Read KIMERU BIBLE PROTESTANT EDITION Jona 1 Bible Online

Jona 1 - KIMERU BIBLE PROTESTANT EDITION bible

Jona 1

¹ Ntukû îmwe MWATHANI nî aarîîrie Jona mûtaana wa Amitai aramwîra atîrî,

²“Ithuranîre wîte Nineve ntûûra îrîa nene, ûgatûmîîrie antû baayo mantû jegiî ûthûûku bwaao bûrîa bûnkinyîrîte.”

³Îndî Jona arookîîra areeta Tarishishi nîkenda amatûka MWATHANI. Nawe areenama areeta Jopa na areethîra meri yaarî akuî gwîta Tarishishi. Tontû bûû, ararîa mbeecha cia rûgendo, arakûrûka ku nîkenda eetania na eetithia ba meri îîu Tarishishi amatûka MWATHANI.

⁴MWATHANI arareeta ruuo rûrûnene na kûragîa na kiurutani gîkînene mono mwanka meri îreethîrwa îrî ûgwatiine bwa kuunîkanga.

⁵Rîu eetithia ba meri îîu baragîa ûguaa na o muntû arakaîra mûrungu jwaawe. Baragera mîrigo yaao îrieene nîkenda meri îîu îûtha. Îndî Jona nî aarî akwînama meeriine bwa ndeene buru, na aamama na aagwatwa nî toro înene.

⁶Nawe mûtongeeria wa meri areeta kîrî we aramûûria, “Ka ûmami? Ûkîîra ûkaîre mûrungu jwaaku! Kwoombîka jûgatwigîîrua kîaao tûkarega kûthira.”

⁷Nabo eetithia ba meri bareerana, “Njûûni, tuune mîtî nîkenda tûmenya nûû ûtûmîte ûthûûku bûbû bûtwîjîîra.” Barauna mîtî, na mûtî jûragwîîra Jona.

⁸Rîu baramwîra atîrî, “Twîre gwe, nûû ûtûmîte ûthûûku bûbû bûtwîjîîra? Nî ngûgî îrîkû ûritaga? Nîkû uumîte? Nthîgûrû yeenu nî îrîkû? Antû beenu bo rî, nî barîkû?”

⁹Nawe Jona arabacokeria atîrî, “Ndî Mûhibirania na ndombaga MWATHANI Mûrungu wa îgûrû ûrîa woombîre îria na nthî înjûmo.”

¹⁰Jona arabeera nîka amatûkîte MWATHANI, nabo antû bau baragwatwa nî ûguaa bûbwingî baramûûria atîrî, “Nîatîa ûûmba kûthithia ûntû bûbûthûûku ûjû?”

¹¹Îria narîo rîreeta na mbere kûthûûka nkûrûki. Rîu eetithia ba meri baramûûria, “Nîatîa tûgaakûthithîria nîkenda îria rîborera?”

¹²Jona arabacokeria atîrî, “Njûkieni bûngere îrieene narîo rîkaaborera, tontû nî nkûmenya nî îatia rîaakwa rîtûmîte kiurutani gîkînene ûjû kîbwîjîîra.”

¹³Îndî amwe na bûu eetithia ba meri barageria na inya yaao yonthe kûreeta meri akuî na nthî înjûmo nabo batîûmbe nîûntû kiurutani ka gîeetîre na mbere kwongeereka.

¹⁴Rîu barakaîra MWATHANI bakiugaga, “Twakwerenca, itû MWATHANI, ûgatûkanûkia na gîkuû nîûntû bwa kûûraga muntû ûûjû, ningî ûgatûrîyia tharike ya muntû ûûjû ûtîîtie. Tontû gwe MWATHANI ûthithagia ûrîa ûkwona gûkwagîrîte.”

¹⁵Tontû bûû, baramûjûkia baramûgera îrieene, narîo rîraborera.

¹⁶Ûntû bûu bûratûma eetithia ba meri bakîra MWATHANI mono mwanka baramûritîra kîgongwana na baraciîtia mîciîtio ya kûmwathîkîra.

¹⁷ Rîu MWATHANI aratûma gîkûyû gîkînene nîkenda kîmeria Jona, nawe arakara kîu kîa gîkûyû mîthenya îthatû na mootukû jathatû.