jeenu jathûûki na ûrîa meeyia jeenu jaingîîte. Buî bûthîînagia barîa baagîru, bûkajûkia nkukumo na bûkarigîîria nkîa igiitîrwa magamba na îota.

¹³Tontû bûû, muntû ûrîa mûûme ga akiraga ki magiita ta jau nîûntû nî magiita jamathûûku.

¹⁴Cwaageni wega îndî bûgacwageni ûthûûku, nîkenda bûtûûra mwoyo; nawe MWATHANI Mûrungu Mweneinya akethagîrwa arî amwe naabuî, o ta ûrîa buî buugaga.

¹⁵Endeni wega, bûthûûre ûthûûku bûgambanagîre na îota, kwombîka MWATHANI Mûrungu Mweneinya akaigîîrua antû ba Israeli barîa batigarîte kîaao.

¹⁶Tontû bûû, MWATHANI Mûrungu Mweneinya ariuga atîrî, “Gûkeethîrwa kûrî na kîrîro na mbu biaragoone na njîreene cionthe cia ntûûra; antû bakiugaga, ‘Wûûî! Wûûî!’ Kinya arîmi bageetwa bairinganîre na arîrîri ba kûrîwa barîrîre akuû,

¹⁷gûkare na kîrîro miuundeene ya mîzabibû ndeeja kûbûkanûkia.”

¹⁸Wûi kîrî buî bwendaga ntukû ya MWATHANI îîja! Bûrîthûgaania ntukû îîu îkaabûguna? Ntukû îîu îtîîja na weerû no muundu.

¹⁹Gûgakara ta muntû wîngi nî ngatûnyi, akëethîra ndûû; kana ta muntû weeta kûnogoka nyomba akarûmîrwa ku nî njoka.

²⁰Anga ntukû ya MWATHANI îtîîthîrwa îrî ya muundu akî antû a weerû? Îkeethîrwa îrî ntukû îmbîî mono.

²¹MWATHANI Mûrungu Mweneinya ariuga atîrî, “Nî nthwîre biatho bieenu nkamena biûthûrano bieenu bia maromba.

²²Bwanditîra igongwana bieenu bia gwakîîria na bia irio ntîbiîtîkîîria. Nabio igongwana bieenu bia thîîrî bia nyama cieenu irîa noru ntîbitega na meetho.

²³Tigeeni kûndingîra gîtuma na ndwîmbo cieenu; ntîkwenda bûûmbinîra na inanda bieenu.

²⁴Îndî rekeni îota rînyûûrûûke ta rûûjî waagîru bwînamage ta mûuro jûtîûûjaga.

²⁵“Antû ba Israeli, ka bwanditagîra igongwana na biewa rîrîa bwaarî rwanda mîaka mîrongo îna (40)?

²⁶Îndî nandî buî nî bwithithîrîtie na bwathaathayia mîrungu yeenu tayo Sakuthi, mûrungu jûrîa mûnene na Kaiwani, mûrungu jwa njota.

²⁷Tontû bûû, nkaabwikia kîthamîrioone kûraaja mono na Damaski.” Ûu nîu MWATHANI akuuga ûrîa riîtwa rîaawe ni Mûrungu Mweneinya.