Read KIMERU BIBLE PROTESTANT EDITION Gût 1 Bible Online

Gût 1 - KIMERU BIBLE PROTESTANT EDITION bible

Gût 1

¹ MWATHANI nî aarîîrie Musa kûrî ntukû ya mbere, ya mweri jwa îîrî, mwakeene jwa îîrî kuuma rîrîa antû ba Israeli baaumîre nthîgûrûûne ya Misri. Musa arî îemeene rîa gûtirimanîra kûu rwanda rwa Sinai, MWATHANI nî aamwîrîre atîrî,

²“Tara antû bonthe ba kîûthûrano kionthe kîa antû ba Israeli kûringana na mîîrîga yaao na mîciî yaao. Waandîke mariîtwa ja arûme ba Israeli bonthe, ûmwe kwa ûmwe.

³Ûûgwe na Aaroni bûtare arûme ba Israeli bonthe, barîa barî na ûkûrû bwa mîaka mîrongo îîrî na nkûrûki, barîa boomba gwîta ndweene. Batarwe kûringana na ikundi bia njûûrî.

⁴Ningî bwîthîrwe bûrî na muntû ûmwe kuuma o mwîrîgeene, na eethîrwe arî mûtongeeria wa mûciî jwaawe nîkenda abûteethereria.

⁵Najo jaja nîjo mariîtwa ja arûme barîa bakabûtethereria. Kuuma mwîrîgeene jwa Rubeni, bûgaateethereerua nî Elizuri mûtaana wa Shedeuri.

⁶Kûuma mwîrîgeene jwa Simioni, bûgaateethererua nî Shelumieli mûtaana wa Zurishadai.

⁷Kûûma mwîrîgeene jwa Juda, bûgaateethererua nî Nahashoni mûtaana wa Aminadabu.

⁸Kuuma mwîrîgeene jwa Isakari, bûgaateethererua nî Nethaneli mûtaana wa Zuari.

⁹Kuuma mwîrîgeene jwa Zebuloni, bûgaateethererua nî Eliabu mûtaana wa Heloni.

¹⁰Kuuma kîrî nchiarwa cia Josefu cia mwîrîga jwa Efuraimu, bûgaateethererua nî Elishama mûtaana wa Amihudi. Kuuma mwîrîgeene jwa Manase, bûgaateethereerua nî Gamalieli mûtaana wa Pedahazuri.

¹¹Kuuma mwîrîgeene jwa Benjamini, bûgaateethererua nî Abidani, mûtaana wa Gideoni.

¹²Kuuma mwîrîgeene jwa Dani, bûgaateethererua nî Ahiezeri mûtaana wa Amishadai.

¹³Kuuma mwîrîgeene jwa Asheri, bûgaateethererua nî Pagieli mûtaana wa Okirani.

¹⁴Kuuma Mwîrîgeene jwa Gadi, bûgaateethererua nî Eliasafu mûtaana wa Deueli.

¹⁵Kuuma mwîrîgeene jwa Nafutali, bûgaateethererua nî Ahira mûtaana wa Enani.”

¹⁶Bau nîbo arûme barîa baathuurîrwe kuuma kîûthûrano kîa antû ba Israeli; barî atongeeria ba mîîrîga yaao na ba arungamîîri ba mîciî yaao.

¹⁷Musa, na Aaroni amwe na antû bau mariîtwa jaao jagweti,

¹⁸nî boothûranîrie kîûthûrano kionthe kîa antû ba Israeli kûrî ntukû ya mbere ya mweri jwa îîrî. Nabo baraandîka mariîtwa ja arûme barîa baarî na ûkûrû bwa mîaka mîrongo îîrî na nkûrûki, o muntû o muntû kûringana na mûciî jwaao na mwîrîga jwaao.

¹⁹Musa arabatara barî rwanda rwa Sinai, o ta ûrîa MWATHANI aamwîrîte.

²⁰Kuuma kîrî nchiarwa cia Rubeni, ûrîa waarî mûtaana wa mbere wa Jakubu, arûme bonthe barîa baarî na ûkûrû bwa mîaka mîrongo îîrî na nkûrûki, barîa barîîngî gwîta ndweene, nî baandîkîrwe mariîtwa jaao, o muntû o muntû kûringana na mûciî jwaao na mwîrîga jwaao.

