Read KIMERU BIBLE PROTESTANT EDITION Gût 11 Bible Online

Gût 11 - KIMERU BIBLE PROTESTANT EDITION bible

Gût 11

¹Antû ba Israeli nî baambîrîîrie kûnung'una nîûntû bwa thîîna ciaao. MWATHANI nî aaigîrue ûrîa baanung'unaga arathûûra mono, araîîthia rûteere rûmwe rwa kambî.

²Rîu antû barakaîra Musa. Musa araromba MWATHANI, naju mwanki jûroora.

³Tontû bûû, antû au kureetwa Tabera, nîûntû nîo mwanki jwa MWATHANI jwaaîthîrie kambî au antû ba Israeli baarî.

⁴Antû bamwe ba mîgongo îngî barîa baarî ngîti, nî baarî amwe na Aisraeli. Nabo nî baambîrîîrie kwigua guuru ya nyama. Baratûma antû ba Israeli baraambîrîrîîria kûrîra kaîrî bakiugaga, “Wûi këethîra twona nyama tûkarîa!

⁵Nî tûkûririkana makûyû jarîa twarîjaga tûrî Misri tûtîkûgûra, na tûkaririkana matuunda ja kiukamba na ja meloni, na matûngûrû-saumu, na matûngûrû ja mîtî, na matûngûrû ja ikwaciî.

⁶Îndî nandî nî tûthirîri nî inya, nîûntû bwa kwaga gîntû kîngî gîa kûrîa tiga manna îîjî tûrîîjaga ntukû cionthe.”

⁷ Manna yakari ta mpîndî injerû, na yoonekanaga îkari ta maguta ja mîtî jarîa jaeeraga bwega.

⁸Nabo antû nî baaumagaraga bakoothûrania manna, na bakamîthiaa na tûthi, kana bakamîtiira na ntîrî, na bakamîkaanda na tûraî, bakathithia tûmîgaate. Natu tûkîrîîwa tweethagîrwa tûrî na mûchemo ta jwa nzeituni.

⁹ Rîrîa îme rîagûjaga kambîîne ûtukû, manna nayo nî yaagûjanaîria narîo.

¹⁰Musa nî aaigîrue antû bakîrîra barî oome ya maema jaao. MWATHANI nî aathûûrîre mono na Musa arathangîka mono.

¹¹Musa arooria MWATHANI atîrî, “Nîkî ûntû ûgûtûma nthîîna ni nthûûmba yaaku? Nîkî ûntû ntîkwona wega kuuma kîrî gwe na nîu ûnkamatithîtie mûrigo jwa kûmenyagîîra antû baba bonthe?

¹²Nî ni ndaaciarîre antû baba bonthe, rîu nîkenda ûmbîîra mbakamate ta twaana tûnyi mbaikie nthîgûrûûne îrîa waciîtîrie biûjûjû biaao ûkabaa?

¹³Nîkû nkaarita nyama cia kûng'ana cia kûrera antû baba bonthe? Nîkî bakûndîrîra bakiugaga ‘Tûrûmie nyama.’

¹⁴Nî ntîûmba kûmenyeera antû baba bonthe ninka nîûntû mûrigo jûu nî jûnditwîrîte mono.

¹⁵Îndî këethîra ûu nîu ûkwenda gûkara, itû mbigîîrua kîaao ûmbûrage o nandî ntige kûrîa thîîna.”

¹⁶Nîrîo MWATHANI aarîîrie Musa aramwîra atîrî, “Mbîtîra akûrû mîrongo mûgwanja barîa ûkûmenya nî atongeeria na arûngamîîri ba njûûrî ya Israeli. Ûbareete barûngame rûteere rwaaku au îemeene rîa gûtirimanîra.

¹⁷Naani nkwarirîe ûrî antû au. Ningî nkabagaîra Roho ûrîa ûrî ndeene yaaku nîkenda kinya bo bamenyagîîra antû baba. Rîu ûgaatiga gûkamataga mûrigo jûu wenka.

