Read KIMERU BIBLE PROTESTANT EDITION Amo 7 Bible Online

Amo 7 - KIMERU BIBLE PROTESTANT EDITION bible

Amo 7

¹MWATHANI Mûrungu nî aanguûrîîre mantû jaja: Atîrî, ndîroona MWATHANI akîthuranîra mûrumbî jwa ngigî o nyuma ya gûtemwa kwa nyaki ya mûnene, rîrîa nyaki îtheûkaga.

²Ngigî iu nacio îrarîa imera bionthe ireegera nthîgûrû. Rîu ndîrakaya ndîrauga atîrî, “Itû MWATHANI Mûrungu rekera antû baaku. Nîatîa antû ba Israeli boomba kwonoka na nî antû batî na inya no îrîku?”

³MWATHANI aratigana na ûntû bûu arambîîra atîrî, “Ntîthithia ûntû bûu.”

⁴Ningî MWATHANI Mûrungu nî aanguûrîîre mantû jaja: Atîrî, ndîroona MWATHANI Mûrungu agîîtaga mwanki jwîja gûkanûkia antû. Naju jûroomia îria rîrînene rîrîa rîrî rungu rwa nthîgûrû na jûrambîrîria gwitia jûkîîthagia nthîgûrû înjûmo.

⁵Rîu ndîrauga atîrî, “Itû MWATHANI Mûrungu ndakwerenca ûtige. Nîatîa antû ba Israeli boomba kwonoka, na nî antû batî na inya noo îrîku?”

⁶MWATHANI Mûrungu aratigana na ûntû bûu arambîîra atîrî, “Ntîthithia ûntû bûu kinya bu.”

⁷Ningî nî aanguûrîîre kaîrî ndîroona MWATHANI arûngami agwete kabirû rûteere rwa rûthingo rwaaki rûthimi na kabirû.

⁸MWATHANI arambûûria atîrî, “Amosi, nîmbi ûkwona ngwete?” Naani ndîramûcokeria, “Nî kabirû.” Rîu MWATHANI arambîîra atîrî, “Nkaarûngîka kabirû gatîgatî ka antû baakwa Israeli kwonania ûrîa mîîtîre yaao îkomboki. Ntîgarûka kaîrî ntiga kûbakanûkia.

⁹Gûntû kûrîa kûrombagîrwa nî nchiarwa cia Isaaka gûkaathûkangua. Naku gûntû gûkûtheru kûrîa Aisraeli barombagîra gûkaaethua maganjo. Ningî ûûni MWATHANI nkaithûkîra nja ya mûnene Jeroboamu na mbooragîre ndweene.”

¹⁰Nawe Amazia mûthînjîri-Mûrungu wa Betheli, nî aatûmanîre kîrî Jeroboamu mûnene wa Israeli arauga atîrî, “Amosi nî agûkûthûûkia kîrî antû ba Israeli. Nayo nthîgûrû yeetû îtîkûgunwa nî nteto irîa cionthe akwaria.

¹¹Nîkwîthîrwa Amosi augîîte atîrî, ‘Jeroboamu akooragîrwa ndweene, nayo Israeli îgaikua kîthamîrioone kîrî kûraaja na nthîgûrû yaao.’”

¹²Ningî Amazia nî eerîre Amosi atîrî, “Itû kîroria, ûûkia magûrû ûciîtîre nthîgûrûûne ya Juda, ûkarorie nao na bakûrîage nîûntû bwa kubaroreria kûu.

¹³Îndî menya ûroreria Betheli kaîrî nîûntû nîkîo kîrombero kîa mûnene, na nîkîo kîûrû kîa mûgongo.”

¹⁴Amosi aracokeria Amazia aramwîra atîrî, “Ûûni ntî kîroria kana mbîthîrwa ndî mwana wa kîroria! Ûûni ndî mûrîîthi wa ndîîthia na mûrîmi wa mîkûû.

¹⁵MWATHANI nî aanditîre ûrîîthine arambîîra atîrî, ‘Îta ûkarorerie antû baakwa ba Israeli.’

¹⁶Tontû bûû, nandî, thikîîra rûteto rwa MWATHANI. Gwe ûriuga, ‘Menya ûroreria Israeli bûbûthûûku kana ûtûmîîria bûbûûî bwegie nchiarwa cia Isaaka.’

¹⁷Tontû bûû, MWATHANI arîkwîra atîrî gwe Amazia, ‘Mûka waaku akaa maraya ja ntûûra nacio nthaka na aarî baaku booragîrwe ndweene. Naju muunda jwaaku jûkagwatwa nî antû bagaane ju. Naagwe gwengwa ûkuîre nthîgûrû ya ûthûûkû. Nabo antû ba Israeli bagaikua kîthamîrioone kûraaja na nthîgûrû yaao.’”