²¹Arûme bau ba mwîrîga jwa Rubeni baarî antû ngiri mîrongo îna na ithanthatû cia magana jataano (46,500).

²²Kuuma kîrî nchiarwa cia Simioni, arûme bonthe barîa baarî na ûkûrû bwa mîaka mîrongo îîrî na nkûrûki, barîa barîîngî gwîta ndweene, nî baandîkîrwe mariîtwa jaao, o muntû o muntû kûringana na mûciî jwaao na mwîrîga jwaao.

²³Arûme bau ba mwîrîga jwa Simioni baarî antû ngiri mîrongo îtaano na kenda cia magana jathatû (59,300).

²⁴Kuuma kîrî mwîrîga jwa Gadi, arûme bonthe barîa baarî na ûkûrû bwa mîaka mîrongo îîrî na nkûrûki, barîa barîîngî gwîta ndweene, nî baandîkîrwe mariîtwa jaao, o muntû o muntû kûringana na mûciî jwaao na mwîrîga jwaao.

²⁵Arûme bau ba mwîrîga jwa Gadi baarî antû ngiri mîrongo îna na ithaano cia magana jatantatû ja mîrongo îtaano (45,650).

²⁶Kuuma kîrî mwîrîga jwa Juda, arûme bonthe barîa baarî na ûkûrû bwa mîaka mîrongo îîrî na nkûrûki, barîa barîîngî gwîta ndweene, nî baandîkîrwe mariîtwa jaao, o muntû o muntû kûringana na mîciî yaao na mîîrîga yaao.

²⁷Arûme bau ba mwîrîga jwa Juda baarî antû ngiri mîrongo mûgwanja na inya cia magana jatantatû (74,600).

²⁸Kuuma kîrî mwîrîga jwa Isakari, arûme bonthe barîa baarî na ûkûrû bwa mîaka mîrongo îîrî na nkûrûki, barîa barîîngî gwîta ndweene, nî baandîkîrwe mariîtwa jaao, o muntû o muntû kûringana na mîciî yaao na mîîrîga yaao.

²⁹Arûme bau ba mwîrîga jwa Isakari baarî antû ngiri mîrongo îtaano na inya cia magana jana (54,400).

³⁰Kuuma kîrî mwîrîga jwa Zebuloni, arûme bonthe barîa baarî na ûkûrû bwa mîaka mîrongo îîrî na nkûrûki, barîa barîîngî gwîta ndweene, nî baandîkîrwe mariîtwa jaao, o muntû o muntû kûringana na mîciî yaao na mîîrîga yaao.

³¹Antû bau ba mwîrîga jwa Zebuloni baarî antû ngiri mîrongo îtaano na mûgwanja cia magana jana (57,400).

³²Kuuma kîrî nchiarwa cia Josefu tabo antû ba mwîrîga jwa Efuraimu, arûme bonthe barîa baarî na ûkûrû bwa mîaka mîrongo îîrî na nkûrûki, barîa barîîngî gwîta ndweene, nî baandîkîrwe mariîtwa jaao, o muntû o muntû kûringana na mîciî yaao na mîîrîga yaao.

³³Antû bau ba mwîrîga jwa Efuraimu baarî antû ngiri mîrongo îna cia magana jataano (40,500).

³⁴Kuuma kîrî mwîrîga jwa Manase, arûme bonthe barîa baarî na ûkûrû bwa mîaka mîrongo îîrî na nkûrûki, barîa barîîngî gwîta ndweene, nî baandîkîrwe mariîtwa jaao, o muntû o muntû kûringana na mîciî yaao na mîîrîga yaao.

³⁵Antû bau ba mwîrîga jwa Manase baarî antû ngiri mîrongo îthatû na ijîîrî cia magana jaîrî (32,200).

