Read KIMERU BIBLE PROTESTANT EDITION Gût 10 Bible Online

Gût 10 - KIMERU BIBLE PROTESTANT EDITION bible

Gût 10

¹MWATHANI nî aarîîrie Musa aramwîra atîrî,

²“Thithia tarumbeta ijîîrî cia fetha întheru, nîkenda itumagîrwa gwîta kîûthûrano kionthe kîa antû ba Israeli rîrîa gîkûûthûrana na rîrîa gîkwambûra kambî.

³Rîrîa tarumbeta iu cio-ijîîrî ikaaringagwa kîûthûrano kionthe kîa antû ba Israeli kîûthûranage kîrî gwe au mbere ya îema rîa gûtirimanîra.

⁴Îndî rîrîa tarumbeta îmwe îkaaringagwa, nî atongeeria ba mîîrîga ya Israeli akî bakoothûranaga kîrî gwe.

⁵Rîrîa tarumbeta îkaaringagwa na kajû ta ka gwîta ndweene nîrîo antû barîa baambîte kambî rûteere rwa bwa gaiti bakaambagîîria gwîta.

⁶Rîrîa tarumbeta ikaringagwa rîa jaîrî na kajû ta ka gwîta ndweene, antû barîa baambîte kambî rûteere rwa bwa ûmotho nîrîo bakaambîrîria gwîta. Rîrîa rîonthe tarumbeta ikaaringagwa nîrîo bakaambûraga maema jaao bambîrîrie gwîta.

⁷Îndî rîrîa kîrîndî gîkethagîrwa gîkîendekaga kîûthûrana tarumbeta îtîbuîrîte kûringagwa na kajû ta ka gwîta ndweene.

⁸Ataana ba Aaroni, tabo athînjîri-Mûrungu nîbo bakaaringaga tarumbeta iu. Waatho bwa kûringa tarumbeta iu bûthingatagwe nthukîîne cieenu cionthe.

⁹“Rîrîa bûkarûjaga na anthû beenu barîa bakabwinyagîîria nthîgûrûûne yeenu, bûringage tarumbeta iu na kajû ta ka gwîta ndweene, naani MWATHANI Mûrungu weenu nkaabûririkana mbwonokie kuuma kîrî anthû beenu.

¹⁰Ningî kinya rîrîa bûgûkûngwîra biatho birîa bituui; ta mambura ja mweri jûkîguûka, na bûkîrita igongwana bia gwakîîria, na bia thîîrî bûringage tarumbeta iu. Nacio igaatûmaga nkabûririkanaga. Ni nî ni MWATHANI Mûrungu weenu.”

¹¹Kûrî ntukû ya mîrongo îîrî, ya mweri jwa îîrî, mwakeene jwa îîrî, kuuma rîrîa antû ba Israeli baaumîre Misri, îtu nî rîatigîre gûkunîka îema rîa gûtirimanîra.

¹²Nabo antû ba Israeli nî baambûrîre kambî barauma rwanda rwa Sinai, bareeta rwanda rwa Parani arîa îtu rîarûngamîre.

¹³Rîu nîrîo rîaarî îgiita rîa mbere rîa Aisraeli kwambûra kambî na kwambîrîria gwîta o ta ûrîa MWATHANI eerîte Musa.

¹⁴Barîa baambagîîria gwîta nî barîa baarî kambîîne îrîa yaarî na rwano rwa antû ba Juda. Nabo beetaga kûringana na mîîrîga yaao batongeeretue nî Nahashoni mûtaana wa Aminadabu.

¹⁵Nethaneli mûtaana wa Zuari nîwe waatongeeretie mîîrîga îrîa yeethagîrwa îrî arîa rwano rwa mwîrîga jwa Isakari rwaarî.

¹⁶Nabo antû ba mwîrîga jwa Zebuloni baatongeeretue nî Eliabu mûtaana wa Heloni.

¹⁷Nabo antû ba mwîrîga jwa Garishoni, na ba mwîrîga jwa Merari, barîa bakamataga îema rîa gûtirimanîra, baambagîîria gwîta rîrîa îema rîu rîambûrwa.

