Read KIMERU BIBLE PROTESTANT EDITION Amo 8 Bible Online

Amo 8 - KIMERU BIBLE PROTESTANT EDITION bible

Amo 8

¹Ndîracoka ndîraguûrîrwa ûntû bûngî nî MWATHANI Mûrungu. Atîrî, ndîroona gîkabû kîrî na matuunda jaguundi.

²MWATHANI arambûûria atîrî, “Amosi nîmbi ûkwona?” Naani ndîramwîra, “Nî gîkabû kîrî na matuunda jaguundi jakinyîtie a kûrîîwa.” MWATHANI arambîîra atîrî, “O ûû nîu Aisraeli bakinyîte a gûkanûkua ntîkorobarekera kaîrî.”

³MWATHANI Mûrungu ariuga atîrî, “Ntukû îîu yakinya ndwîmbo cia nkerû irîa ciinagwa gîkaroone kîa mûnene ikaa ndwîmbo cia kîrîro. Antû bagaakua babaingî ntungu igerwe gûntû kunthe, kwîthîrwe gûkiri ki.

⁴Thikîîreeni nteto iji bwigue buî bûinyagîîria nkîa bûgacwaa ûrîa bûthiria athîîni nthîgûrûûne.

⁵Bûkaraga bûgîciûragia ‘Nî rî mambura ja mweri jûkîguûka jakathira twambîrîria kwendia irio bieetû? Nî rî sabatû îkaathira twîta na mbere na biashara cieetû twambîrîîria kûringa biashara kaîrî? Nîkenda twitithia moogûri ja into bieetû, na twayia antû na ratiri na ithimi.

⁶Ningî nîkenda nkîa irîa ciaremwa nî kûrîaa tûrandû tûniini ta twa ûgûri bwa iraatû tûcigûra na fetha na twendie mataaro ja nkano?’”

⁷MWATHANI ûrîa Aisraeli baikumagîria nî aciîtîtie auga atîrî, “Nî mma ntîûrîrua nî ûntû kinya bûmwe bwa jarîa bathithîtie.

⁸Nthîgûrûûne yonthe îgaateetema nîûntû bûu na antû bonthe barîa batwîre ku baithikîîre. Nthîgûrû yonthe îkainainua yûkîîre na kûgwa ta rûûjî rwa Naili rûrîa rûrî Misri.”

⁹MWATHANI Mûrungu ariuga atîrî, “Ntukû îîu yakinya riûa rîkaathûa mûthenya gatîgatî, muundu jûkunîke nthîgûrû riûa rîrûngi.

¹⁰Nkaagarûra mambura jeenu jaee mathiko na ndwîmbo cieenu cia nkerû ciee cia kîrîro. Ngaatûma antû bonthe beekîre mathango na bacienje mîtwe yaao. Ningî antû bakaarîra ta aciari bakûrîrîra mûtaana wa mûûmwe. Tontû ntukû îîu îkeethîrwa îrî înthûûku mono.”

¹¹MWATHANI Mûrungu ariuga atîrî, “Îgiita nî rîîjîte rîrîa ngatûma mpara nthîgûrûûne nayo tî mpara ya biakûrîa kana nyoonta ya rûûjî, îndî nî mpara na nyoonta ya kwigua rûteto rwa MWATHANI.” Ûu nîu MWATHANI akuuga.

¹²“Antû bagatua kuumaga îrieene rîa Chumbî bageeta mwanka îrieene rîa Mediterania, bakauma bwa ûrîo bageeta bwa gaiti; baitia bakeenama bagîcwaga rûteto rwa MWATHANI, îndî batîrwona.

¹³Ntukû îîu yakinya aarî babathongi na nthaka bakaagirîka nîûntû bwa nyoonta.

¹⁴Barîa nabo baciîtagia na mîrungu ya mîng'uanano ya Samaria bakiugaga, ‘Riîtweene rîa mûrungu jwa Dani,’ kana ‘Riîtweene rîa mûrungu jwa Beerisheba,’ bakaagwaa ûntû batîûkîîra kaîrî.”