¹⁸Nandî îîra antû atîrî, ‘Itherieni rûûjû rûgîkinya nîûntû nîrîo bûkaarîa nyama. Nîkwîthîrwa MWATHANI nî aigîîtue kîrîro kîeenu; ûrîa bûraûgaga atîrî,’ ‘Nûû ûgatûrûmia nyama? Nî kaaba rîrîa twaarî nthîgûrûûne ya Misri.’ Nandî MWATHANI nîwe ûkabûrûmia nyama naabuî bûrîe.

¹⁹Naabuî tî ntukû îmwe yonka bûkaarîa nyama iu, kana ntukû ijîîrî, kana ntukû ithaano, kana ntukû îkûmi, kana ntukû mîrongo îîrî.

²⁰Îndî bûkaarîa nyama iu mweri junthe mwanka ibwonde na buitaîke. Ûntû bûu bûgakarîka nîkwîthîrwa buî bûreganîte na MWATHANI ûrîa ûrî amwe naabuî na bwamûrîrîra bûkiugaga ‘Nîmbi yaatûmîre tuuma Misri.’”

²¹Musa areera MWATHANI atîrî, “Antû barîa barî amwe naani nî arûme ngiri magana jatantatû (600,000) barîa bakûûmba gwîta na magûrû. Naagwe nîka ûkuuga ‘Nkaabarera na nyama mweri junthe!’

²²Kinya bakathînjîrwa mbûri, na ng'ondu, na ng'ombe baanyira?”

²³MWATHANI arooria Musa atîrî, “Kûrî u ntîûmba kûthithia? Nandî ûkoona këthîra ûrîa mbugîîte bûgaakarîka kana bûtîkarîka.”

²⁴Tontû bûû, Musa araumagara areeta areera antû nteto irîa MWATHANI augîîte. Ningî areera akûrû mîrongo mûgwanja barîa atongeeria ba antû ba Israeli, barûngame bathiûrûkîrîte îema rîa gûtirimanîra.

²⁵MWATHANI areenama arî îtuune araaria na Musa. Aracoka aragaîra akûrû bau Roho ûrîa waarî ndeene ya Musa, nabo barambîrîrîa kûroria. Îndî baarorerie o rîu rîonka.

²⁶Îndî Elidadi na Medadi; akûrû baîrî ba bau mîrongo mûgwanja nî baatigi kambîîne, bateetîre îemeene rîa gûtirimanîra. Roho arabatonya baraambîrîrîa kûroria barî kambîîne.

²⁷Mûthaka ûmwe nî oogîîre areeta areera Musa atîrî, “Elidadi na Medadi nî bakûroria barî kambîîne.”

²⁸Nîrîo Joshua, mûtaana wa Nuni, eerîre Musa atîrî, “Mwathi waakwa Musa, bakaanie!” Kuuma Joshua arî muntû ûmwîthî, nî aatumîkagîra Musa.

²⁹Musa nawe areera Joshua atîrî, “Nî ni ngûtûma ûbaigîîrua rûriitho? Ndeenda antû ba MWATHANI bonthe baa iroria, na akabeekîra Roho waawe!”

³⁰Musa na akûrû bau ba Israeli baracoka kambîîne.

³¹MWATHANI nî aatûmîre ruuo rûkamata nkware kuuma îrieeene. Ireeta ibuurûkîte irî mita îmwe îgûrû rîa nthîgûrû. Iragwa ithiûrûkîrîte kambî ya Israeli na irûndanîrîte. Kuuma au kambîîne ciojûri gûntû gwa kilomita inyiingî.

³²Nabo antû boothûranîrie nkware iu ntukû îîu yonthe; mûthenya na ûtukû rûûneene rwa ntûkû îîu runthe. Muntû ûrîa woojeete nkware inkai nî ûrîa woothûranîtie nkware cia kilo ngiri îmwe (1,000kg). Nabo baracianîka kambîîne kunthe nîkenda ciûma.

³³Îndî bakîrîîjaga nyama iu na mbere ya bameria, MWATHANI arathûûra mono nî antû bau, arabakanûkia na mûrimo jûmûthûûku.

³⁴Antû au naku kûreetwa Kiburothi-hataava nîûntû nîo baathikîre antû barîa baanung'unîte nîûntû bwa kwîrîrîria kûrîa nyama.

³⁵Antû nî beetîre rûgendo kuuma au Kiburothi-hataava barakinya Hazerothi, barakara ku.