³⁶Kuuma kîrî mwîrîga jwa Benjamini, arûme bonthe barîa baarî na ûkûrû bwa mîaka mîrongo îîrî na nkûrûki, barîa barîîngî gwîta ndweene, nî baandîkîrwe mariîtwa jaao, o muntû o muntû kûringana na mîciî yaao na mîîrîga yaao.

³⁷Antû bau ba mwîrîga jwa Benjamini baarî antû ngiri mîrongo îthatû na ithaano cia magana jana (35,400).

³⁸Kuuma kîrî mwîrîga jwa Dani, arûme bonthe barîa baarî na ûkûrû bwa mîaka mîrongo îîrî na nkûrûki, barîa barîîngî gwîta ndweene, nî baandîkîrwe mariîtwa jaao, o muntû o muntû kûringana na mîciî yaao na mîîrîga yaao.

³⁹Antû bau ba mwîrîga jwa Dani baarî antû ngiri mîrongo îtaantatû na ijîîrî cia magana mûgwanja (62,700).

⁴⁰Kuuma kîrî mwîrîga jwa Asheri, arûme bonthe barîa baarî na ûkûrû bwa mîaka mîrongo îîrî na nkûrûki, barîa barîîngî gwîta ndweene, nî baandîkîrwe mariîtwa jaao, o muntû o muntû kûringana na mîciî yaao na mîîrîga yaao.

⁴¹Antû bau ba mwîrîga jwa Asheri baarî antû ngiri mîrongo îna na îmwe cia magana jataano (41,500).

⁴²Kuuma kîrî mwîrîga jwa Nafutali, arûme bonthe barîa baarî na ûkûrû bwa mîaka mîrongo îîrî na nkûrûki, barîa barîîngî gwîta ndweene, nî baandîkîrwe mariîtwa jaao, o muntû o muntû kûringana na mîciî yaao na mîîrîga yaao.

⁴³Antû bau ba mwîrîga jwa Nafutali baarî antû ngiri mîrongo îtaano na îthatû cia magana jana (53,400).

⁴⁴Bau nîbo antû barîa baatarîrwe nî Musa, na Aaroni, bagîteethagîîrua nî atongeeria barîa îkûmi na baîrî. O mwîrîga jwaritîte mûtongeeria ûmwe.

⁴⁵Tontû bûû, arûme bonthe ba Israeli ba mîaka mîrongo îîrî na nkûrûki, barîa barîîngî gwîta ndweene, barîa baatarîrwe kûringana na mîciî yaao,

⁴⁶baarî antû ngiri magana jatantatû na ithatû, cia magana jataano ja mîrongo îtaano (603,550).

⁴⁷Nabo Alawi bataatarîîrwe mwîrîgeene jwaao ta antû bangî.

⁴⁸Nîkwîthîrwa MWATHANI nî eerîte Musa atîrî,

⁴⁹“Nî antû ba mwîrîga jwa Lawi akî ûgatiga ûtîtarîte kîrî antû ba Israeli.

⁵⁰Îndî weethie Alawi amenyeeri ba îema rîa gûtirimanîra na amenyeeri ba înto birîa bitumagîrwa ku, na into bionthe birîa birî ku. Nîbo bagakamataga îema rîu amwe na into birîa bitumagîrwa ku. Nabo bakarîmenyagîîra na batumîkage ku. Ningî baambage maema jaao jarîthiûrûkîrîte.

⁵¹Rîrîa bûkaambûraga maema jeenu, Alawi nîbo bakaambûraga îema rîaakwa. Ningî nîbo bakarîambaga. Muntû ûngî noo ûrîkû akëeja kûrîkuîrîîria ooragwe.

⁵²Antû bangî ba Israeli barîa batî Alawi, baambage maema jaao kûringana na ikundi biaao. O muntû akare kambîîne yaao arîa kûrî na rwano rwaao.

⁵³Îndî Alawi bakaambaga maema jaao kûthiûrûkîra îema rîa gûtirimanîra nîkenda ntîgaakanûkie kîûthûrano kîa antû ba Israeli. Alawi nîbo bakaamenyagîîra îema rîa gûtirimanîra.”

⁵⁴Ûu nîu antû ba Israeli baathithîrie kûringana na mantû jonthe jarîa MWATHANI eerîte Musa.