Read KIMERU BIBLE PROTESTANT EDITION Amo 6 Bible Online

Amo 6 - KIMERU BIBLE PROTESTANT EDITION bible

Amo 6

¹Wûi kîrî buî barîa bûtwîre kiindaajî kûu Jerusalemu na buî bwîtîkîtie bûrî thîîria kûu Samaria; Bûthûgaanagia bûrî antû ba îgweta mono na bûrî ba nthîgûrû îrîa njega buru ya Israeli, na antû ba mîîrîga ya Israeli beejaga gûcwaa ûteethio kîrî buî.

²Îteeni bûgacionere ntûûra ya Kaline, na bwauma au bwîte ntûûra îrîa nene ya Hamathi; rîu bwîname ntûûra ya Afilisti ya Gathi. Nîka bûrî babeega nkûrûki ya moonene jau? Nîka nthîgûrû yeenu îrî înene nkûrûki ya ciaao?

³Ûûi kîrî buî, bûregaga gwîtîkîîria ntukû ya îkanûkia îrî akuî îndî bûkareetareeta îgiita rîa kûthîînania.

⁴Ûûi kîrî barîa bamamagîra itaanda bia mîgwongo, na bûgaitambûrûkia itîîne biaao bia goro, na bakarîjaga nyama injega na imboro.

⁵Ûûi kîrî buî barîa bwinaga ndwîmbo wandîîndî ikîringwa buî bwitungaîra ndwîmbo cia kwina na inanda ta Daudi

⁶Ûûi kîrî buî barîa bûnyunyaga ndibei înyiingî na bûgaaciaka marashi jarîa meega buru îndî bûtîkûûria ûrîa Israeli îkûûra!

⁷Tontû bûû, nî buî bûkaa ba mbere gwikua kîthamîrioone, nacio ndea na mambura jeenu bigaakinya mûthia.

⁸MWATHANI Mûrungu Mweneinya aciîtîtie auga atîrî, “Nî nthwîre rwikumio rwa antû ba Israeli na ntîendeete biitiiro biaao; naani nkaanenkanîra ntûûra na bionthe birîa birî ku kîrî anthû.”

⁹Ningî gûgaakara atîrî, gûkëeja kwîthîrwa ûû ta antû îkûmi batigeere barî nyomba îmwe, kinya bo bagaakua.

¹⁰Rîu ndûgû ciaao cieejîra biimba beeta kûthika, bakooranagia atîrî, “Kûrî we ûtigi arî mwoyo?” Nawe ûûngî agaacokia atîrî, “Gûtî we.” Nabo bakeerana atîrî, “Kira. Menya wîja kûgweta riîtwa rîa MWATHANI.”

¹¹Rîrîa MWATHANI akarita Waatho, nyomba îrîa nene na inini ikathetherangwa buru.

¹²Ka mbarathi ciûgîagîîra rwareene rwa maiga kana muntû arîma îria na mûraû jwa ng'ombe? Îndî bûthûûkîtie ûûma bwaa ûrogi na waagîru bwaa ng'ana.

¹³Bwikumagia nîûntû bwa gûtaa ntûûra ya Lodebari bûkauga, “Tûrî na inya ya gûtaa ntûûra ya Karinaimu.”

¹⁴MWATHANI Mûrungu Mweneinya arîbwîra atîrî, “Buî antû ba Israeli ngatûma bwithûkîrwa nî mûgongo najû jûkabwinyîîria kuuma bwa rûgûrû Mûcîcîbîroone jwa Hamathi mwanka bwa gaiti karûûjîîne ka Araba.”