Read KIMERU BIBLE PROTESTANT EDITION Oba 1 Bible Online

Oba 1 - KIMERU BIBLE PROTESTANT EDITION bible

Oba 1

¹ Jaja nî mantû jarîa MWATHANI Mûrungu oonerie Obadia jegiî mûgongo jwa Edomu. MWATHANI nî atûmîte mûtûmwa kîrî mîgongo naatuî nî twigîîtue nteto ciaawe irîa ikuuga atîrî, “Tuithuranîreni tûkarwe na Edomu.”

²MWATHANI arîîra Edomu atîrî, “Ngaakwethia kamûgongo kaniini buru kîrî mîgongo îngî, naagwe ûkaamenwa nî antû bonthe.

³Rwikumio rwa antû ba Edomu nî rûbwaîîrîîtie. Bûtûûraga irîmeene îgûrû mbachueene cia maiga. Tontû bûû, bûciîraga atîrî, ‘Gûtî we ûûmba gûtwînîka atûringa nthî.’

⁴Kinya bwabuurûûka bwaitia îgûrû ta ndiiû bwaciakîra itûûro njoteene, noka nkaabwînîka mbûringe nthî.” Ûu nîu MWATHANI akuuga.

⁵“Atuunyani bakëeja kûbwîjîîra, kana aamba bakabuithûkîra ûtukû, tîka bajûkagia kîrîa bakwenda? Akethi bakëeja gûketha nzabibû ciaaku noka batigaria inkai? Îndî anthû beenu nîka bakaabûthiria buru.

⁶Buî nchiarwa cia Esaû, mîthithû yeenu nî îtaîtue.

⁷Barîa bonthe bûrî ngwatanîro nabo nî babwaîîrîtie nî babwîngîte kuuma nthîgûrûûne yeenu. Barîa bûrî na thîîrî nabo bakabwithûkîra babûûmbe ndweene. Nabo acoore barîa bûrîîjanagîra nabo biakûrîa bieenu bakaabûkûmîra mîtego, naabuî bûtîûmba kûmenya.”

⁸MWATHANI arîûria atîrî, “Ntukû îîu yakinya anga ntîthiria antû barîa boome ba Edomu nthirie ûmenyo kuuma kîrîmeene kîa Esaû?

⁹Nacio nchamba cia ndwaa cia ntûûra ya Temani igeekîrwa ûguaa mono, na antû ba Edomu bonthe booragwe.

¹⁰Tontû bwa ûthûûku bûrîa bwathithîîrie ataana ba abaagu nchiarwa cia Jakubu bûkoojûrwa nî nthao bûthirue buru kenya na kenya.

¹¹Ntukû îîu bwaarûngamîre gataaria bûtîgûteethia anthû nabo barataa into biaao. Bwakari ûmwe na anthû barîa baaunangîre mpingîro cia Jerusalemu na bararingîra into bia ntûûra îîu kuura nîkenda babigaana.

¹²Buî bûtaabuîri kûgwîrîrua kwithûkîrwa gwa antû ba Juda; bûgwîrua kwona ataana ba abaagu bakîjîîrwa nî ûthûûku. Bûtaabuîri kûbaikumîria ntukû îîu.

¹³Buî bûtaabuîri gûtonya ntûûreene ya antû baakwa, rîrîa baarî thîîneene; bûgwîrua nîûntû bakwona ûthûûku ntukû îîu ya thîîna. Bûtaabuîri gûtaa into biaao ntukû îîu yaao ya thîîna.

¹⁴Bûtaabuîri kûrûngama macemanîrio ja njîra na kûgiria barîa baatigeere bamatûka. Bûtaabuîri kûbanenkanîra kîrî anthû baao ntukû îîu ya kwithikîîra.

¹⁵Ntukû ya MWATHANI nî yeengeeretie gûkinya îrîa akagiitîra mîgongo yonthe îgamba. Naabuî bûkaathithîrua o ta ûrîa bûthithanîrîtie, bûcokerwe nî mathithio jeenu bwingwa.

¹⁶Tontû antû baakwa nî banyuîte gîkombe gîa îkanûkia barî kîrîmeene gîaakwa kîrîa kîtheru; nîu mîgongo yonthe îrîa îbathiûrûkîrîte ikaanyua gîkombe kîu gîa îkanûkia. Îkaanyuîra gîkombeene kîu îtang'atang'e îkare ta îteethîrwa îrî o.”

¹⁷“Îndî kûrî bo bakaamatûka beete kîrîmeene gîa Zaiûni, kîrîma gîkîtheru. Nchiarwa cia Jakubu ciigwatîre nthîgûrû îrîa îrî yaao.

¹⁸Nchiarwa cia Jakubu ikaa mwanki nacio cia Josefu ciee rûmûrî, Nacio nchiarwa cia Esaû ciee matî jamoomo, Gûtî wa nchiarwa cia Esaû ûkoonoka.” Ûu nîu ûûni MWATHANI ndauga.

¹⁹Antû ba MWATHANI bakaajûkua kaîrî kuuma kîrî Aedomu nthîgûrû îrîa îrî bwa ûmotho ya Juda, na baajûkie kaîrî kuuma kîrî Afilisti nthîgûrû ya irîma îrîa îrî bwa rûgûrû. Bakaajûkia kaîrî nthîgûrû ya Efuraimu na ya Samaria, nacio nchiarwa cia Benjamini îjûkie Gileadi.

²⁰Antû ba Israeli barîa barî kîthamîrioone bagaacoka batae kuuma Foenicia mwanka Zarefathi; nabo atae ba Jerusalemu barîa barî Sefaradi bagaataa ntûûra irîa irî ûmotho bwa nthîgûrû ya Juda.

²¹Nchamba cia ndwaa igeeta kîrîmeene gîa Zaiûni ciathagîre antû barîa batwîre Edomu au. Nabu waathani bûu bûkaa bwa MWATHANI.