Read KIMERU BIBLE PROTESTANT EDITION Gût 12 Bible Online

Gût 12 - KIMERU BIBLE PROTESTANT EDITION bible

Gût 12

¹Miriamu na Aaroni nî baarîrie mantû jamathûûku jegiî Musa nîûntû bwa ûrîa Musa aarî akûgûra mûka Mûethiopia.

²Nabo nî boorîrie atîrî, “Nîka MWATHANI atumagîra Musa akî nîkenda aaria nteto? Anga kinya tuî atîtûtumagîra?” MWATHANI nî aaigîrue ûu baugaga.

³Musa aarî muntû wainyiîtie mono nkûrûki ya antû bonthe barîa baarî nthîgûrûûne.

⁴O ntûti MWATHANI nî aarîîrie Musa na Aaroni na Miriamu arabeera atîrî, “Umagareeni bu-bathatû bwîîte îemeene rîa gûtirimanîra.” Nabo bo-bathatû baraumagara bareeta.

⁵Ningî MWATHANI nî eenamîre arî îtuune rîakari ta gîtugî ararûngama mwariine jwa îema rîa gûtirimanîra. Nawe areeta Aaroni na Miriamu, nabo bobaîrî bareetaîta mbere.

⁶MWATHANI arabeera atîrî, “Thikîîreeni ûrîa nkuuga. Gûkëethagîrwa kûrî na kîroria gatîgatîîne keenu, ûûni MWATHANI ndiimenyithanagia kîrî kîo na njîra ya kîoneki, na ngakîarîria na njîra ya irooto.

⁷ Îndî tî u gûkari kîrî nthûûmba yaakwa Musa. Nîwe ûmenyagîîra antû baakwa bonthe ba Israeli.

⁸Mbaragîria Musa tûtegeene. Mwaragîria ûrîa akoomba kûmenya ûrîa nkuuga, amboneete amenya ûrîa nkari. Îndî nîkî ûntû buî bûtîraigagua ûguaa bwa kwaria mantû jamathûûku jegiî nthûûmba yaakwa Musa.”

⁹MWATHANI nî aathûûrîre nîbo mono, arauma au areeta.

¹⁰Narîo îtu rîratiga gûkunîka îema rîa gûtirimanîra. Miriamu nî aagwatîrwe nî mûrimo jûmûthûûku jwa gîkonde areeroa cwaa. Rîrîa Aaroni aamûtegere aroona atî Miriamu nî agwati nî mûrimo jûmûthûûku jwa gîkonde,

¹¹Aaroni areera Musa atîrî, “Itû mwathi waakwa, ûgátûkanûkia nîûntû waa nî bûtûmîte twathithia meeyia.

¹²Itû ûkárekeeria Miriamu akara ta kiuno kîa mwana kîûrûrûki nyama.”

¹³Musa arakaîra MWATHANI akiugaga atîrî, “Itû MWATHANI, ndakwerenca mworie mûrimo!”

¹⁴ MWATHANI areera Musa atîrî, “Këethîra nî îthe ûmûtuîrîte mata ûthiû rî, atîngîkara ntukû mûgwanja arî na îgi? Nî eengwe kambîîne ntukû mûgwanja ciathira acokue kambîîne kaîrî.”

¹⁵Tontû bûû, Miriamu nî eengîrwe kambîîne ntukû mûgwanja. Nabo antû bataambîrîîrie rûgendo mwanka Miriamu aracokua kambîîne.

¹⁶Nyuma ya mantû jau, antû ba Israeli nî baaumîre Hazerothi bareeta baraamba kambî rwanda rwa Parani.