¹⁸Ikundi birîa bieethagîrwa birî au rwano rwa mwîrîga jwa Rubeni rwaarî, nîbio biaathingataga mwîrîga jwa Gerishoni na jwa Merari.

¹⁹Shelumieli mûtaana wa Zurishadai nîwe waatongeeretie antû ba mwîrîga jwa Simioni.

²⁰Eliasafu mûtaana wa Deueli nîwe waatongeeretie antû ba mwîrîga jwa Gadi.

²¹Ningî Alawi ba mwîrîga jwa Kohathi nî beetaga bakamatîte into bia îema rîa gûtirimanîra. Nabo bagîkinya arîa kambî yaambagwa, îema rîa gûtirimanîra nî rîethagîrwa rîkwambwa.

²²Nabo baathingatagwa nî mîîrîga îrîa yeethagîrwa îrî arîa rwano rwa kambî ya Efuraimu yaarî. Nabo baatongeeretue nî Elishama mûtaana wa Amihudi.

²³Gamalieli mûtaana wa Pedahazuri nîwe waatongeeretie antû ba mwîrîga jwa Manase.

²⁴Abidani mûtaana wa Gedioni nîwe waatongeeretie antû ba mwîrîga jwa Benjamini.

²⁵Nayo mîîrîga îrîa yeethagîrwa îrî arîa rwano rwa mwîrîga jwa Dani jwaarî, nîbo beetaga barî nyuma ya bangî bonthe. Nabo baatongeeretue nî Ahiezeri mûtaana wa Amishadai.

²⁶Pagieli mûtaana wa Okirani nîwe waatongeeretie antû ba mwîrîga jwa Asheri.

²⁷Ahira mûtaana wa Enani nîwe waatongeeretie antû ba mwîrîga jwa Nafutali.

²⁸Ûu nîu antû ba mîîrîga ya Israeli bathingatanaga rîrîa baambûra kambî bagîîta.

²⁹Musa nî aarîîrie Hobabu mûtaana wa Reueli. Reueli aarî wa kuuma Midiani na aarî mûthoni wa Musa. Musa areera Hobabu atîrî, “Tuî twîtîîte nthîgûrû îrîa MWATHANI aaugîre agatwaa. MWATHANI augîîte agatwaa ûthinyaari. Nandî îtania naatuî tûgaakûmenyeera.”

³⁰Hobabu aramwîra atîrî, “Arî ntîîtania naabuî. Ga ncoke nthîgûrûûne yeetû kîrî antû beetû.”

³¹Îndî Musa aramwîra atîrî, “Arî itû ûgaatûtiga. Nîkwîthîrwa nîgwe ûkûmenya naarîa tûkaamba kambî rwanda. Ningî nîgwe ûgaatwonagia naarîa tûgeetîîra.

³²Tontû rî, weetania naatuî wega bûrîa MWATHANI agatûthithîria, naatuî no ta bu tûgaakûthithîria.”

³³Antû ba Israeli nî baaumîre kîrîmeene gîa Sinai bareeta rûgendo rwa ntukû ithatû. Nabo Alawi barîa baakamataga Îthandûkû rîa kîrîkanîro nî beetaga batongeeretie, nîkenda MWATHANI abacwîra arîa bakaamba kambî.

³⁴Narîo îtu rîa MWATHANI nî rîabathiîkaga mûthenya kuuma rîrîa baambûra kambî.

³⁵ Rîrîa Îthandûkû rîa kîrîkanîro rîakamatagwa nîkenda beeta, Musa nî aaugaga, “Ûkîîra MWATHANI wînge anthû baaku, barîa bakûthwîre baaragane.”

³⁶Nabo Alawi barîa baakamataga Îthandûkû rîa kîrîkanîro barûngama nîkenda banogoka, Musa nî augaga atîrî, “Kara naatuî, itû MWATHANI! Tuî antû ba Israeli tûrî antû babaingî mono.”